Ekki slaka á

Í síðustu sjónvarpsútsendingu sinni sagði sóttvarnarlæknir, að ekki væri ástæða til að slaka á sóttvarnaraðgerðum. Af hverju var þá ekki ástæða til að taka þær upp þegar ástandið var svipað að áliðnu sumri og það er núna?

Smit innanlands eru svo lítil, að það er full ástæða til að slaka á ef meiningin er að fólkið í landinu búi einhverntíma við venjulegt ástand. Miðað við ástandið erlendis er hinsvegar full ástæða til að gæta allrar varúðar í samskiptum við útlönd. 

Athyglisvert er að hlusta á veirutríóið og reiknimeistara þess viðhalda hræðsluáróðri og virðist ætla sér það út í það óendanlega. 

Þegar talað er um ástandið í nágrannalöndum okkar, þá gleymist að næstu nágannalönd eru Færeyja og Grænland. Hvernig gengur baráttan við veiruna þar? Í sjálfbirgingshætti okkar hættir okkur til að tala um að allt sé best og fullkomnast hjá okkur. En hvað þá með árangur Grænlendinga og Færeyinga. Er ekki rétt að skoða hann til viðmiðunar og er hann ekki eðlilegri samanburður en samanburður við milljónaþjóðir í nánu samabýli?

Stjórnmálamenn hafa vanrækt að setja almennar viðmiðanir varðandi sóttvarnir og viðbrögð við Kóvíd fárinu og þessvegna fara allar ákvarðanir eftir kenjum og geðþóttaákvörðunum eins manns og í besta falli tveggja. Stjórnmálamenn eru stikkfrí sem ábyrgðarlausir leikendur þó þeir beri á endanum pólitíska og siðferðilega ábyrgð á þeim ákvörðunum sem eru teknar þó þeir reyni til hins ítrasta að koma sér hjá þeirri ábyrgð. 

 

Athugasemdir

[Helga Kristjánsdóttir, 22.1.2021 kl. 14:57]

Sannarlega ástæða til að taka undir hvert orð sem þú ritar hér; Við erum einatt minnt á sérfræði kunnáttu þeirra sem stjórna,en sé ekki að hún nái yfir breitilegt ástand og samskipti okkar við útlönd.

[Jón Steinar Ragnarsson, 23.1.2021 kl. 02:56]

Það líður að kosningum og þá þorir enginn að taka ákvarðanir sem orka tvímælis. Betra að embættismenn taki skömmina þótt ábyrgðarfælni þeirra sé jafn slæm eða verri. Því er sem er. Afleiddur skaði og dauðsfföll eru ókey svo fremi sem hann er ekki af veirunni. Þetta er aðferðin að taka af hausinn til að losna við tannpínuna.

Í dag var ekkert smit í landinu, eitt í gær. Stefnan virðist vera að slaka ekki á fyrr en allir eru bólusettir og engin hætta á að nokkur veikist nokkurntíman. Jafnvel þótt enginn hafi skaða af, eins og verið hefur frá því fyrir mánaðarmót. Eitt prósend drepst þó af aukaverkunum bóluefnis, eins og er eða vel 6 sinnum fleiri en af veirunni. Aðeins 5000 hafa þó fengið þessa veiru frá upphafi, en það þarf að bólusetja 250.000. Það þýðir máske blóðtöku uppá 250 til 300 manns. Það verður skrifað hjá Guði.