Leita í fréttum mbl.is

Bloggfærslur mánaðarins, september 2015

Mannúð og umburðarlyndi

Í hirðisbréfi biskupsins yfir Íslandi var hvatt til, að sem flestir úr hópi þeirra ólöglegu innflytjenda og flóttafólks sem streymir inn í Evrópu fái ævivist hér á landi. Páfinn í Róm hafði áður sent út samskonar hirðisbréf.

Evrópa er umfram önnur svæði á þessari jörð griðarstaður fyrir fólk á flótta vegna mannúðar og umburðarlyndis gagnvart mismunandi fólki og skoðunum. Mannúð og umburðarlyndi Evrópubúa er grunduð á hugmyndafræði kristinnar trúar. Þegar þessi hugmyndafræði mannúðar var þróuð af kristnum þjóðum voru þær tilbúnar til að verja sig og lífsskoðanir sínar. Þess vegna voru færðar fórnir þar sem milljónir týndu lífi í átökum við myrk ölf nasisma og kommúnisma.

Kristnar þjóðir Evrópu byggja enn á hugmyndafræði kristninnar. En þeir sem hirðisbréfin senda hirða ekki um að gæta hagsmuna trúarsystkina okkar og láta grimmdarverk villimanna bitna á þeim, án þess að rísa upp í sjálfsagðri vandlætingu með kröfu um að trúarsystkinum okkar sé veitt vernd hvort heldur það er í Sýrlandi, Írak eða annarsstaðar. Engin hópur trúaðra verður fyrir eins miklum ofsóknum og kristið fólk.

Í sumar var skipi með flóttamönnum bjargað á Miðjarðarhafi. Í ljós kom að kristna fólkið sem var um borð hafði verið drepið og kastað útbyrðis. Þrátt fyrir það tók hin umburðarlynda Evrópa á móti morðingjunum og veitti þeim griðland.

Í dag sækja hundruð þúsunda ólöglegra innflytjenda og tuga þúsunda flóttamanna til Þýskalands í kjölfar ruglanda Angelu Merkel. Af þeim eru um 40% Kosovo Albanar og önnur 40% Afganar. Flóttafólk frá Sýrlandi er í algjörum minnihluta. Í flóttamannabúðunum aðhyllist mikill meiri hluti þá trú sem heiminum og heimsfriðnum stendur í dag mest ógn af. Salafistar, öfgahópur þeirra trúarbragða sækir skipulega inn í búðirnar til að fá nýja liðsmenn.

Í nafni umburðarlyndis og mannúðar hefur hin kristna Evrópa hafnað því að það megi gera upp á milli fólks. Það má ekki veita kristnu fólki og Yasidum, sem eru í mestri hættu forgang.

Nýverið barst frétt þess efnis að árás var gerð á flóttahjón í flóttamannabúðum í Þýskalandi vegna þess að konan bar krossmark en hjörðin sem var í búðunum hafði ekkert umburðalyndi gagnvart því.

Hirðisbréf kirkju "leiðtoganna" nær ekki til og tekur ekki til eða setur fram tilmæli um að kristið fólk standi vörð um kristin gildi og hagsmuni kristins fólks og vísi burt fólki sem berst gegn grunngildum mannúðar og umburðarlyndis. Þessir kirkju"leiðtogar" fljóta því með ssama hætti sofandi að feigðarósi og íbúar Miklagarðs þegar Múslimaherirnir sóttu að borginni, sem lögðust á bæn í stað þess að verjast þó næg væru efni til þess.

 


Afmæli ógnarstjórnar

Ár er liðið frá því að ISIS samtökin hertóku stóra hluta Íraks og Sýrlands. Á þessu ári hafa samtökin framið ótölulegan fjölda hryðjuverka. Þau hafa drepið karlmenn og drengi í fjölmörfum þorpum og hneppt konur og stúlkubörn í þrældóm. Sérstaklega á þetta við um kristið fólk og Yasída. Kristin kirkja hefur að mestu látið þetta fram hjá sér fara og látið sem ekkert sé.

