Íshellan vex og þykknar á Suðurhvelinu.

Í skýrslu bandarísku geimvísindastofnunarinnar NASA kemur fram að ísinn á suðurpólnum fer vaxandi. Samkvæmt upplýsingum frá gervitunglum þá óx ísinn á suðurhvelinu um 82 billjónir tonna á ári á árunum 2003-2008. Það gerir meira en sem nemur bráðnun annarsstaðar í heiminum þar sem hún er þá fyrir hendi. Þessar niðurstöður eru í andstöðu við rannsóknir IPCC sem segir að yfirborð sjávar hækki um o.27 millimetra á ári vegna bráðnunar suðurskautsíssins. Niðurstöður IPCC hafa iðulega reynst rangar og mælingar NASA eru mun nákævmari þannig að aðrir en hlýnunartrúboðar leggja niðurstöður NASA frekar til grundvallar.

Spurningin er þá hvað veldur því að yfirborð sjávara hækkar ef það er ekki vegna aukinnar bráðnunar íss. Þá er líka spurningin er yfirborð sjávar að hækka meira en sem nemur eðlilegum sveiflum og spyrja má hvernig stendur á því að hin stórkostlegu hafnarmannvirki sem Heródes mikli gerði í Caesarea Maritima 15 árum fyrir okkar tímatal eða fyrir 2030 árum eru nú á kafi í sjó jafnvel þó að hnattræn hlýnun hafi ekki orðið sem neinu nemur nema tímabundnum sveiflum á þessu 2000 ára tímabili.

Uppgötvanir NASA um að íshellan á suðurhveli sé að vaxa og þykkna vekur óneitanlega margar spurningar um nákvæmni þeirra loftslagsvísinda sem haldið er að stjórnmálamönnum og trúarleiðtogum til að fá þá til að taka skaðlegar ákvarðanir til verndar lífríkinu á fölskum forsendum. Ákvarðanir sem leiða til aukinnar ríkishyggju og ríkisafskipta, versnandi lífskjara og takmörkunar á frelsi einstaklingsins.

Vitlausar ákvarðanir geta þó iðulega fengið stuðning úr óvæntum áttum eins og frá stórfyrirtækjum og fjármálakerfinu, sem búa til verðmæti úr bönnum. Þannig gerðist það með íslenska kvótakerfið í sjávarútvegi sem fjármálafyrirtækin gerðu að verðmætum þar sem engin verðmæti voru í fiskveiðiréttindunum fyrir daga kvótakerfisins og sama er að gerast á hnattræna vísu varðandi kolefnislosunarkvóta, sem ganga nú handa á milli dýrum dómum. Þegar stórkapítalið og fjármálakerfið tekur höndum saman við stjórnmálalega og vísindalega vitleysu verður erfiðara að komast burt úr bullinu eins og íslenska kvótakerfið í sjávarútvegi hefur sýnt þar sem tugir milljarða verðmæta synda um og úr íslenskri lögsögu án þess að þær séu nýttar vegna galla kvótakerfisins.

Athugasemdir

[Emil Hannes Valgeirsson, 8.11.2015 kl. 18:54]

Ef yfirborð sjávar hækkar án þess að um jökulvatn sé að ræða, þá er skýringin þensla hafanna vegna hlýnunar sjávar. Þannig að, ef eitthvað er til í þessu með Suðurskautsjökulinn og að hann sé ekki að stuðla að hækkun sjávarborðs, þá ætti vægi hitaþenslunnar að vera þeim mun meiri en áður var talið.

[Sigurður M Grétarsson, 10.11.2015 kl. 18:02]

Þarna ert þú klárlega að vitna í áróðursmenn sem eru að reyna að sannfæra fólk um að það eigi sér skki stað hlýnun af mannavöldum. Þeir enda sína samantekt á árinu 2008 eða fyrir 7 árum síðan. Af hverju ætli þeir geri það?

Svarið er augljóst. Árið 2008 hætti íshellan á Suðurskautinu að aukast og fór að minnka. Það má sjá á þessari samantekt hér.

http://www.loftslag.is/?p=14929

Og ef það línurit sem þarna er sýnt sem sýnir þróunina þá er ljóst hvert stefnir. Það er því engin að reyna að fá ríkisstjórnir til að grípa til aðgerða á fölskum forsendum heldur er rík ástæða til aðgerða.