Nú og þá

1941 byrjuðu nasistar að fremja fjöldamorð á Gyðingum í Sovétríkjunum. Í einu tilviki höfðu nasistarnir myrt alla fullorðna Gyðinga í þorpinu Bjelaja Zerkow fyrir sunnan Kiev, en 90 Gyðingabörn undir fimm ára aldri höfðu verið skilin eftir án vatns eða matar. Tveir prestar annar kaþólskur en hinn mótmælandi reyndu að koma í veg fyrir að börnin yrðu myrt, en tókst það ekki. Öll börnin voru skotin til bana. Dapurleg er saga af einni lítilli ljóshærðri stúlku sem hélt í hendina á einum SS foringjanum meðan hún beið þess að vera skotin. Ekkert lík barnanna var svívirt frekar en lík foreldra þeirra og aðstandenda í Bjelaja Zerkow. 

Þegar morðæði og mannvonska nasistanna gagnvart Gyðingum var að lokum opinberuð 1945, fylltist allt fólk reiði og viðbjóði. Gjörðir nasistanna voru fordæmdar undantekningalaust. Engum datt í hug í London, París, New York, hvað þá Reykjavík, að fara í göngur til að samsama sig með nasistunum og fordæma hvað margir óbreyttir borgarar og börn, hefðu fallið vegna aðgerða bandamanna gegn nasistum.

Fólk velti því fyrir sér fyrir tæpum 80 árum hvernig gæti staðið á því ómanneskjulega óeðli og grimmd sem nasistarnir sýndu Gyðingum. Allir voru sammála um að þetta væri ómanneskjulegt villidýrseðli

Þ.7.október 2023 réðust önnur öfgasamtök, Hamas á 6 þorp í Ísrael og tónlistarhátíð ungs fólks. Hamas liðarnir drápu alla aðra en þá sem þeir tóku gíslingu með hroðalegum hætti og svívirtu lík þeirra. Þeir brenndu ungabörn lifandi og jafnvel steiktu þau, nauðguðu konum og fundu upp svívirðilegar sársaukafullar aðferðir við að drepa og niðurlægja fólkið. 

Eftir að þessi grimmdarverk fréttust, þá lét fordæming á þessu grimmdar- og villdýrsaðgerðum á sér standa ekki síst samtaka Sameinuðu þjóðanna. Ekki nóg með það. Farið var í hvatningar- og hátíðargöngur til að samsama sig með villidýrunum í Hamas og fordæma Ísrael í borgum eins og London, París, New York og Reykjavík.

Þegar þetta er skoðað þá getum við væntanlega spurt eins og þjóðskáldið."Höfum við gengið til góðs, götuna fram eftir veg." 

Thor Thors sendiherra Íslands hjá Sameinuðu þjóðunum sem átti mikinn þátt í að ná fram samþykki fyrir stofnun Ísraels hefði vafalaust óað við að sjá að til væri fólk á Íslandi sem teldi rétt að samsama sig með ofbeldinu og dýrseðlinu. Okkur á líka að óa við því og segja við ofbeldisfólkið fyrir framan Alþingishúsið, að það komi ekki til greina að verða við kröfum þeirra að einu eða neinu leyti miðað við núverandi aðstæður og allt sanngjarnt friðelskandi fólk biði nú eftir því að eftirlifandi gíslar Hamas verði leystir úr ánauð og sekum Hamas liðum refsað með sama hætti og þeim SS foringum og leiðtogum þriðja ríkisins í Þýskalandi var refsað fyrir glæpi sína gagnvart Gyðingum og glæpi gegn mannkyninu.

Það væri eðlilegra að farnar yrðu fjöldgöngur í Reykjavík, London, París og New York til að krefjast þess að ómennunum í Hamas yrði refsað og það fordæmt, að þeir skuli leyfa sér andstætt því sem nasistnarnir gerðu að skýla sér á bak við konur og börn, sem líða nú fyrir ómennsku þeirra og villidýrseðli.

Athugasemdir

[Ómar Geirsson, 23.1.2024 kl. 14:55]

Blessaður Jón.

Það er engu við þetta að bæta.

Sorglegt er að upplifa upphafningu villimennskunnar.

Samt finnst mér sorglegra að sjá heigulshátt þeirra sem eiga að verja gildin, en verja þau ekki.

Lágt er risið á borgarlegum íhaldsmönnum þessa dagana.

Höfuðlaus her.

Kveðja að austan.

[Bjarni Jónsson, 23.1.2024 kl. 18:00]

Þetta er frábær hugvekja og orð í tíma töluð.  Samanburðurinn er góður.  Forheimskun eykst með vaxandi falsáróðri. Í þessu máli er búið að hafa endaskipti á lygum og sannleika.  

[Jón Magnússon, 23.1.2024 kl. 18:18]

Þakka þér fyrir Ómar þetta innlegg og skelegg skrif um þessi mál. Ég er sammála þér að það sé lágt risið á borgaralegum íhaldsmönnum og raunar fleirum þessa daganna að hafa ekki allir sem einn krafist þess að tjaldbúðirnar á Austurvelli yrðu fjarlægðar og stæðu saman í fordæmingu á hryðjuverkunum. Afstaða Viðreisnar kemur mér mikið á óvart sem og Samfylkingarinnar.

[Jón Magnússon, 23.1.2024 kl. 18:18]

Þakka þér fyrir Bjarni

[Tómas Ibsen Halldórsson, 23.1.2024 kl. 21:29]

Þakka þér fyrir þinn góða pistil Jón og fyrir það að standa með sannleikanum eins og þú, Ómar Geirsson og fleiri hafa gert svo dyggilega.

Margir hafa því miður gert eins og Jesaja spámaður sagði fyrir um þ.e. að snúa hlutum á hvolf, að kalla hið góða illt og hið illa gott. Við lifum á tímum þar sem illsku og viðbjóði er hampað og sannleikurinn og kærleikurinn brotinn niður.

Ó að við sem þjóð mættum snúa okkur til Hans sem er friðarhöfðingi, Hans sem gefur okkur líf, líf sem nær fram yfir gröf, líf sem varir og ætti að vera okkur öllum eftirsóknar vert.

[Jón Magnússon, 24.1.2024 kl. 11:02]

Þakka þér fyrir Tómas. Það er með miklum endemum að sjá hve margir eru tilbúnir til að hlaupa á eftir lygunum og einhliða áróðri RÚV. En þar á bæ feta menn í fótspor Göbbels hvað það varðar að séu lygar endurteknar nógu oft þá fari fólk að trúa þeim.