Stjórnmálamenn á Vesturlöndum hafa fordæmt ógnarstjórnina og Bandaríkjamenn og nokkur önnur ríki hafa verið með málamyndahernað á hendur þessum hryðjuverkasamtökum án þess að það hafi skipt nokkru máli. Í aðdraganda herhlaups Bandaríkjanna inn í Írak sýndu sjónvarpsstöðvar dag eftir dag lof- og flugskeytaárásir Bandaríkjanna, þar sem nákvæmnin var dásömuð. Ekkert slíkt sést í dag. Af hverju? Af því að þetta er ekkert sem máli skiptir.

Upplýst er að fyrir nokkrum árum bauðst Valdimir Pútín Rússlandsforseti til að leggja grunn að friðsamlegri lausn í Sýrlandi, en Frakkar, Bretar og Bandaríkjamenn höfnuðu því. Þau  vildu ekki styggja vini sína Saudi Araba, Katar og Tyrklandi sem bjuggu þessa borgarastyrjöld til og hafa fjármagnað hana. Borgarastyrjöldin í Sýrlandi er því fyrst og fremst á ábyrgð þeirra ríkja og rétt að þau takist á við afleiðingarnar en dumpi þeim ekki á aðra.

Í tilefni ársafmælis þess að ÍSIS komst á landakortið segir frá því í breska stórblaðinu Daily Telegraph í dag, að liðsmenn hins svonefnda frjálsa sýrlenska hers, sem Bandaríkjamenn hafa þjálfað og stutt seldu  vopn sín og tæki til hryðjuverkasamtakanna Jabat Al Nusra og gengu síðan sumir til liðs við þá.

Þegar horft er yfir svið blóðugra átaka í Mið-Austurlöndum undanfarin ár, þá getur maður tæpast varist þeirri hugsun að Bandaríkin og Bretland séu handbendi Saudi Araba og Katar og þau ríki hafi selt alla skynsemi í utanríkismálum og virðingu fyrir mannréttindum í höndum afturhaldskarlanna sem stjórna þessum ríkjum.

Í tilefni af því var vel við hæfi að Sameinuðu þjóðirnar með tilstyrk Banaríkjanna og Breta gerðu  Saudi Arabískan prins að yfirmanni í Mannréttindastofnun Sameinuðu Þjóðanna. En e.t.v. má minna á að óvíða eru mannréttindi svívirt meira en í Saudi Arabíu.

Það er ekki von að vel takist til þegar forusturíki Vesturlanda eru svona gjörsamlega viti firrt og hafa enga hugmyndafræðilega staðfestu.


Galandi geldhanar.

Stundum læðist að mér sá grunur að allt of margir hinnar nýja kynslóðar stjórnmálamanna þjóðarinnar hafi ruglast í ríminu. Þeir telja sig mun árhifameiri, valdameiri og mikilvægari en efni standa til. Svo mjög að þeir hætta til hagsmunum þjóðarinnar fyrir ímynduð áhrif á alþjóðavettangi.

Áhrif íslenskra stjórnmálamanna á alþjóðavettvangi eru nálægt núllinu. Með orðum, samþykktum og aðgerðum getum við miklu frekar pirrað heldur en haft nokkra þýðingu í alþjóðlegu samhengi eða á ákvarðanir annarra þjóða. Vanhugsaðar aðgerðir hinnar nýju stéttar sögulausra stjórnmálamanna eru iðulega til þess fallnar að skaða þjóðarhagsmuni þó ekki sé til neins annars unnið.

Gunnar Bragi Sveinsson utanríkisráðherra og utanríkismálanefnd telja það skipta máli að við eyðileggjum viðskiptasambönd okkar við Rússland svo að utanríkisráðherra geti farið oftar til Kænugarðs og fái e.t.v. klapp á bakið frá varautanríkisráðherra Bandaríkjanna. Engu máli skiptir þó sjávarfangsfólk á Fáskrúðsfirði og víðar um land tapi þriðjungi launa sinna.

Dagur B. Eggertsson og borgarstjórn Reykjavíkur telja það máli skipta að hætta að kaupa Soda Stream tæki sem framleidd eru í Ísrel og reita Gyðingasamfélag veraldarinnar til reiði án þess að samþykktin hafi nokkuð praktískt í för með sér. Það skiptir Dag B. Eggertsson og félaga hans ekki máli varðandi afkomu, en vinur minn sem hefur atvinnu af því að sinna túristum hefur þegar fengið nokkrar afpantanir. Dagur B. og félagar rýra tekjur þessa vinar míns um tugi prósenta og sjálfsagt margra fleiri.

