Afvegaleidd umræða

Smám saman kemur betur í ljós hvað það var sem brást í aðdraganda hrunsins. Sú mynd á eftir að skýrast enn betur þegar Sérstakur Saksóknari fer að láta hendur standa fram úr ermum.

Í fréttum í gær var sagt frá rannsóknarskýrslu erlendra sérfræðinga um meint bókhaldsbrot endurskoðanda og forustumanna Glitnis banka og boðað er að sagt verði frá svipuðum hlutum varðandi sömu aðila í Landsbankanum þegar líður á daginn.

Þó svo að taka verði fréttum með fyrirvara og engin sé sekur þar til sekt hans er sönnuð, þá lá það nokkuð í augum uppi skömmu eftir hrunið  að vafningarnir, viðskiptavildin og bullið sem fært var sem eigið fé banka og vogunarsjóða og flestra fyrirtækja í Kauphöllinni,  hefði ekki getað verið fært með þeim hætti í bókhald þessara aðila án aðkomu endurskoðenda og æðstu stjórnenda þessara aðila.

Miðað við fréttir í gær þá gat það vart dulist stjórnendum Glitnis banka að hann var hruninn í ársbyrjun 2008. Samt sem áður höfðu helstu leikendur hrunsins sem höfðu markvisst sogið peninga út úr Glitni upp stór orð þegar Glitnir var yfirtekinn í september 2008 og kenndu því um að Davíð Oddsson þáverandi Seðlabankastjóri hefði horn í síðu eigenda bankans.

Síðan þá hefur umræðan verið markvisst afvegaleidd af hrunverjum með aðstoð nytsamra sakleysingja og pólitískra rugludalla. Ráðist var að stjórnmálamönnum og embættismönnum og þeir hraktir úr embættum.  Fjölmiðlar spillingaraflanna, ríkisfjölmiðillinn og hluti Háskólasamfélagsins tók þátt í þessari herferð afvegaleiðingarinnar.  Þessir aðilar bera mikla ábyrgð á þeirri bullkenndu umræðu sem hefur verið í landinu. Afvegaleiðing háskólasamfélagsins náði hámarki þegar sigurvegari í kosningum til  stjórnlagaþings sagði að hrunið væri stjórnarskránni að kenna.

Í allri þeirri auðn pólitískra fúkyrða, öfugsnúninga sem einkennt hefur íslenska pólitík ekki síst fyrir tilverknað þeirra Jóhönnu og Stengríms með hjálp vinstri sinnaða Háskólasamfélagsins, var ánægjulegt að sjá til tilbreytingar vitræna og athyglisverða  blaðagrein frá stjórnmálamanni. Þá grein skrifaði  formaður Framsóknarflokksins í Morgunblaðið fyirr nokkru. Sú grein var góð tilbreyting frá innihaldsalusum kjaftavaðli  og bulli sem einkennir almennt umræðuna. Fleiri forustumenn í íslenskum stjórnmálum ættu að taka formann Framsóknarflokksins sér til fyrirmyndar í þessu efni.

Það er löngu kominn tími til að fólk snúi sér að aðalatriðunum í umræðunni á rökrænan og vitrænan hátt.

Athugasemdir

[Halldór Jónsson, 9.12.2010 kl. 12:02]

Tek undir þetta, þetta var yfirvegað og skynsamlegt skrif. Sýndi okkur nákvæmlega hliðstæðuna við það sem skeði hjá okkur. Nema Írar geta ekki fellt gengið og kjósa að samþykkja víxil fyrir sín Kaupþing og Landsbanka og láta þjóðina borga með því að afhenda þeim gjaldeyrisjóðinn. Almenningur svarar með því að flytja úr landi svo að þeir pastursminni verða að borga.Og allir JónÁsgeirar þeirra sleppa auðvitað.

