Snillingar stjórnsýslunnar

Fyrir allmörgum árum voru sýndir þættir í sjónvarpi, sem hétu "Já ráðherra". Ráðuneytisstjórinn Sir Humphrey Appleby gætti þess, að halda öllum völdum hjá sér. Flóknar setningar, orðskýringar, útlistanir og setningar sem höfðu enga merkingu eða þvældu málum svo, að enginn fékk skilið, náðu þeirri fullkomnun hjá Sir Humphrey að fáir töldu að met hans yrði nokkru sinni slegið. 

Nú hefur höfundur frumvarps til sóttvarnarlaga jafnað þessa fullkomnun Sir Humphrey. Í dæmaskyni um þessa snilli,skal vísað í skýringu orðsins "farsótt". En farsótt er:  

"Tilkoma sjúkdóms, ákveðins heilsutengds atferlis eða annarra atburða sem varða heilsu fólks innan samfélags eða landssvæðis, í tíðni sem er umfram það sem vænta má."

Orðskýring frumvarpsins er svo loðin og teygjanleg að hún opnar á möguleika ráðherra til að beita borgarana hvaða frelsisskerðingu sem frumvarpið heimilar m.a. útgöngubanni nánast að geðþótta.

Hvernig er hægt að verjast því að "aðrir atburðir sem varða heilsu fólks" komi upp í landinu eða séu stöðugt til staðar? Hvað er átt við með tíðni sem er umfram það sem vænta má? Já og hver er skilgreiningin á heilsutengdu atferli? og eru einhver takmörk eða frekari skýringar á fyrirbrigðinu "aðrir atburðir"?

Íslenskir Applebíar telja greinilega ekki rétt, að nota alþóðlegar viðmiðanir t.d. um lágmarksviðmið smita við skýringu á orðinu "farsótt", þó ekki væri nema til að takmarka aðeins valdheimildir og geðþóttaákvarðanir ráðherra, en það var sjálfsagt ekki meiningin.  

 

Athugasemdir

[Jón Þórhallsson, 29.11.2020 kl. 13:20]

Eins og allir vita að þá getur bara verið

1 heimareitur fyrir HVÍTA-KÓNGINN á venjulegum skákborðum.

Hvar á sá heimareitur að vera á skákborði raunveruleikans?

=Hver stendur næst "GUÐI" í dag?

=Hvar er sá fermeter hér á landi

sem að á að vera okkar tenging við "GUÐ?".

[Þorsteinn Siglaugsson, 29.11.2020 kl. 13:37]

Er ekki slæm flensa farsótt samkvæmt þessu? Og hvað með óvenjumikla svifryksmengun? Hún er atburður sem varðar heilsu fólks. Eldgos? Óveður? Og "það sem vænta má" er nú ekki beint skýrt viðmið.

[Jón Magnússon, 29.11.2020 kl. 15:45]

Jú það virðist allt vera opið skv. þessari skilgreiningu Þorsteinn. Atburður sem varðar heilsu fólks getur verið ansi margt eins og þú bendir á. Mætti ég bæta við t.d. hálka. Guð veðurviðvörun frá veðurstofunni er hætta sem vænta má og varðar heilsu fólks. 

[Jón Steinar Ragnarsson, 30.11.2020 kl. 05:02]

Erum við svo fátæk að við eigum ekki til opinberar skilgreiningar á svona hugtökum? Er það sett í hendur frumvarpshöfunda að búa til skilgreiningar eftir behag á þekktum hugrökum? Laga skilgrininguna eftir markmiði frumvarpsins í stað hins gagnstæða. 
Kanselínmálið er greinilega við góða heilsu.

Í minni sveit er svona kallað hringvöðvatjáning, svona til að segja það pent.

Í íslenskri nútímaorðabók er skilgreiningin einföld.: "Smitandi sjúkdómur, sem berst hratt út og smitar marga."

Ég hefði getað skrifað það sama án ráðfæringar við orðabók.

[Kristinn Bjarnason (IP-tala skráð) 30.11.2020 kl. 10:54]

Þetta kemur allt saman hægt og rólega. Það er ekki langt þangað til að það verður skilda að vera með læsingar á húsum sem er fjarstýrt af hinu opinbera. Það er of mikill samfélagslegur kostnaður af hálku. Þannig að það er gott að hafa einna aðila sem metur það hvort þér sé óhætt að fara úr húsi.