Heróín og stríð í Afganistan

Þegar Tony Blair þáverandi forsætisráðherra Bretlands reyndi að réttlæta innrás í Afganistan árið 2001  sagði hann mestu skipta að með því mætti draga úr heróínframleiðslu og viðskiptum.  Raunar höfðu Talíbanarnir sem þá stjórnuðu landinu hafið þá vinnu og náð þeim árangri að framleiðslan var aðeins 1% af því sem hún hafði áður verið.

Eftir 12 ára stríð Bretlands, Bandaríkjanna og NATO í Afganistan slær heróínframleiðslan og viðskiptin öll fyrri met. Ræktun jókst um 36% árið 2013 og Afganistan framleiðir nú yfir 90% af öllu heróíni skv. skýrslu þar til bærrar nefndar Sameinuðu þjóðanna.

Vesturveldin hafa því líka tapað eiturlyfjastríðinu í Afganistan. Tony Blair og öðrum mátti vera ljóst áður en herhlaupið til Afganistan hófst, að við erum aldrei tilbúin til að beita jafnhörkulegum meðulum til að uppræta andþjóðfélagslega starfsemi og Talibanar.  Þetta yfirvarp Blair var fölsk ástæða til að réttlæta innrás.  Hvernig svo sem litið er á þetta herhlaup til Afganistan þá er það algjör mistök og billjónum bandaríkjadala og þúsundum mannslífa hefur verið fórnað. 

Atlantshafsbandalagið (NATO) breytti um ásýnd og tilveru með því að taka þátt í árásarstríði á Afganistan hversu réttlátt eða óréttlátt sem stríðið að öðru leyti kann að vera. Með því að taka þátt í stríðinu í Afganistan og árásum á Serba á sínum tíma þá breytti NATO um eðli úr varnarbandalagi í árásarbandalag þegar það á við. 

NATO ríkin þurfa að endurskoða tilgang og tilveru bandalagsins. NATO var mikilvægasta friðarbandalag heims á tímum kalda stríðsins í anda þeirrar aldagömlu rómversku speki að vopnin verja friðinn (arma tuendum pace) En vopnin verja ekki friðinn þegar þeim er beitt til árása. Endurskoða þarf NATO sáttmálann og setja skýr ákvæði og ótvíræð sem ekki verði vikið frá að NATO er varnarbandalag og því verði ekki beitt og hernaðarmætti þess með öðrum hætti.  

Athugasemdir

[Ómar Ragnarsson, 15.11.2013 kl. 21:39]

Tek undir þetta með þér.

Ef Bandaríkin og NATO væru samkvæm sjálfum sér, væru þau búin að ráðast inn í Sádi Arabíu og uppræta einhverja mestu harðstjórn og kúgun veraldar, sem þar ríkir. Megin uppsprettan á bak við árásina á Tvíburaturnana kom þaðan, frá Pakistan og frá öfgamönnum í öðrum löndum en Afganistan.

[Jón Steinar Ragnarsson, 15.11.2013 kl. 22:22]

Afganistan hefur reglubundið slegið met í heroínframleiðslu frá því innrásin var gerð, svo Etta eru svosem engar fréttir. Framleiðslan hefur margfaldast á þessum tíma.

Maður spyr sig hver kaupir og hver hagnast. Einhver grunur læðist að manni að dópdílingar bandarískra hafi ekki hætt eftir Íran Contra skandalann.

Ameíkanar, Bretar og nató í heild sinni og hernaðarbrölt þeirra er ekkert annað en skipulögð glæpastarfsemi. Til stríðsins var stofnað ólöglega, en enginn hefur sætt ábyrgð og ekkert útlit fyrir að svo verði. Þeir gera nákvæmlega það sem þeir vilja og enginn hreyfir fingri við.

Nató er árásarbandalag, sem tekur þátt í og stofnar til ólöglegra striða og fjöldamorða á saklausum borgurum án meinnar réttlætingar. Auðvitað eigum við að hætta þessari samvinnu ef þessu verður ekki breytt. Ef ekki þá erum við blóðug upp fyrir haus sjálf. Fjöldamorðingjar, glæpamenn og ekki síst eiturlyfjasmyglarar.

[Jónatan Karlsson, 16.11.2013 kl. 09:51]

Það er tímana tákn að öfgafullir stuðningsmenn "vestrænnar samvinnu" sjái nú hver á fætur öðrum í gegnum spuna kollhúfana á Wall Street og sjái ljósið.

Spurningin er hvort hvort blákaldar hrollvekjandi upplýsingar manna á borð við Assange og Snowden hafi ekki einmitt orðið til þess að opna augu heiðursmanna á borð við greinarhöfund og svo ekki sé minnst á öfgafullan krossfarann, nafna hans, sem á síðustu misserum virðist sömuleiðis hafa vikið frá villu síns vegar.

Jónarnir tveir á Íslandi eru aðeins örsmá birtingarmynd þeirrar viðhorfsbreytingar sem nú á sér stað á heimsvísu í garð hins hnignandi stórveldis.

"Konungurinn er dauður! - Lengi lifi konungurinn!"

[Jón Magnússon, 17.11.2013 kl. 09:56]

Þetta er alveg rétt hjá þér Ómar. Saudi Arabía er auk þess mesta afturhaldsríkið þar sem mestu trúarlegu öfgarnar eiga sér stað. Allt sem Bandaríkjamenn segjast standa gegng.

[Jón Magnússon, 17.11.2013 kl. 09:57]

NATÓ er varnarbandalag Jón en það hefur verið misnotað í a.m.k. tveim tilvikum gegn Serbíu og í Afganistan.

[Jón Magnússon, 17.11.2013 kl. 10:00]

Það að vara andkommúnisti Jónatan er ekki það sama og skrifa upp á allt hjá Bandaríkjunum. Ég hef oft verið gagnrýnin á það sem þeir hafa gert t.d. innrásina í Írak þannig að ég hef alltaf séð ljósið. Það sem nú hefur verið að gerast er það að Bandaríkjamenn hafa kosið 4 vanhæfa forseta í röð og var þó Clinton skárstur þeirra og afleiðingar þess er að koma betur og betur í ljós með dvínandi tiltrú og áhrifum Bandaríkjanna. Skelfilegt að Bandaríkjamenn skyldu klúðra jafn hrapalega og þeir gerðu samúðinni og samstöðunni eftir árásinni á tvíburaturnana.