[Sigurður Ingólfsson, 9.12.2010 kl. 16:19]

Jón þetta eru afar athygliverðar athugasemdir eins og margar aðrar hér á Moggablogginu í dag. Þetta " dæmi " er að fara út úr öllum próportsjónum og gott ef það verður ekki óviðráðanlegt. Ekki gleyma 800 mij ( les milljarðar ) sem Kaupþing tók ekki veð fyrir en lánaði.

[Guðmundur Kristinn Þórðarson, 9.12.2010 kl. 16:58]

Þettað er mjögl góð grein hjá þér Jón þú ert hörku penni

[Jón Ríkharðsson, 9.12.2010 kl. 17:13]

Það er lítil von til þess að vitræn umræða geti átt sér stað, meðan vinstri menn ráða nær öllum fjölmiðlum landsins.

Fæstir hafa aðstæður og tíma til að kynna sér málin á eigin forsemdum og treysta þess vegna á fjölmiðla.

Lygaþvættingur háskólaprófessora ætti að gera þá vanhæfa til að gegna sínum störfum.

Gaman er að geta þess, að prófessor úr röðum sjálfstæðismanna Hannes Hólmsteinn dásamaði útrásina mjög á sínum tíma.

Svo sá hann að sér og viðurkenndi opinberlega, að hafa haft rangt fyrir sér.

Þetta mættu fleiri háskólamenn taka til fyrirmyndar, en lítil von er til að vinstri menn viðurkenni mistök, þeir eru ekki nógu miklir menn til þess.

Öllum getur orðið á í sínum störfum. Sjálfstæðismenn hafa viðurkennt mistök sín, án þess að kenna öðrum um.

Vinstri menn hafa líka gert mistök. Getur nokkur bent á iðrun þeirra vegna eigin mistaka?

[Jón Magnússon, 9.12.2010 kl. 23:08]

Írska stjórnin gerði afgerandi mistök haustið 2008 þegar þeir tóku ábyrgð á öllu eitrinu í írsku bönkunum.  Það er vandi Íra í dag. Þeir væru í góðum málum ef þeir hefðu fellt bankanna með sama hætti og við.  Það er nefnilega rétt hjá þér að helstu "athafnmennirnir´" á Írlandi voru ekki bankaryksugur.

[Jón Magnússon, 9.12.2010 kl. 23:09]

Já Sigurður það er alveg með ólíkindum með hvaða hætti bankastarfseminn var rekinn hér. Alveg eins og íslenski athafnamaðurinn í Króatíu sem stundar Túnfiskeldi þar í landi sagði að á árinu 2007 hafi allir fengið milljarð að láni í íslensku bönkunum sem kunnu að skrifa nafnið sitt. Það vantaði allan aga og siðferði.

[Jón Magnússon, 9.12.2010 kl. 23:10]

Þakka þér fyrir hrósið Guðmundur

[Jón Magnússon, 9.12.2010 kl. 23:19]

Það er eitt að iðrast og annað að afvegaleiða umræðuna. Umræðan hér allt frá hruni hefur verið að stórum hluta til afvegaleidd og röng.  Þar bera margir mikla ábyrgð, en verst finnst mér hlutskipti sumra háskólamanna sem hafa tjáð sig sem álitsgjafar og sérfræðingar.

[Elle_, 11.12.2010 kl. 23:00]

Mikið get ég verið sammála pistlinum, Jón.  Nokkrir stjórnmálamenn innan flokksins hafa að mínum dómi verið langheiðarlegastir stjórnmálamanna: Höskuldur, Sigmundur, Vigdís.  Ekki með endalausan og gal-innantóman lyga-kjaftavaðal eins og Jóhanna, Steingrímur, Össur og öll hrollvekju-fylkingin.  Gamla nafnið á flokknum skemmir fyrir Framsókn að mínum dómi og líka EU-sinnarnir og ´gömlu´ pólitíkusarnir innan flokksins.

[Jón Magnússon, 12.12.2010 kl. 12:13]

Þetta er gott hugtak hjá þér Elle: "Hrollvekju-fylkingin" Veit ekki hvort nafnið skemmir fyrir Framsókn. Er það ekki frekar arfleifð Halldórs og Finns?