Rafmagnsbílaaðallinn.

Rafmagnsbíllinn minn er orðinn eins árs og þetta ár hef ég ekki notað jarðefnaeldsneyti ekki einu sinni á sláttuvélina sem líka er rafmagnsdrifin. Samneyti mitt við bíl og sláttuvél hafa verið með ágætum þrátt fyrir að þau séu ekki knúin jarðefnaeldsneyti. 

Eitt fer þó í taugarnar á mér í þessu sambandi. Ríkisvaldið mismunar mér á kostnað annarra borgara, sem nota bensín eða olíur til að knýja farartæki sín eða annað áfram. 

Ríkið leggur gríðarlega skatta á bensín og olíur, en okkur rafbílaeigendum stendur til boða ókeypis rafmagn úr hraðhleðslustöðvum þar sem þær eru. Auk þess borgum við lægri aðflutningsgjöld og bifreiðagjöld. Er eitthvað réttlæti í því?

Það er alltaf hættulegt þegar ríkisvaldið fer að beita ávirkum aðgerðum til að breyta neysluvenjum fólks. Stutt er síðan fólk fékk umbun fyrir að kaupa díselbíla. Nokkru síðar kom í ljós að díselinn er mun verri en bensínið. 

Við rafbílaeigendur eigum að borga okkar hlut til veghalds og aðrir bíleigendur með hvaða hætti svo sem það kann að vera innheimt. Þá er glórulaust að hafa rafmagnið úr hraðhleðslustöðvunum ókeypis. Eðlilegt væri að fólk borgaði ákveðna upphæð t.d. fyrir tengingu og síðan mínútugjald. Það gjald mætti síðan nota til að byggja upp hraðhleðslustöðvakerfi hringinn í kring um landi með um 50 km. millibili. 

Hvernig væri t.d. að tengigjald við hraðhleðslustöð væri kr. 500 og síðan greiddu menn ekkert fyrir fyrstu 10 mínúturnar en þá kr. 50 á mínútuna næstu 10 mínutur og kr. 250 næstu 10 mínútur. Það væri alla vega sanngjarnt og gæti stuðlað að því að fólk væri ekki að hanga lengur í hraðhleðslustöð en brýna nauðsyn bæri til.   

 

Athugasemdir

[Halldór Egill Guðnason, 4.7.2017 kl. 18:18]

Hafðu þakkir fyrir þarfa ábendingu og réttláta, Jón. Um leið vil ég óska þér til hamingju með að vera fyrsti Íslendingurinn til að fara fram á auknar álögur, á þá þjónustu sem þú þyggur. Sanngjarnt, en ekki á hvers manns færi. Átt heiður skilinn fyrir þetta.

 Góðar stundir, með kveðju að sunnan.

[Ómar Ragnarsson, 4.7.2017 kl. 22:18]

Til hamingju með rafbílavæðingu þína.

Ég hafði ekki efni á því að eignast rafbíl og fór þá leið að fá mér tvö hjól, rafreiðhjól og létt 125cc vespuvélhjól sem kemst vel yfir 90 km hraða. Eyðslan 2,2 innanbæjar og 2,5 úti á landi og þegar kolefnisfótspor við framleiðslu, rekstur og förgun er borið saman við 10 sinnum flóknari og þyngri rafbíl er heildarútkoman líklega svipuð. 

Mér finnst að ljósi þessa ætti að ívilna svona hjólum á svipaðan hátt og rafbílunum, - eða að ívilna hvorugu. 

[Sigurpáll Ingibergsson, 5.7.2017 kl. 13:15]

Það eru fleiri sem gefa rafmagn en ríkisvaldið. Elon Musk sem á rafbílafyrirtækið Tesla hefur gefið eigendum fyrstu Tesla bílanna frítt rafmagn og er hann frjálshyggjumaður af hörðustu tegund.

http://fortune.com/2017/01/01/tesla-supercharger-extension/

Markmiðið hjá honum er að innleiða sjálfbærni í samgöngur. Þetta er því gulrót. Nú er hins vegar kominn stór viðskiptavinahópur og þá þurfa þeir að greiða fyrir orkuna en það er tvöfalt lægra en jarðefnaeldsneyti.

https://www.tesla.com/charging

Svo er hér áhugaverð liþínum-rafhlöðuverksmiðja sem mun geyma rafmagnið fyrir rafbílaaðalinn. https://www.tesla.com/gigafactory

[Ásgrímur Hartmannsson, 5.7.2017 kl. 20:42]

Blessaður vertu, þetta verður rokdýrt um leið og síðasti jarðefnaeldsneytisknúni bíllinn fer á safn.

[Valdimar Samúelsson, 6.7.2017 kl. 11:48]

Jón ég var einmitt að hugsa varðandi mismunun þegna á Íslandi. Hér höldum við uppi listamanna elítunni, borgum hundruðir miljóna í kvikmyndastyrki. Við leyfum íslenskum skipafélögum að skrásetja skip sín hvar sem er í heiminum en svona mætti telja upp.

Ef við tökum flugfélög þá verða þeir að skrásetja allar flugvélar á íslandi og eða gera sem er gott.