Það er dýrt að vera með vonda stjórnmálamenn sem eru eins og geldhanar á haugi, sígalandi og vita ekki hvað það er sem skiptir máli.


Hallgrímur sálugi Pétursson og Gyðingahatur.

Hallgrímur sálugi Pétursson orti Passíusálma um pinu og dauða Jesú Krists. Kveðskapur Hallgríms hefur lifað með þjóðinni og  lesin í kirkjum landsins og víðar í aðdraganda Upprisuhátíðar Jesús. Þó margt af því orðfæri sem Hallgrímur sálugi notar sé æði fornt og torskilið mörgum nútímamanninum þá skilja flestir meininguna. Alltént er þetta hluti þess kristilega þjóðlega menningararfs sem við vonandi erum enn stolt af og viljum varðveita.

Nú hafa Gyðingar í andsvari sínu við ruglsamþykkt Dags B. Eggertssonar og meirihluta hans um viðskiptabann á Ísrael fundið það út að Hallgrímur sálugi hafi verið Gyðingahatari og það eigi við um þjóðina alla,  sem hafi kveðskap hans í þvísa hávegum að hann sé jafnvel lesinn upp dag eftir dag í sjálfu Ríkisútvarpinu.

Málflutningur þeirra sem halda þessu fram eru álíka vitlaus og samþykkt meirihluta borgarstjórnar Reykjavíkur. Hallgrímur sálugi Pétursson notar orðfæri og yrkir í samræmi við tíðarandann á þeim tíma sem sálmarnir eru ortir og það er ekki hægt að flytja þá til í tíma og lesa út úr því að þarna sé hatursumræða, sem hvergi er að finna.

Það er e.t.v. meiri ástæða fyrir Hallgrím Pétursson að koma núna og segja ekki meir ekki meir heldur en við húsameistara ríkisins, þegar Hallgrímskirkja var byggð, samanber samnefnt kvæði Steins Steinars.


Útfærslan er málið

Dagur B. Eggertsson borgarstjóri hefur viðurkennt að tillagan sem borgarstjórn samþykkti á síðasta fundi sínum um viðskiptabann á Ísrael var  rugl.  Vegna pólitískrar ruglhyggju í orðavali, sem borgarstjóra er töm segir hann að tillagan hafi ekki verið útfærð nógu vel. 

Tillaga um allsherjar viðskiptabann á þjóðríki er tillaga um allsherjar viðskiptabann hvaða útfærslu skortir? 

Borgarstjóri og Björk Vilhelmsdóttir tillögukona, telja að tillagan sé annars efnis en hún hefði átt að vera. Eða e.t.v. öðru vísi en þau hafi meint það, þótt tillagan væri orðuð og samþykkt af þeim, þá hafi þau í raun meint allt annað, en það sem tillagan fól í sér, vegna skorts á útfærslu, sem hafi orðið til þess, að tillagna hafi í raun ekki verið það sem þau vildu, heldur allt annað og hreinn óskapnaður, vegna skorts á útfræslu. Í grínþáttunum "Yes minister" talaði ráðuneytisstjórinn Humphrey Appelby iðulega með sama hætti þegar hann var kominn upp að vegg og í algjört þrot. Það var grínþáttur. Dagur er raunveruleikagrínþáttur.

Fyrst tillagan er nú þessi mikli óskapnaður og hin versta að mati borgarstjóra er þá ekki best að afturkalla hana með öllu á næsta fundi borgarráðs eins og hann hefur boðið. Nei ekki svo auðvelt segir borgarstjóri. Enn skal skarkað á marhnútamiðum og gera frekari útfærslu á viðskiptabanni á Ísrael. Eða eins og liggur í orðana hljóðan af hálfu borgarstjóra þá er ekkert að tillögunni sjálfri nema útfærslan og með breyttri útfærslu á viðskiptabanni á Ísrael þá ætti þetta að vera allt í lagi.

Er ekki betra Dagur B. Eggertsson að viðurkenna mistök og biðjast afsökunar og draga þetta til baka alfarið.

