Lögreglunám í boði pólitískra hrossakaupa?

Það kom á óvart að menntamálaráðherra skyldi ákveða að pólitískum geðþótta að nám lögreglumanna skyldi vera við Háskólann á Akureyri, þrátt fyrir að Háskóli Íslands hefði verið talinn bestur skv. könnun ráðherrans.

Vegir skringilegra pólitískra ákvarðana eru oft álíka órannsakanlegir og almættisins. Stundum er þó varpað skímu á hvað veldur og það hefur rektor Háskólans á Bifröst gert með athyglisverðum hætti í viðtali í blaðinu Skessuhorn og á sjónvarpsstöðinni Hringbraut. Vilhjálmur rekur þau undirmál,sem urðu þess valdandi að menntamálaráðhera tók þessa ákvörðun.

Saga Vilhjálms er ekki falleg um pólitísk undirmál, hrossakaup og tilraunir hins nýja flokkseigendafélags í Sjálfstæðisflokknum til að varða stöður. Aðstoðarmaður Innanríkisráðherra og aðstoðarmaður Fjármálaráðherra hafa brugðist hart við ummælum Vilhjálms, en bæði eru í prófkjörsframboði í NV kjördæmi og þykir að sér vegið. 

Hver er þá sannleikurinn? Er það rétt eða rangt sem Vilhjálmur heldur fram?

Vilhjálmur Egilsson hefur hvatt sér hljóðs í þjóðmálaumræðunni, sem framkvæmdastjóri Verslunarráðs, alþingismaður, framkvæmdastjóri samtaka atvinnulífsins og nú háskólarektor á Bifröst. Vilhjálmur nýtur þess álits að vera talinn sannorður og fara ekki með fleipur.

Svo mætti minnast þess fornkveðna að sjaldan er reykur þá engin er eldurinn.

Athugasemdir

[Jón Valur Jensson, 30.8.2016 kl. 01:49]

"Where there is smoke, there is fire."

Góður pistill sem jafnan hjá þér, nafni.

Ekki aðeins betri hæfni og geta Háskóla Íslands til að sjá um þessa kennslu, heldur einnig þjóðhagsleg hagkvæmni (ekki sízt vegna ferðalaga nemenda norður) og umhyggja fyrir því, að kennarar við Lögregluskólann megi nýtast til kennslunnar, mæltu móti þessari undarlegu ákvörðun ráðherra.

Flestir nemendurnir verða að sunnan, það er vitað mál, og hefðu margir getað stundað sitt nám við HÍ, eigandi hér heimili á höfuðborgarsvæðinu, og jafnframt hugsanlega tekið aukavaktir við lögreglustörf, en nú má það ekki nýtast þeim, af því að verið er að hugsa um einhver annarleg kjördæmasjónarmið.

Skattborgarinn borgar, það er víst helzta hlutverk hans í augum margra stjórnmálamanna!