Ég líka fá

Börn gera oft kröfu til að fá það sama og aðrir hvort sem þau þurfa eða þurfa ekki. Þannig horfir barnið á systkini sitt sem hefur meitt sig og fær plástur á meiddið og krefst þess að fá plástur líka þó ekkert sé meiddið.

Gylfi Arnbjörnsson, Árni Páll Árnason og fleiri "spekingar" eru eins og barnið sem krefst þess að fá plástur þó ekkert sé meiddið.  Þeir vandræðast yfir því að ákveðnir þeim handgengnir hópar skul ekkert fá í skuldaleiðréttingartillögu ríkisstjórnarinnar jafnvel þó engin sé skuldin.

Þessum mönnum yfirsést grundvallaratriðið sem er að það er verið að bæta þeim sem urðu fyrir óréttmætri hækkun lána vegna heljartaka verðtryggingar að litlu leyti það tjón sem þeir urðu fyrir m.a. vegna stefnu forseta ASÍ um að taka ekki verðtrygginguna úr sambandi við bankahrun.  

Í kjölfar bankahrunsins var engin virðisauki í þjóðfélaginu en verðtryggð lán hækkuðu og hækkuðu vegna gengishruns krónunnar.  Þeir sem höfðu keypt íbúð árin 2007-2008 urðu fyrir því að fasteignir lækkuðu  allt að 2/3 í Evrum talið á sama tíma og lánin hækkuðu og hækkuðu vegna ranglátrar verðtryggingar.  Hugmyndin og hvatin að skuldaleiðréttingunni er að koma til móts við þá sem sættu óréttmætri hækkun lána í því skyni að koma á örlítið meira þjóðfélagslegu réttlæti. Það þýðir ekki að einhverjir aðrir eigi tilkall til einhvers.

Sá kostnaður sem ríkissjóður verður fyrir vegna skuldaleiðréttingarinnar er vegna skammsýni Gylfa Arnbjörnssonar forseta ASÍ, Jóhönnu Sigurðardóttur, Steingríms J. Sigfússonar og annarra pótintáta sem sinntu ekki þeirri grundvallarskyldu stjórnenda í lýðræðisþjóðfélagi sem er að virða rétt neytenda þannig að fjármálastofnanir og fyrirtæki geti ekki verið á skefjalausri beit í buddu neytenda  og geri eignir þeirra upptækar vegna rangláts lánakerfis verðtryggingar sem er einstakt í öllum heiminum hvað varðar lán til neytenda.  

Athugasemdir

[Anna Sigríður Guðmundsdóttir, 28.3.2014 kl. 17:22]

Jón. Það er líklega ekki í nokkru mannlegu né vitsmunalegu valdi opinberra forstjóra og embættismanna, að sársaukameta skaða, fyrir hvern og einn svikakerfis-særðan einstakling.

Einungis svikinn og særður einstaklingur þekkir eigin sársauka/skaða, vegna kerfissvika hins opinberlega viðurkennda verkafólksláglauna-skattráns-kerfis.

Sum sár sjást ekki, en svíða þó oftast meir, en sýnilegu sárin.

Þessi skaðabóta-umræða um veraldleg verðmæti, er ekki í samræmi við raunverulegan og heildrænan skaða hverrar persónu, vegna áratugagömlu stjórnsýsluspillingarinnar lögfræðinga/dómsstólavörðu.

Hjartasár vegna stjórnsýslusvika eru/verða aldrei sambærileg við sprunguskemmdir verðbréfasvikinnar steinsteypu, sem voru/eru í boði banka/sjóðaræningja. Sannanirnir kerfisskapaðra hjartasára/skaða eru ósýnilegur skaði. Sálfræðihjálp er einungis fyrir hálaunaða einstaklinga, hjá stjórnsýsluyfirvalda-skattaræningjunum lögfræðingavörðu á Íslandi. Þetta er staðreynd!

Fátækir og illa staddir banka/lífeyrissjóðsrændir, fá ekki nauðsynlega banka/lífeyrissjóðsráns-áfalla-sálfræðihjálp niðurgreidda, af hinu opinbera á Íslandi!