Fær ekki borgarstjóri og borgarstjórn góð laun til að rækja verkefni sín vel til hagsbóta fyrir borgarbúa. Ef svona einfalt mál þvælist fyrir vegna skorts á útfærslu hvað er þá um hin stærri og flóknari mál. Stjórnun borgar og lands er ekkert grín heldur alvörumál sem skiptir velferð og hagsmuni borgaranna máli. Það verður að hafa í huga þó að einhverjir hafi látið afvegaleiðast á langri vegferð grínarans Jóns Gnarr í stóli borgarstjóra þá kann ekki góðri lukku að stýra, að bæta um betur af borgarstjóra sem vantar gríntaugina sem Jón Gnarr þó hafði.

 


Evrópusambandið og aðild Íslands.

Friðarhugsjónin sem skóp Evrópusambandið var viturleg. Frakkinn Schumann og Þjóðverjinn Adenauer veltu því fyrir sér hvað þeir gætu gert til þess að koma í veg fyrir að æskulýð Evrópu væri att út í að drepa hverjir aðra með nokkra áratuga millibili. Þeir töldu að með því að viðskiptasamband þjóðanna yrði sem nánast þá væri það leið sem ætti að duga. Evrópusambandið þróaðist í framhaldi af því.

Evrópusambandið varð friðarbandalag aðildarþjóða og til þess að auðvelda viðskipti og önnur samskipti milli þeirra í því skyni að auka velmegun almennings. Þetta tókst. Síðan fóru menn lengra og með Mastricht sáttmálanum varð Evrópusambandið pólitískara en áður hafði verið og aðildarríkin fordjörfuðu meira af fullveldi sínu. Samt sem áður hafa margir talið nauðsynlegt að athuga hvort Ísland gæti gerst aðili að Evrópusambandinu og ég hef verið í þeim hópi.

Frjáls för einstaklinga innan Evrópusambandsins hefur verið erfið fyrir okkur og nauðsynlegt er að setja víðtækari tálmanir við því hvað smáþjóðir eins og okkur varðar en það er annað mál.

Nú er svo komið að talsmenn Evrópusambandsins telja sig hafa svo mikið vald að þeir geti beitt aðildarþjóðir refsiaðgerðum ef þær lúta ekki vilja þeirra þrátt fyrir að þær þjóðir hafi enga aðkomu að málinu eða það sé þeim að kenna. Þá hefur þýski kanslarinn tekið sér yfirvald alla vega í orði í bandalaginu og einhliða ýtt samþykktum varðandi Schengen til hliðar og atyrt þá sem héldu uppi landamæraeftirliti þó hún hafi nú tekið það upp sjálf. 

Hvort sem mér eða öðrum líkar betur eða verr þá er nú augljóst að við getum ekki framselt fullveldi þjóðarinnar svo sem Evrópusambandið og kanslari Þýskalands krefst. Öllum þjóðhollum íslendingum sem er annt um frelsi og fullveldi þjóðarinnar ætti því að vera ljóst að aðildarviðræður við Evrópusambandið þjóna ekki lengur tilgangi. Evrópusambandið er því miður ekki valkostur fyrir okkur. Þá liggur líka fyrir að taka þarf EES samninginn til endurskoðunar og gera grein fyrir að Evrópusambandið hefur ekki skipunarvald yfir Íslandi að geðþótta. Þá liggur nú líka fyrir að við eigum að segja okkur úr Shcengen samstarfinu og taka upp virkt landamæraeftirlit strax í dag.


Gyðingahatur?

Vinstri meirihluti borgarstjórnar Reykjavíkur hefur samþykkt að sniðganga vörur framleiddar í Ísrael svo lengi sem "hernám" Ísraelsmanna á landssvæði Palestínu varir".  Miðað við orðalag samþykktarinnar þá er sá skýringarkostur tækur að  vinstri menn við stjórn Reykjavíkurborgar vilji ekki hafa viðskiptaleg samskipti við Ísrael fyrr en landamærin frá 1967 hafa orðið til að nýju. Öllum er ljóst að þau landamæri verða aldrei virk aftur þannig að samþykktin tekur þá til viðskiptabanns á Ísrael um aldur og ævi miðað við orðalag tillögunnar.

