Stjórnarskráin lagar ekki lífskjörin. Atlagan að stjórnarskránni VI)

Margir halda að tillögur stjórnlagaráðsins hafi þýðingu varðandi breytingu á kvótakerfinu. Þannig er það ekki. Tillögur stjórnlagaráðs þó samþykktar yrðu breyta engu um stjórn fiskveiða.

Tillögur stjórnlagaráðs breyta engu um starfsemi fjármálafyrirtækja eða almenna starfsemi á markaði.

Tillögur stjórnlagaráðs  létta ekki af verðtryggingunni eða lánaokrinu í landinu. Þær draga ekki úr hættu á nýju bankahruni eða spillingu í fjármálakerfinu.

Með því að fara í aðför að stjórnarskránni eins og ríkisstjórnin beitti sér fyrir var athygli fólks beint frá mikilvægustu úrlausnarefnum í þjóðfélagsmálum en efnt til deilna um stjórnarskrána.

Mikilvægasta viðfangsefnið í þjóðfélaginu í dag og allt frá bankahruni eru og hafa verið  að skapa viðunandi lífskjör fyrir unga fólkið í landinu sem og aðra. Það verður að búa þannig að atvinnumálum að dugandi fólk hafi svipuð kjör og á hinum Norðurlöndunum.  Þá verður að afnema verðtrygginguna og tryggja að fólk búi við svipuð lánakjör og á hinum Norðurlöndunum.  Verðlag í landinu er  þriðja atriðið sem mestu máli skiptir varðandi velmegun og lífskjör í landinu.

Þessi atriði  eru þau sem mestu máli skipta til að koma hlutum í viðunandi horf eftir bankahrun. 

Þessi mál urðu aukaatriði eins konar afgangsmál. Þess í stað einhenti ríkisstjórnin sér í  umræður um formalisma og stjórnarskrá. Með því að beina sjónum almennings í áttir sem skipta lífskjör og velmegun í núinu engu máli eins og stjórnarskrármálið tókst því miður að rugla margt gott fólk í ríminu. Með milljarðs kostnaði og einhliða áróðri er síðan haldið fram að stjórnlagaráðstillögurnar séu eitthvað annað en þær eru.

Tillögur stjórnlagaráðs bjarga ekki húsinu þínu frá uppboði. Þær búa ekki til arðbær störf eða draga úr forréttindum eða spillingu í þjóðfélaginu. Tillögurnar fjalla um allt annað.

Með glöggum hætti benda þeir Skúli Magnússon héraðsdómari og dósent við H.Í og Ágúst Þór Árnason formaður lagadeildar Háskólans á Akureyri á meginstaðreynd í stjórnarskrármálinu og hvetja fólk til að segja NEI við fyrstu spurningunni á kjörseðlinum en þeir segja:

" hryggjarstykki stjórnarskrárinnar á sér djúpar rætur í íslensku samfélagi. Með frumvarpi stjórnlagaráðs er gerð tillaga um að þessar rætur séu rifnar upp og haldið verði út í óvissuna."

Við skulum standa vörð um rætur og grundvöll íslensks samfélags og segja NEI við fyrstu spurningunni á kjörseðlinum.

Berjumst fyrir þeim breytingum sem skipta máli varðandi lífskjör og velmegun í landinu tillögur stjórnlagaráðs fjalla ekki um þau atriði.

Athugasemdir

[Ragnhildur Kolka, 18.10.2012 kl. 10:13]

Tessi faersla tyrfti lika ad birtast a prenti.

[Jón Magnússon, 18.10.2012 kl. 11:45]

Þakka þér fyrir Ragnhildur. Það má hver sem vill taka hana og birta hvar sem er.  Ef þér finnst þetta gott mál þá birtu hana þar sem þú getur.  Einhliða áróðurinn og ruglið í málinu er búið að afvegaleiða mikið af góðu og velmeinandi fólki því miður.

[Emil Emilsson (IP-tala skráð) 18.10.2012 kl. 12:33]

Já það er skrítið hvað algjörlega er búið að snúa öllu á hvolf í íslenskum veruleika.

Mín tilfinning er að þetta sé íslenska útgáfan á wag the dog (http://www.imdb.com/title/tt0120885/)

Ísland á ekki her þannig að við getum ekki farið í stríð við einhvern til að forða umræðunni frá hlutunum sem við viljum ekki að sé rætt um.

Það er bara engin brú í NEINU í þessu stjórnarskrármáli. Hvað er að stjórnarskránni sem við höfum? má ekki ræða það í rólegheitunum með samþykki meirihluta alþingis ?

[Ragnhildur Kolka, 18.10.2012 kl. 14:14]

Eg laet ta hendur standa fram ur ermum og sendi hana inn a Facebook.

[Gunnar Heiðarsson, 18.10.2012 kl. 16:31]

Þakka góðar greinar um þetta mál, Jón.

Það sem ég óttast mest er hvað við tekur eftir þessa skoðanakönnun stjórnvalda. Það skiptir í raun ekki máli á hvorn vegin hún fer, stjórnvöld munu geta nýtt sér báðar niðurstöður til áframhaldandi illinda um þetta mál.