Auglýsi hér með eftir siðferðisheilbrigðisvottorði og skaðabóta-ábyrgð ofurlaunaðra og siðblindra yfirmanna banka/lífeyrissjóða/dómsstóla á Íslandi!

M.b.kv.

[Sigurður M Grétarsson, 28.3.2014 kl. 22:42]

Gagnrýni Árna og Gylfa byggir á nokkrum forsendum sem valda því að aðgerðir ríkisstjórnarinnar geta ekki á nokkurn hátt flokkast undir réttlæti.

Í fyrsta lagi þá hafa leigjendur þurft að taka á sig mun meiri hækkun greiðslna fyrir húsnæði en húsnæðiseigendur en samt á ekki að gera neitt fyrir þá.

Í öðru legi þá greiða þeir sem búa í húsnæði Félagbústaða og hjá Búseta leigu sem ræðst af kostaði og því hjafa þeir þurft að taka á sig aukinn kostnað vegna hækkunar verðtryggðra lána rétt eins og þeir sem eiga íbúðirnar sínar sjálfir en það á ekki að gera neitt fyrir þá.

Í þriðja lagi fer stærstur hluti þessara greiðslna sem skattgreiðendur standa undir til fólks sem hefur hagnast á sínum húsnæðisviðskiptum því húsnæðisverðið hefur hækkað meira en lánin þeirra. Þetta á við um þá sem keyptu sínar íbúðir frir árið 2005. Hvað réttlætir þá að skattgreiðendur skuli niðurgreiða lánin þeirra? Þeir hafa ekki orðið fyrir neinum forsendubresti.

Hér er því verið að laggja gríðarlega þungar byrgðar á skattgreiðendur til að niðurgreiða lán sumra heimila alveg óháð því hvort viðkomandi heimili hafi tapað eða grætt á sínum húsnæðisviðskiptum.

Og síðast en ekki síst þá er þessi kostnaður komin til vegna ákvarðana núverandi ríkisstjórnar en ekki fyrri ríkisstjórnar. Það er ekki og hefur eldrei verið möguleiki að lækka innheimtanleg lán sem ekki hafa verið dæmd ólöglega án þess að það séu skattgreiðendur sem borga brúsann. Það var þannig árið 2009 og er þannig í dag.

[Ómar Ragnarsson, 28.3.2014 kl. 23:43]

"Þótt ekkert sé meiddið" segirðu. Það hafa verið færð að því gild rök að fólk í Búseta og öðrum hliðstæðum félögum urðu fyrir sams konar forsendubresti og aðrir vegna húsnæðislána, vegna þess að skuldir þessara félaga óðu upp og tjónið lenti því á fólkinu, sem þurfti í gegnum hækkaðar greiðslur að skaffa í snarhækkaðar afborganir af skuldunum.

Ef við lítum yfir þennan vígvöll afleiðinga Hrunsins allar götur frá 2009, sjáum við að ástandið sem þú lýsir, að fyrst sumir fengu leiðréttingu, eigi aðrir heimtungu á leiðréttingu, varð til í tíð vinstri stjórnarinnar eftir aðgerðir hennar.

Þá reis eðlilega bylgja krafna um frekari skuldaleiðréttingar sem nú er verið að reyna að uppfylla og laga "meiddið", sem sannarlega var fyrir hendi.

Nú rís eðilega ósk og krafa um að skilja ekki stóran hóp eftir enn og aftur af því að það er "meiddi" núna alveg eins og í fyrra tilfellinu.

[Einar Karl, 29.3.2014 kl. 11:25]

Skondið.

Mér finnst einmitt fyrirsögnin þín og fyrsta málsgreinin í pistlinum lýsa rökstuðningi margra fyrir stóru millifærslunni, "Ég fékk ekkert úr 110% leiðinni, ég vil líka fá eitthvað!"

Þú segir að fasteignir hafi lækkað um "allt að 2/3 í Evrum talið" og talar um þá sem keyptu fasetignir á árunum 2007-2008.

En hvað með þá sem keyptu fasteign á árunum 1990-2003?

Hvaða sanngirni er í því að verið sé að taka fé úr ríkissjóði og gefa því fólki peninga??