Pólitíska veðurfræðin

Það er nýlunda að flytjandi veðurfregna hvetji neytendur til að sniðganga vörur framleiddar í Kína. Þó ég sé honum efnislega sammála, þó á fleiri forsendum sé, þá orkar það tvímælis flytjandi veðurfrétta á RÚV setji þar fram hápólitísk sjónarmið.

Í sjálfu sér er þeim geðþekka flytjanda veðurfregna sem setti fram þessa skoðun vorkunn, af því að fréttastofa RÚV, stjórnendur krakkafrétta og Kastljóss hafa ekki hikað við að taka pólitíska afstöðu til ágreiningsmála og flytja einhliða fréttir. Sök veðurfræðingsins er því síst meiri eða alvarlegri en annarra sem við fréttaflutning starfa hjá RÚV.

Fréttir, líka veðurfréttir eiga að vera hlutlægar og án pólitískra palladóma eða sjónarmiða viðkomandi fréttaflytjanda til að tryggja hlutlægni, en hefur ekkert með rétt viðkomandi aðila til að vera brennandi í pólitíska andanum. En sá verður að koma því á framfæri á öðrum vettvangi.

Sniðganga á vörum frá einu landi er alvörumál. Vörur frá Kína eru almennt ódýrari en vörur framleiddar annarsstaðar. Gæði þeirra eru yfirleitt í lagi. Það er því ekki á grundvelli almennra neytendasjónarmiða sem hvatt verður til sniðgöngu.   

Pólitíska veðurfræðin, sem hefur gert loftslagshlýnun af mannavöldum að trúarsetningu horfir til þess, að Kína brennir kolum meir en nokkur annar. Indland er ekki langt undan  og hvað með Indónesíu? Eigi að sniðganga vörur frá Kína er eðlilegt að spurt sé hvort það eigi ekki að gilda um vörur frá löndum sem haga sér með svipuðum hætti?

Miðað við mínar upplýsingar og þekkingu, hafa Kínverjar farið fram af meiri óbilgirni gagnvart náttúrunni en nokkur önnur þjóð. Miðað við okkar vinnulöggjöf og réttindi launþega, þá eru vinnuaðstæður í Kína nær þrælabúðum vinnustöðum á Vesturlöndum.

Fólk á Vesturlöndum hefur horft á eigendur fyrirtækja brytja þau niður og flytja til Kína eða Indlands, þar sem réttindi verkafólks eru engin. Þau skammtímasjónarmið sem þar ráða eru seld því verði að stórir hópar launþega missa vinnu og þjóðfélög Vesturlanda tapa þegar heildarhagsmunir eru hafðir í huga.

Það er með eindæmum að verkalýðshreyfing Vesturlanda skuli ekki hafa brugðist við og mótmælt og mótmælt og mótmælt því að réttindi sem hún og framsýnir stjórnmálamenn hafa náð fyrir vinnandi stéttir skuli eyðilögð með því að taka fyrirtækin og flytja þau þangað sem réttindalaust fólk framleiðir það, sem þjálfað hörkuduglegt starfsfólk á Vesturlöndum gerði  áður og fékk greitt að verðleikum fyrir vinnu sína. Allt til að hámarka gróða fjármagnseigenda á kostnað hinna vinnandi stétta.

Verkalýðshreyfing Vesturlanda brást. Stjórnmálaflokkar brugðust og fjötruðu sig í hugmyndafræði heimsviðskipta þar sem frelsi fjármagnsins ræður öllu, en réttindi hins vinnandi manns gilda ekki. Vinstri sinnaðir stjórnmálamenn hafa verið helteknir af þessari heildarhugsun og hefðbundnir hægri flokkar hafa verið njörvaðir í 18.aldar sjónarmið um frelsi fjármagnsins. Svo finnst þessum aðilum skrýtið að það sem þeir kalla pópúlíska hægri flokka sem vilja gæta heildarhagsmuna vinnandi fólks skuli vaxa ásmegin. 