Nú er kosningavetur hafinn og Alþingi mun verða slitið fyrr en vanalega. Því er ljóst að vart verður hægt að komast að niðurstöðu um breytingu stjórnarskrár fyrir þinglok og alls ekki gerð nýrrar. Til þess eru of miklar deilur í þjóðfélaginu um þetta mál, en grunnur stjórnarskrár hlýtur að byggja á sátt.

Það er því skelfileg tilhugsun að stjórnarflokkarnir, sérstaklega Samfylking, muni geta viðhaldið illdeilum vegna þessa máls í gegnum alla næstu kosningabaráttu, þegar svo mörg önnur aðkallandi mál þyrftu að vera í fyrirúmi.

Þar ber auðvitað hæðst hvernig hægt sé að koma á meiri verðmætasköpun í landinu. Það er í raun lausn flestra annara vandamála okkar. Aukin verðmætasköpun er okkar eina raunhæfa leið úr þeirri skuldasúpu sem þjóðin er í, er okkar eina raunhæfa leið til betri lífskjara. En þetta er þó langtímaverkefni og því brýnt að finna bráðabyrgðalausnir til hjálpar fjölskyldum landsins, finna lausn til að koma grunnþjónustunni í viðunandi horf og fleira í þeim dúr.

Þessar bráðabyrgðalausnir áttu auðvitað að vinna á núverandi kjörtímabili, samhliða aukinni verðmætasköpun. Ef stjórnvöldum hefði auðnast að fara þá leið væri ástandið betra hjá okkur nú og við farin að sjá fram á veginn.

Þess í stað hafa stjórnvöld notað þetta kjörtímabil til gæluverkefna, með tilheyrandi kostnaði, sem svo aftur hefur aukið enn á eymd landsmanna. Það þarf sérstakt fólk til að afreka slíkt, sérstakt fólk sem telur best að leggjast upp í rúm og lesa bók, meðan húsið brennur!

[Jón Magnússon, 18.10.2012 kl. 17:45]

Það er alveg rétt Emil það er ekki neitt að núverandi stjórnarskrá. Þjóðin á að breyta þeim atriðum sem þarf að breyta en það var aldrei þörf á eða vit í að fara í þennan leiðangur.

[Jón Magnússon, 18.10.2012 kl. 17:46]

Þakka þér fyrir Ragnhildur.  Ég reynin líka að dreifa þessu sem mest. En mín reynsla er að blaðagreinar skili sér ekki betur í lestri en bloggfærslur.

[Jón Magnússon, 18.10.2012 kl. 17:49]

Sem betur fer er margt Samfylkingarfólk sem hafnar þessari fráleitu aðför að stjórnarskránni. Það hefur sig bara lítið í frammi vegna Jóhönnu og gammanna hennar. Margt Samfylkingarfólk hefur komið að máli við mig og lýst áhyggjum sínum vegna stjórnarskrármálsins. En ég deili áhyggjum þínum Gunnar að verði það niðurstaðan að meiri hlutinn segi já í þessari atkvæðagreiðslu þá muni Jóhanna og hennar nótar nýta sér það út í æsar til að efna til enn meiri ófriðar og illdeilna. Þau telja væntanlega að það sé vænlegast sem innlegg í kosningabaráttuna þannig að ekki verði talað um svikin t.d. varðandi lánamál heimilanna.

[Anna Benkovic Mikaelsdóttir, 18.10.2012 kl. 18:40]

"hættum að láta góð mál láta gjalda málflytjenda"

[Jón Magnússon, 18.10.2012 kl. 21:57]

Anna þú fyrirgefur ég birti ekki í athugasemdum mínum tilvitnun í fés- og bloggfærslu þriðja aðila. Athugasemdirnar eru til að fólk geri athugasemdir við það sem er sagt og fjalli um færsluna en komi ekki með aðrar bloggfærslur. Þess vegna setti ég ekki fyrri athugasemdina þína inn sem var bloggfærsla þriðja aðila frá því í gær minnir mig.

[Anna Benkovic Mikaelsdóttir, 18.10.2012 kl. 22:19]

ok,ég skil.

Bara að fólk mæti á kjörstað. Atkvæðarétturinn er svo dýrmætur og við kunnum ekki að meta það. Skítt með já og nei, eða skila auðu, bara að mæta sem góður borgari í lýðræðisríki!

[Björn Emilsson, 19.10.2012 kl. 01:19]

Eina ástæðan fyrir baráttu Jóhönnu stjórnarinnar um breytingu á stjórnarskránni er vegna umsóknar Islands í Evrópubandalagið.

[Hermóður (IP-tala skráð) 19.10.2012 kl. 07:17]

Tek þig á orðinu Jón og nota Briem aðferðina og pasta þessari skyldulesningu sem víðast.

[Jón Magnússon, 19.10.2012 kl. 10:10]

Sammála þér Anna. Mikilvægt að fólk nýti atkvæðisréttinn.

[Jón Magnússon, 19.10.2012 kl. 10:12]

Heldur þú það Björn.  Ég held að það sé líka hluti af loforðum hennar við óeirðardeild vinstri sinnuðu háskólaprófessorana og skólaspekingana.

[Jón Magnússon, 19.10.2012 kl. 10:12]

Þakka þér fyrir Hermóður.