Annar skýringarkostur á tillögu vinstri meiri hlutans í Reykjavík er þó e.t.v. nærtækari, þar sem þeir tala um hernám Ísraels á Palestínu.

Hvað er Palestína? Paelestína eða Filistaland, er allt það landssvæði sem núverandi Ísrelsríki tekur yfir og gott betur. Ber þá að skilja það svo að vinstri meiri hluti borgarstjórnar Reykjavikur hafi þá stefnu að Ísraelsríki hverfi af landakortinu og Gyðingar verði flæmdir burtu af því svæði sem nú heitir Ísrael. Miðað við orðalag tillögunar þá er nærtækast að skilja samþykkt meirihluta borgarstjórnar með þeim hætti.  

Vera kann að meiri hluti borgarstjórnar Reykjavíkur hafi ekki ætlað sér að samþykkja rasíska tillögu sem felur í sér megnt Gyðingahatur. Ég ætla þeim sem skipa meirihlutann það ekki, en orð geta verið dýr og samþykktin felur einmitt það sem að ofan greinir í sér.

Þó mörgum finnist framferði Ísraelsmanna ámælisvert t.d. varðandi Gasasvæðið, landnemabyggir, aðskilnaðarmúrin, hernám Vesturbakkans og ekki skuli hafa verið samið um sjálfstætt ríki Palestínumanna sem ég styð eindregið, þá er ekki hægt að horfa á Ísrael og Gyðinga með annarri mælistiku en aðrar þjóðir. Hvað t.d. með Katar og Saudi-Arabíu sem styðja hryðjuverkasamtök og eiga stóran hluta af stórverslunum Lundúnaborgar og ýmislegt fleira. Hvað með Kína eru þeir betri gagnvart Tíbet?

Vonandi hefur meiri hlutinn samþykkt þessa vitlausu tillögu í athugunarleysi, en þá má fella hana úr gildi á næsta borgarstjórnarfundi. Verði það ekki gert þá er ekki hægt að líta á það með öðrum hætti en þeim að vinstri meiri hlutinn í Reykjavík sé á móti sjálfstæðri tilvist Ísraelsríkis og hafi sérstaka andúð á Gyðingum. Þess vegna er óskandi að einhverjir í þessum meiri hluta sjái að sér og afturkalli þessa vitleysu.

 


Vér erum jarðarber sögðu lambaspörðin.

Björn Bjarnason fyrrum dómsmálaráðherra benti á það á heimasíðu sinni fyrir nokkru, að Tryggvi Gunnarsson umboðsmaður Alþingis hefði ekki tekist árum saman eða í rúm fjögur ár að afgreiða kvörtun vegna stjórnsýslu Seðlabankans. Þá hefur umboðsmaður látið fram hjá sér fara augljósa ágalla á stjórnsýslu eins og glórulausar ákvarðanir Steingríms J. Sigfússonar við ráðstöfun nýju bankana til kröfuhafa og ráðstöfun ríkisfjár til SpKef. VBS og fleiri fyrirtækja.

Athyglisvert er að vinnubrögð Umboðsmanns Alþingis eru ekki í samræmi við þær kröfur sem hann gerir til annarra um að mál gangi hratt fyrir sig. Raunar hefur Umboðsmaður haft uppi stór orð um seinagang annarra m.a. í skýrslu Rannsóknarnefndar Alþingis. Þau ummæli verða næsta brosleg þegar embættisfærsla hans sjálfs er skoðuð.

Þegar heimasíða Umboðsmanns Alþingis er skoðuð getur maður ekki varist þeirri hugsun að stofnunin sé algerlega stöðnuð og veldur þar sennilega mestu þráseta Trygga Gunnarssonar. Í skýrslunni kemur fram undir liðnum 10 síðustu mál afgreidd, kemur fram að aðeins 7 mál hafa verið afgreidd á þessu ári.  Umboðsmanni hefur þannig ekki tekist að afgreiða nema eitt mál á hverjum fimm vikum að jafnaði. Slík eftirtekja er vart ásættanleg hjá embætti með 12 manna starfsliði.

