Sigurvegararnir

Þann 17 júní 2020 fyrir 14 mánuðum var slegið upp veislu á Bessastöðum og forseti lýðveldisins hengdi æðsta heiðursmerki Íslands, fálkaorðuna í barm landlæknis, sóttvarnarlæknis og Víðis yfirlögregluþjóns fyrir að hafa unnið sigur á hinni illvígu Kóvíd veiru. 

Í kvæði Steins Steinars um Jón Kristófer Sigurðsson kadet í Hjálpræðishernum segir m.a.

"En syndin er lævís og lipur og lætur ei standa á sér".

Eins var farið með veiruna og syndina. Veiran reyndist lævís og lipur og aftur kom hún á fullri ferð tveim mánuðum eftir sigurhátíðina á Bessastöðum og hefur hrjáð landann síðan.

Einn sigurvegaranna sóttvarnarlæknir hefur skilað minnisblöðum til ráðherra og ríkisstjórnar, þegar honum hefur þótt mikið liggja við og ætíð hefur verið við brugðist og farið að minnisatriðum hans í öllum atriðum sem máli skipta. 

Í vor og sumar hófst nýtt áhlaup, bólusetningar, gegn veirunni og sigurstefið sungið dag hvern í Laugardalshöllinni og klappað fyrir veirutríóinu. Lúðraþeytarar þeyttu horn sín og skemmtikraftar létu til sín taka í hinni nýju sigurhátíð, þar sem engu skyldi eirt í baráttunni við hina lævísu veiru og allir bólusettir með illu eða góðu og veirunni útrýmt í eitt skipti fyrir öll. 

Enn á ný reyndist veiran samt lævísari og liprari og sat um mannanna heilsu og bar þann sigur af hólmi að smit fór í hæstu hæðir þó að fáir veikist og að enn á ný er hafinn hræðsluáróður m.a. af valinkunnu sæmdarfólki eins og Helgu Völu Helgadóttur alþingismanni, lögfræðingi,  sérfræðingi í veirufræðum en þó aðallega sérfræðingi í að fiska í gruggugu vatni.

Helga Vala Helgadóttir, lýsir því fjálglega í þætti á Hringbraut hversu lævís og lipurt nýja afbrigði veirunnar sé og helst var á henni að skilja, að einn heilbrigðisstarfsmaður þyrfti að sitja við rúmstokk smitaðs einstaklings nótt sem nýtan dag vegna ofskynjana sem fylgdi sýkingu af þessu afbrigði veirunnar. Raunar koma þessar staðhæfingar Helgu nokkuð flatt upp á þá sem hafa afskipti af þeim sem nú eru Kóvíd smitaðir. En sérfræðingi í sjónhverfingum verður allt að vopni.

Fáum kom á óvart að Helga Vala Helgadóttir vildi reyna að slá sig til pólitísks riddara á fölskum forsendum og freista þess að koma höggi á ríkisstjórnina. Afstaða og framganga ýmissa annarra kom meira á óvart.

14 mánuðum eftir að forseti lýðveldisins lýsti yfir sigri í baráttunni við veiruna rétt eins Bush jr. forðum í Írak, með orðunum "Mission accomplised" þótti forseta lýðveldisins við hæfi að afloknum ríkisráðsfundi, að snupra ríkisstjórnina eins og þar fari óþekkir krakkar fyrir að fylgja ekki ráðum sigurvegaranna orðum prýddu. Þrátt fyrir að ríkisstjórnin verði um margt annað sökuð með réttu en einmitt það.  Á sama tíma bregður krossriddarinn Víðir Reynisson yfirlögregluþjónn sér í hlutverk eins og talsmaður stjórnmálaflokks með gildishlaðinn pólitískan málflutning. 

Það er hægt að fyrirgefa Helgu Völu margt vegna þess að takmarkaðar kröfur eru til hennar gerðar um rökfastan málflutning raunar því miður eins og fjölmarga aðra alþingismenn.

Ýmsir aðrir eiga meira undir og á þá við hið latneska máltæki.

Nomina sunt odiosa.

 

 

Athugasemdir

[Helga Kristjánsdóttir, 7.8.2021 kl. 01:51]

 þessi hálfgerða afsökun vegna syndanna sem við fremjum,hrökk einhverju sinni upp úr mér í sumarvinnu hjá Vigdísi Jack,sem rak elliheimili í Kópavogsbæ. Þá kynntist eg fyrrverandi konu/kærustu Jóns-Kadet og áttu þau dreng saman.Ég sat oft hjá henni,þar sem hún þekkti allt mitt tengdafólk af Akranesi.- Jæja ég ætlaði að taka undir eiginlega allt sem þú skrifar,um leið og ég les ýkjusögu Helgu Völu um líðan sjúklings. Satt að segja er ég núna að sjá hvernig fólki lður eftir bólusetningar.Hringdi i vinkonu mína í gær sem var lögð inn eftir andnauð ofl.Elskulegt starfsfólk þar eins og við vitum, en þar hitti hún mág sinn sem féll í yfirlið,ekki sá eini sem ég þekki eftir sprautudrullið sem heldur ekki einu sinni vörn gegn smiti. Fyrirgefðu langlokuna og goðar stundir. 

[Jón Magnússon, 7.8.2021 kl. 11:23]

Takk fyrir innleggið Helga. 

[Þorsteinn Siglaugsson, 7.8.2021 kl. 11:54]

Ætli þessi forseti geri orðuhafa sína að einhvers konar hjáguðum? Þótt nú sé strategían öll búin að bregðast aftur og aftur og bersýnilegt orðið að endapunkturinn, bólusetningaherferðin, sé fjarri því að skila því sem til var ætlast, eyðileggingin á afkomu tugþúsunda og stórfelld truflun á námi og starfi barna og ungmenna til einskis, sprettur þá ekki þetta gerpi fram nú loks þegar ríkisstjórnin hefur áttað sig á gagnsleysi þess að elta ranghugmyndir orðuhafanna eins og hundur á eftir beini í spotta, og krefst þess að ráðaleysi hjáguðanna sé áfram látið ráða för.

Forsetaembættið hefur svo sannarlega náð nýjum lægðum, og var þó ekki úr háum söðli að detta.

[Jón Magnússon, 8.8.2021 kl. 10:01]

Takk fyrir innleggið Þorsteinn. Mér brá satt að segja í brún, þegar ég heyrði þessi dæmalausu ummæli forsetans og framsetningu gagnvart ríkisstjórninni. Nú er athyglisvert að sjá hverjir hamast nú gegn ríkisstjórninni og krefjast enn einnar lokunar á þjóðfélaginu. Þar er fréttastofa RÚV í fararbroddi og merkilegt nokk þar á eftir kemur yfirlögregluþjónn og forseti lýðveldisins. Enn halda sóttvarnarlæknir og landlæknir sig svolítið til hlés af hverju sem það nú stafar.