Einræði meirihlutans

Stjórnlagaráð skilaði tillögum sínum til Alþingis. Þar á bæ hreyktust menn af því að hafa allir greitt atkvæði með tillögunum jafnvel þó engin sem sat í ráðinu væri sammála öllum tillögunum.

Talsmenn stjórnlagaráðsins töldu þetta merki um ný og betri vinnubrögð í pólitík að banna minnihlutaálit og skoðanir en sameinast um einræði meirihlutans. Þetta er rangt.

Þessi hugsun stjórnlagaráðs samræmist ekki viðhorfum lýðræðissinna og hugsjónamanna sem telja nauðsynlegt lýðræðinu og hugsjóninni að menn standi á sínum skoðunum hversu margir sem eru með eða á móti.  Stjórnlagaprófessorinn og forsætisráðherra fyrrverandi Dr. Gunnars Thoroddsen benti á í þessu sambandi  að minnihluti í dag gæti orðið meiri hluti á morgun í lýðræðisríki.

Stjórnlagaráðið  misskildi  hlutverk sitt sem ráðgefandi nefndar um stjórnsýslumálefni. Eðlilegt hefði verið að skila inn tillögum meirihluta og minnihluta til að Alþingi sem fær álitið til skoðunar og úrvinnslu áttaði sig á hugmyndum og  sjónarmiðum sem bærðust með ráðsliðum. 

Hver skyldi hafa fundið upp á því í stjórnlagaráðinu að framkvæma hugmyndir alræðishyggjunnar um einræði meirihlutans en víkja frá hugmyndum og hugsjónum lýðræðisins um virðingu fyrir öllum skoðunum og rétti fólks til að halda þeim fram? 

Herhvöt lýðræðisins og frelsisins var e.t.v. hvergi orðuð jafnvel og hjá franska heimspekingnum og skáldinu Voltaire þegar hann sagði "Ég fyrirlít skoðanir þínar en ég er tilbúinn til að fórna lífi mínu til að þú fáir að halda þeim fram."  

Stjórnlagaráðið var annarrar skoðunar en Voltaire.

Athugasemdir

[Eiríkur (IP-tala skráð) 12.8.2011 kl. 16:03]

Þessi tilvitnun er ranglega eignuð Voltaire, þótt meirihluti haldi það.

En ég skal verja rétt þinn til að halda þinni skoðun fram.

[Gunnar Waage, 12.8.2011 kl. 20:11]

Aðeins of einfalt hjá Þorvaldi :)

[Jón Magnússon, 12.8.2011 kl. 21:14]

Ef svo er Eiríkur hver sagði þetta þá. Það má lesa m.a. í bókum um þessa tilvitnun eignaða Voltaire og í ágætri grein sem Ellert B. Schram fyrrverandi alþingismaður skrifaði fyrir nokkru þá vitnaði hann í þetta og Voltaire sem höfund.  Þakka þér síðan fyrir það Eiríkur að vilja verja rétt minn til skoðanafrelsis.

[Jón Magnússon, 12.8.2011 kl. 21:14]

Já og öllum hinum líka  Gunnar.

[Anna Sigríður Guðmundsdóttir, 12.8.2011 kl. 23:39]

Jón. Það sem vantar á Íslandi eru rökræður á lýðræðislegum réttlætisgrundvelli, en ekki pólitískum flokka-grundvelli. Það eru pólitískar öfgar til hægri og vinstri, sem eru að tortíma öllu á þessari jörð (líka Íslandi), vegna samskiptaörðugleika og skilningsleysis á ólíkum sjónarmiðum náungans. 

Með réttlátum rökræðum kemst fólk að málamiðlunar-niðurstöðum, sem eru lýðræðislegar og sanngjarnar, óháð stjórnmálaflokkum.

Tillögur að nýrri stjórnarskrá eru skref í rétta átt, að lýðræðislegum málamiðlunar-niðurstöðum. Sjónarhornin eiga að vera jafn mörg og þeir sem landið byggja, og ómögulegt að komast að samkomulagi án víðsýnnar og jákvæðrar rökræðu í þaula.

Einhverstaðar verður þessi unga þjóð að byrja að ganga upp þroska-brekkuna (og hnjóta um hindranirnar, og standa upp aftur), og læra að standa saman að rökræðum, í anda réttlætis og lýðræðis, með tillitsemi fyrir skoðunum og sjónarmiðum allra. Á því læra allir mest, og allra hag er best borgið.

Hef ég rangt fyrir mér í þessu? Er þetta bara bull í mér?

M.b.kv. 

[Eiríkur (IP-tala skráð) 13.8.2011 kl. 00:25]

Það má lesa ýmislegt í bókum og ágætum greinum.

Og wikipediu

[Guðrún María Óskarsdóttir., 13.8.2011 kl. 02:16]

Sæll Jón.

Þessi pistill þinn er gull, fáir gætu hafa orðað betur nákvæmlega það sem átt hefur sér stað varðandi starf stjórnlagaráðsins.

Ég er þér innilega sammála.

kv.Guðrún María.

[Gulli (IP-tala skráð) 13.8.2011 kl. 10:26]

Það var Evelyn Beatrice Hall sem skrifaði þetta:

http://en.wikipedia.org/wiki/Evelyn_Beatrice_Hall

[Jón Magnússon, 13.8.2011 kl. 11:40]

Nei Anna þetta er alveg rétt hjá þér.  Ég er sammála þér um það að við erum um of læst ofan í ákveðnum skotgröfum sem oft kemur í veg fyrir málefnalega umræðu.  Þannig var eðlileg lýðræðisleg umræða um vandamál þjóðarinnar vegna gríðarlegs innflutnings útlendinga sópað út af borðinu á grundvelli þess að það væri rasismi svo dæmi sé tekið. Sama var með breytingar á stjórnarskránni þar tóku yfir hróp þeirra sem sögðu að úrelt og gömul stjórnarskrá væri einn af orsakavöldum bankahrunsins. Girt var fyrir eðlilegar umræður um þetta dómadags bull.  Staðreyndin er sú að það er ágætis samstaða um meginhluta stjórnarskrárinnar og það var ekkert sem kallaði á breytingar nema spurning um beint lýðræði, jafnræði kjósenda, auðlindir landsins í almannaþágu og spurning um hvort við vildum fara bandarísk/frönsku leiðina með aðskilnað löggjafaravalds og framkvæmdavalds.  En Anna ég leyfi mér að benda hér á atriði sem mér finnast ámælisverð við störf stjórnlagaráðs vonandi er fólk tilbúið að ræða það málefnalega.

[Jón Magnússon, 13.8.2011 kl. 11:41]

Já Eiríkur það reyni ég að gera mikið af sérstaklega úr bókum. En wikipedia verður svolítið útundan.

[Jón Magnússon, 13.8.2011 kl. 11:42]

Þakka þér fyrir Guðrún María ég geri ráð fyrir að þér finnist þá eðlilegra að þúsund blóm hefðu fengið að blómstra í ranni stjórnlagaráðs í stað þess að þeir skyldu skila einni visinni rós.

[Jón Magnússon, 13.8.2011 kl. 11:42]

Þakka þér fyrir það Gulli. En þetta er alltaf eignað Voltaire en hafa skal það sem sannara reynist.

[Elle_, 15.8.2011 kl. 23:50]

Persónulega get ég ekki tekið ráðið alvarlega, Jón, þar sem það var sett á stofn með vanalegum yfirgangi Jóhönnuveldisins.  Gegn Hæstarétti.