Umboðsmaður Alþingis hefur um árabil haft þann starfa að gagnrýna störf annarra opinberra starfsmanna og hefur margt gott verið gert í því efni. En það er aldrei gott að kasta steinum úr glerhúsi eins og því miður er um að ræða þegar embættisfærsla embættis Umboðsmanns Alþingis er skoðuð og slappleiki embættisins við að klára þau mál sem til embættisins er beint.

Í skýrslu Rannsóknarnefndar Alþingis fór Umboðsmaður Alþingis fram með slíkum gassagangi gagnvart ýmsum opinberum starfsmönnum og æðstu mönnum þjóðarinnar að ekki var hægt að álykta annað en hann teldi sig mannkostamann umfram aðra í þessu landi. Þegar nú er upp staðið og embættisfærsla hans sjálfs er skoðuð þá datt mér í hug ortakið um lambaspörðin sem þóttu þau svo einstaklega vel búin að þau sögðu "við erum jarðaber.


Þeir þvælast bara fyrir

Elín Hirst alþingismaður kvartar sárlega á fésbókarsíðu sinni yfir því að Ólafur Ragnar Grímsson og Davíð Oddsson sem og aðrir sem hún nefnir fyrrverandi stjórnmálamenn skuli tjá sig um mál og hafa skoðun. Af ummælum Elínar þingmanns virðist helst mega ráða að þeir sem komnir nokkuð yfir sextugt eigi þegar að fara í úreldingu og svipta beri þá tjáningarfrelsinu af því að svoleiðis fólk þvælist bara fyrir, þar sem það skilji hvort eð er ekki þjóðfélag dagsins í dag.

Athyglisvert var að sjá þegar farið var yfir störf þingmanna á síðasta þingi að Elín Hirst tjáði sig nánast aldrei. Hafði ekkert til mála að leggja. Ekki var það vegna þess að gamlir og úreltir stjórnmálamenn sem skilja ekki sinn vitjunartíma og átta sig ekki á nútíma stjórnmálum væru að taka tímann frá henni eða beittu ofurþunga sínum rasssíðir í pontu Alþingis. Eitthvað annað var þess í vegi að þingmaðurinn sá aldrei ástæðu til að taka til máls á þeim vettvangi eða tjá skoðanir sínar.

Ef til vill var þingmaðurinn ekki í réttum gallabuxum sem hæfðu tjáningu á hinu háa Alþingi.

En hvenær varð það stefna Sjálfstæðisflokksins að vera á móti tjáningarfrelsi allra borgara og miða við að það væri bara fyrir suma útvalda og hvenær hafnaði flokkurinn jafnræðisreglu stjórnarskrárinnar.

 


X Faktorinn

Varaformaður Sjálfstæðisflokksins, Hanna Birna Kristjánsdóttir, hefur áttað sig á því hvað það er sem veldur gengisleysi flokksins um þessar mundir. Í viðtali í morgunútvarpinu benti hún á ástæðuna sem er þessi að hennar mati:

"Það er einhver þriðji faktor. Það er einhver faktor sem við erum að gleyma,það er einhver x faktor. Einhver fegurð, það er einhver pólitík, ástríða, það er einhver hugsjón sem við erum ekki að fanga nægjanlega vel"

Skyldi stjórnmálaforingi hafa tjáð sig öllu skýrar um hugmyndafræðilegt inntak flokks síns og útfærslu. Líklega mun Landsfundur Sjálfstæðisflokksins í október n.k. snúast um að leita að x faktornum.

Kann að vera að Hanna Birna Kristjánsdóttir hafi höndlað þann stóra sannleik sem kínverski heimspekingurinn Konfúsíus mótaði í orðum forðum með þessum hætti

"Raunveruleg þekking felst í því að vita umfang eigin vanþekkingar".


Næsta síða »

Höfundur

Jón Magnússon
Jón Magnússon

Síðuritari er Hæstaréttarlögmaður og fyrrverandi alþingismaður.

 

Eldri færslur

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (19.3.): 201
  • Sl. sólarhring: 282
  • Sl. viku: 4791
  • Frá upphafi: 2267935

Annað

  • Innlit í dag: 187
  • Innlit sl. viku: 4426
  • Gestir í dag: 187
  • IP-tölur í dag: 181

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband