Gleðilegt sumar.

Gleðilegt sumar.

Samkvæmt þjóðtrúnni á að vera gott sumar hér í Selásnum að minnsta kosti því að það fraus saman sumar og vetur.  Eftirminnilegasti sumardagurinn fyrsti var þegar ég var á barnsskónum og systir mín dró mig með sér í skrúðgöngu á Akranesi. Síðan var samkoma við gamla gagnfræðaskólann. Það var snjór og það var kalt. Ég spurði mömmu mína að því þegar ég kom heim af hverju það væri sumardagurinn fyrsti þegar það væri frost og snjókoma.  Svarið hefur vafalaust verið gáfulegt en barn sem var með athyglisbrest man það ekki rígfullorðinn mörgum áratugum síðar.

Nú er sem betur fer sumar og sól. Vonandi fáum við líka sólarstjórn eftir skammdegisstjórnina sem nú situr að völdum. Það þarf Frjálslynda umbótastjórn.

Gerum 12. maí að fyrsta sumardeginum í íslenskum stjórnmálum.

Athugasemdir

[Magnús Þór Hafsteinsson, 19.4.2007 kl. 12:14]

Voðalegar bölbænir eru þetta alltaf frá Vinstri græna manninum norðan heiða. Það er ekki einu sinni hægt að njóta sumardagsins fyrsta án þess að óska fólki norður og niður. Svona menn ala bara á hatri og úlfúð meðal íbúa Íslands.

[Jón Magnússon, 19.4.2007 kl. 12:28]

Nafna mínum er vorkunn. Hann virðist burðast með steinbarn í maganum gagnvart okkur Frjálslyndum. Ég vona að hann eigi gott sumar og njóti þess að vera til og átti sig á því að stefna okkar er þjóðholl stefna sem byggir á velferð allra landsins barna hvort heldur þau eru nýkomin eða innfædd. Sú þjóðhyggja sem ég tala um hafa formaður Framsóknarflokksins og frambjóðandi Vinstri grænna í Suðvesturkjördæmi tekið undir að öllu leyti í málflutningi sínum. Jón minn Kristófer þú ættir að athuga það. Lestu greinar flokksbróður þíns Ögmundar um þessi mál. Hvað segir þú um hann?