Fjármagnseigendur Vesturlanda sem hafa svikið vinnandi fólk á Vesturlöndum horfa á það án þess að blikna sem og stjórnmálamenn Vesturlanda að við framleiðslu Kína og annarra sambærilegra landa er farið á svig við flest það sem við á Vesturlöndum teljum skyldu okkar að gera til að varðveita náttúruna og umgangast hana með virðingu.

Það er svo merkilegt að hvorki stjórnmálamenn né verkalýðshreyfing hafa lyft litla fingri eða mótmælt því að fjármagnseigendur hafi fullt og óheft frelsi til að eyðileggja atvinnu milljóna fólks,lítilsvirða áunninn réttindi verkafólks og valda óafturkræfri mengun náttúrunnar.

Frelsi fjármagnsins hefur ráðið á kostnað hagsmuna vinnandi fólks. Vinstra fólk á Vesturlöndum hefur ekki sinnt hagsmunum hins vinnandi manns í framleiðslustörfum. Það er síðan undrandi yfir því að hinar vinnandi stéttir skuli yfirgefa hina sósíalísku alþjóðahyggju þrælabúðann. Hefðbundnir hægri flokkar hafa líka brugðist bundnir á klafa sérhagsmuna fjármagnsins hafa þeir litið framhjá heildarhagsmunum þjóðfélagsins til að trufla ekki gleðileik eyðileggingar fjármagnseigenda á áunnum réttindum verkafólks á Vesturlöndum og vestrænum gildum mannúðar og virðingar fyrir náttúrunni. 

Athugasemdir

[Valdimar Samúelsson, 2.1.2017 kl. 11:57]

Ég hugsa að kínverska sendiráðið geri einhvað og þótt þetta hafi verið hlægilegt í fyrstu þá er þetta graf alvarlegt mál þegar ein þjóð talar svona til annara þjóðar. Smári til Trump og svo Borgarstjórn þegar þeir hótuðu Ísrael mönnum.  

[Jón Þórhallsson, 2.1.2017 kl. 16:34]

Fólk þarf ekki að verfa fanatískt í þessum málum og sniðganga allt sema ð kemur frá kína þó að fólk geti haft þessi mál á bak við eyrað næst þegar það það þarf að velja á milli hluta.

[Jón Magnússon, 2.1.2017 kl. 18:34]

Það kann vel að vera Valdimar. Það kemur þá bara í ljós. En það er alveg rétt hjá þér að það er ekki mikill mannsbragur að því að forsætisráðherraefni Pírata skuli yrða til Donald Trump með fjögurra stafa orðinu sem hann skilur og honum er tamast á engilsaxenskri tungu og hvatt sé til viðskiptabanns í fréttatíma ríkismiðilsins.

[Jón Magnússon, 2.1.2017 kl. 18:36]

Ég er almennt á móti sniðgöngu á vörum frá þjóðum. Það þarf ansi mikið að ganga á. Eins og ég sagði þá eru kínverskar vörur góðar og ódýrar. Það mæli á með þeim en hins vegar kemur ýmislegt annað á móti.

[Gunnar Heiðarsson, 2.1.2017 kl. 21:45]

Það er margt fleira í þessu sambandi, Jón.

Fyrir það fyrsta þá getur reynst erfitt að sniðganga vörur sem framleiddar eru í Kína. Ástæða þess er að erfitt getur verið að vita hvar varan nákvæmlega er framleidd eða íhlutir í hana. Á tæknisviðinu er sennilega útilokað að versla án þess að beint eða óbeint sé verið að versla við Kínverja.

