Stóraukin ríkisútgjöld, ávísun á verðbólgu.

Ríkisstjórnin hefur kynnt áætlun sína um að stórauka ríkisútgjöld. Útgjaldaaukninguna kallar ríkisstjórnin mótvægisaðgerðir vegna niðurskurðar þorskafla. Þetta er rangt.

Í fyrsta lagi hefur ríkisstjórnin ekki kannað hvaða þörf var á mótvægisaðgerðum vegna niðurskurðar á þorskafla og hverjir töpuðu vegna þess.

Í öðru lagi vegna skorts á þarfagreiningu þá eru meintar mótvægisaðgerðir ómarkvissar.

Í þriðja lagi þá er verið að leggja til gæluverkefna að hluta og hins vegar ávísa fjármunum sem óhjákvæmilegt var að gera en á vitlausum tíma í mörgum tilvikum.

Í fjórða lagi eru ýmis góð og gagnleg verkefni sem leggja á fjármuni til annað væri óeðlilegt þegar rúmir 10 milljarðar eru greiddir úr ríkissjóði. Þessi verkefni eru þó flest þess eðlis að það var ástæða til að bíða með þau meðan ofurþensla er á almenna markaðnum.

Í fimmta lagi koma til landsins 1200 innflytjendur á mánuði til að vinna eða um 15.000 síðustu 12 mánuði. Samt sem áður kalla fyrirtækin enn á meira vinnuafl. Það liggur því ljóst fyrir að ekki var þörf á að fjölga störfum í ofhituðu hagkerfi.

Í sjötta lagi þá er aðgerðum ekki beint til þeirra sem verða fyrir tekjusamdrætti vegna skerðingar þorskvóta.

Í áttunda lagi þá veldur svona mikil útgjaldaaukning úr ríkissjóði aukinni verðbólgu. Ríkisstjórn og Seðlabanki vinna því greinilega ekki saman.

Í níunda lagi þá hafa útgerðarmenn haldið því fram að vegna gjafakvótakerfisins þá hafi hagræðing og framlegð aukist gríðarlega mikið í sjávarútvegi. Fyrirtækin ættu því að geta tekið skammvinnum tímabundnum samdrætti án aðstoðar ríkisvaldsins með sama hætti og önnur fyrirtæki þurfa að gera verði samdráttur hjá þeim. Í því sambandi má minna á að boðaður samdráttur í þorskafla er til þess skv því sem ríkisstjórnin segir að þorskafli verði mun meiri á næsta ári og næstu árum. Aðgerðir hvað fyrirtækin í sjávarútvegi varðar voru því óþarfar miðað við það sem útgerðarmenn og ríkisstjórn hafa haldið fram.

Í tíunda lagi þá á velferðarkerfi að vera fyrir fólk en hvorki fyrir fyrirtæki eða sveitarfélög. Einu mótvægisaðgerðirnar sem þörf gat verið á snéri því að einstaklingum, fólki sem kunni að verða fyrir tekjusamdrætti en ekkert í tillögum ríkisstjórnarinnar snýr að því.

Með eyðslustefnu sinni sem minnir á gamaldags þrautreynda byggðastefnu 9 áratugarins á síðustu öld er ríkisstjórnin að kynda verðbólgubál, auka þrýsting á gengisfellingu krónunnar og auka ríkisútgjöld til muna. Reikna má með eftir þess aðgerð að opinber útgjöld á Íslandi muni nema um helmingi af þjóðarframleiðslu.

Skyldu forsætis- mennta og fjármálaráðherra vera búnir að taka fram söngkverið hennar Ingibjargar Sólrúnar þar sem er að finna ljóðið "Sovét ísland óskalandið hvenær kemur þú.?

Athugasemdir

[Magnús Þór Hafsteinsson, 13.9.2007 kl. 08:47]

Góð upptalning. Það er rangnefni að kalla þetta mótvægisaðgerðir. Þetta eru kvótakreppustyrkir í sósíalískum anda sem því miður munu ekki skila sér til þeirra sem missa afkomu sína í vetur.