Í öðru lagi greinir loftlagssérfræðinga á um þátt losun gróðurhúsategunda á hlýnun jarðar. Vitað er, í sögulegu samhengi, að hlýnun jarðar og aukið magn gróðurhúsaloftegunda fylgist að. Þetta er ótvíræð niðurstaða rannsókna á borkjörnum úr jökulhettum. Hins vegar greinir menn á um hvort sú aukning gróðurhúsaloftegunda sé orsök eða afleiðing hlýnunar lofthjúpsins. Vitað er að þegar freðmýrar þiðna, sem gerist auðvitað við hlýnun jarðar, losnar gífurlegt magn metangass úr jörðu. Væri kenningin rétt að gróðurhúsaloftegundir væru orsök hlýnunar, ætti þá auðvitað að hlýna út í hið óendanlega. Mun líklegri skýring, í það minnsta fyrir leikmann, er að þessu sé einmitt öfugt farið, að þessar loftegundir leiði til kólnunar. Alltaf þegar hlýnun hefur náð ákveðnu stigi, mun hlýrra en nú, hefur kólnað aftur.

Hægt er að fara nær í tíma, til þess er mælingar voru teknar upp. Ef skoðað er línurit yfir hlýnun jarðar frá ofanverðri 19. öld til dagsins í dag, svipað því er veðurfréttamaðurinn sýndi þjóðinni, kemur nokkuð merkilegt í ljós. Á tuttugustu öld hækkaði hiti jarðar verulega, eða um nærri 1,3 gráður. Ekki er þetta þó línuleg hækkun, heldur verður nokkuð skörp hækkun fram undir 1940, eða um 0,7 gráður, en þá kemur tímabil kólnunar allt fram undir byrjun níunda áratugar. Eftir það hækkar hiti aftur fram til dagsins í dag. 

Þetta er nokkuð merkilegt, þar sem varla geta menn haldið því fram að seinni heimstyrjöldin hafi verið sérlega hagstæð náttúrunni, hvernig sem á það mál er litið og í kjölfar hennar varð bylting í bílaeign íbúa jarðarinnar. Ekki voru bílar neitt sérlega sparneytnir eða mengunarfríir á því tímabili.

Þá má ekki gleyma þeirri staðreynd að sótagnir, sem eru yfirgnæfandi frá brennslu kola og annarra frumeldsneytisgjafa, ætti samkvæmt eðlilegum og auðskyldum rökum að leiða til kólnunar, þ.e. byrgja fyrir sólu. Allir hafa heyrt talað um kjarnorkuvetur og allir íslendingar ættu að þekkja sögu mikilla eldsumbrota og afleiðingar þeirra fyrir heimsbyggðina. Næst okkur liggja þar sennilega Skaftáreldar og sú hörmung sem varð um Evrópu í kjölfar þeirra.

Enginn efast um að það er að hlýna verulega á jörðinni. Vel má vera að mannkynið eigi einhvern þátt í þeirri hlýnun, nú eða að það hafi kannski haldið örlítið aftur af henni. Vísindamönnum greinir á um orsök, sumir nefna sólgos og hafa komið fram með gögn og kenningar því til staðfestu.

Meiri líkur eru þó á að mannkynið geti lítið að gert, verði einfaldlega að aðlaga sig að þessum breytta veruleika. Hvað sem því líður, þá getum við huggað okkur við að jöklar munu ekki hverfa, eins og sumum "sérfræðingum" er tamt að tala um,, þó þeir sannarlega minnki verulega. Varla hefðu vísindamenn getað fengið borkjarna úr Grænlandsjökli, sem ná langt aftur fyrir a.m.k. síðustu tvö súperhitatímabil í jarðsögunni, ef hann hefði horfið á þeim tímum.

Hitt er svo allt annað mál að mengun, hverju nafni sem hún nefnist, er aldrei af hinu góða og vissulega ber að fara vel með Jörðina okkar. Það virðist þó oft gleymast í umræðunni, þeir sem henni stjórna horfa gegnum rör á einn þátt, sem kannski skiptir minnstu máli.

kveðja

[Jón Magnússon, 3.1.2017 kl. 08:11]

Takk fyrir þetta innlegg Gunnar. Ég er þér sammála. En geri þó fyrirvara um þá hlýnun sem verið er að tala um á síðustu árum, þar sem það er ljóst að mælingar eru með nokkuð öðrum hætti en áður var t.d. meira mælt í þéttbýli og í nágrenni flugvalla o.s.frv. þar sem hitinn er almennt meiri en þar sem mælar voru aðallega áður.