Konkret það sem gera hefði átt fyrir sjávarbyggðirnar:

1. Það hefði verið nær að veita strandveiðiflotanum meira frelsi til að bjarga sér með því að kúpla tegundum eins og ýsu, ufsa, steinbít, löngu, keilu og skötusel út úr kvóta hjá þessum skipum.

2. Einnig gera kröfur um að fiskurinn færi á frjálsa uppboðsmarkaði þannig að fiskvinnslurnar gætu boðið í hráefnið.

Með þessu hefði verið ýtt undir dugnað og sjálfsbjargarviðleitni fólksins í sjávarbyggðunum.

Eitt sem ég velti fyrir mér. Hvar voru forsætisráherra Geir H. Haarde og sjávarútvegs- og landbúnaðarráðherra Einar K. Guðfinnsson þegar kvótakreppustyrkirnir voru tilkynntir í gær?

[Gísli Hjálmar Ólafsson (IP-tala skráð) 13.9.2007 kl. 15:23]

Eg spái því að ástandið á þorskstofninum fisk.v. árið 2008/2009 verði ekki betra en það er nú. Ráðgjafar Hafró (þorskur) áframhaldandi niðurskurður á veiðum. Ráðgjafar Hafró (loðna) áframhaldandi veiðar á loðnu. Niðurstaða: Óbreytt ástand og meiri niðurskurður á afla þorsks f.á. 2008/2009. EKG.hefði átt að hafa þorskkvótan 10-15% meiri og stöðva allar loðnuveiðar 2007/2008 sú ákvörðun hefði skilað sér ríkulega árið 2008. Ef næg loðna er til þá tvöfaldar 3. ára þorsku þyngd sína til 4. ára aldurs. (góð ávöxtun ekki satt) Heldur er farin sú leið sem hefur verið farin undanfarin ár. Neikvæð ávöxtun þorsks. Fisveiðiráðgjöfin óbreytt og áranur hennar sl. 20 ár er öllum kunnugur. kv. Gísli Hjálmar Ólafsson

[Magnús Þór Hafsteinsson, 13.9.2007 kl. 20:19]

Gísli hittir naglann lóðbeint á höfuðið og rekur hann á bólakaf. Akkúrat svona hefði ég farið að þessu.

[Ásthildur Cesil Þórðardóttir, 14.9.2007 kl. 11:53]

Ég held að þetta fólk, segi og skrifa, hafi ekki hugmynd um hvað það er að gambla með.  Þau hafa ekki hlustað á raddir sjómannanna kring um landið.  Þetta fólk, heldur að peningarnir verði til í Kringlunni og Smálalindinni.

[Sigurgeir Jónsson, 15.9.2007 kl. 10:49]

Eitthvað hafa menn lesið þessar tillögur Ríkisstjórnarinnar misjafnt.í þeim er akkúrat ekkert sem hægt er að túlka sem aðstoð við útgerðina.Á þetta hafa bæði Landsamband smábátaeigenda og LÍÚ bent.Enda á ríkisstjórnin ekkert að aðstoða útgerðina, hún tekur áhættu í sínum rekstri, það gera líka íslenskir sjómenn sem allir eru ráðnir upp á hlut , þeir taka áhættu með að starfa sem sjómenn.Hinsvegar hafa hvorki Landsamband smábátaeiganda né LÍÚ lagt það til að tegundir verði teknar úr kvóta, enda er veiðiþol þeirra allra nýtt til fulls.Menn geta að sjálfsögðu deilt um skötuselinn, hvort hægt væri að auka kvótann í honum um einhver tonn.Ef veiðin á honum væri aftur á móti gefinn frjáls, þyrfti að fara að loka svæðum vegna ofveiði á þorski.Það fer frjálslyndum þingmanni illa að boða aukin ríkisafskifti af sjávarútvegi.