Dagar ríkisstjórnarinnar eru taldir

Flestum er ljóst að dagar ríkisstjórnarinnar eru taldir.  Forsætisráðherra biðlar nú til stjórnarandstöðunnar um að koma að borðinu með henni, en það getur stjórnarandstaðan ekki gert að óbreyttu.

Með aðgerðarleysi varðandi stökkbreyttu höfuðstólana og með því að horfa aðgerðarlaus á þegar fjöldi einstaklinga eru reknir út af heimilum sínum og í gjaldþrot vegna okurlánanna hefur ríkisstjórnin tapað tiltrú fólksins í landinu.

Ríkisstjórnin hefur magnað upp reiðina í þjóðfélaginu og vantrú á stjórnmálamönnum með því að ákæra fyrrverandi forsætisráðherra. Þingmenn allir gerðust sekir um afglöp þegar þeir greiddu atkvæði með niðurstöðu Atlanefndarinnar þrátt fyrir að hún stangist á við heilbrigða skynsemi í ýmsum tilvikum.

Ríkisstjórn Jóhönnu Sigurðardóttur varð til eftir að Vinstri grænir og hluti Samfylkingarinnar kynntu undir mótmælum og aðför að ríkisstjórn Samfylkingar og Sjálfstæðisflokksins.  Ef til vill sannast hið fornkveðna. "Illur fengur illa forgengur"

Vandi í lýðræðisþjóðfélagi verður ekki leystur með öðru en lýðræðið fái að hafa framgang.  Sennilega er rétt að ákveða kosningar til Alþingis fyrri hluta næsta árs og fresta kosningum til stjórnlagaþings.

Athugasemdir

[Dagga (IP-tala skráð) 5.10.2010 kl. 00:23]

Þetta er að mestu leyti rétt mat hjá þér. Eitt sagðir þú þó sem lýsir ekki hug almennings en það varðar ákærur á hendur Geir Haarde. Þjóðin er ekki ósátt við að hann fari fyrir landsdóm. Hún er ósátt við að þeir fóru ekki allir fyrir dóm. Þarna glötuðu bæði sjálfstæðis- og samfylkingarþingmenn ansi mörgum kjósendum.

[Þorsteinn Valur Baldvinsson, 5.10.2010 kl. 08:12]

Sammála

[Kjartan Sigurgeirsson, 5.10.2010 kl. 08:55]

Ef þeir Bjarni Benediktsson og Sigmundur Davíð draga hræið að landi að óbreyttri stjórn og stefnu, held ég að þeir eigi ekki afturkvæmt í stjónmál.  Mér fannst á yfirlýsingu Jóhönnu í fréttum RÚV í gærkvöldi að hún vilji gjarnan draga þá með í svaðið.  Það má ekki gerast!

[Jón Magnússon, 5.10.2010 kl. 10:43]

Ég held Dagga að þegar meiri hluti Alþingismanna ákvað að ákæra Geir einan þá hafi orðið ákveðinn brestur í samfélaginu e.t.v. líka eftir að fólk horfði á umræður um málið og sá þau dæmalausu óheilindi sem um var að ræða við umræðurnar.

[Jón Magnússon, 5.10.2010 kl. 10:44]

Þakka þér fyrir það Þorsteinn

[Jón Magnússon, 5.10.2010 kl. 10:44]

Ég er sammála þér Kjartan.

[Gísli Ingvarsson, 5.10.2010 kl. 11:44]

Kosningar ef þær eiga að skila einhverju verða að koma strax fyrir jól. Ef ekki er hægt að stjórna landinu núna á þeim forsendum að það sé meirihluti á alþingi sem lýsir yfir trausti á ríkisstjórnina þá er gagnslaust að bíða fram á vor. Eftir hverju? Við kjósum ekki kreppuna burt. Fjárlög verður að samþykkja í einhverju skötulíki. Ef bjarga á heimilum sem nú eru á leið í gjaldþrot verður það ekki gert í vor eða næsta haust eða hvenær næsta ríkisstjórn hefur loksins sett sig inn í málin. Þetta held ég að forysta stjórnarandstöðunnar skilji. Það kemur á þá hik. Hvort hrökkva menn eða stökkva? ég tala ekki fyrir neinni ákveðinni lausn en ef stjórnarandstaðan getur ekki tekið yfir t.d. með róttæka hluta VG þá er óvíst að hún nái að sannfæra kjósendur. Það er löng leið að kjörborðinu og aldrei að vita hvað kemur upp úr kössunum. Bara eitt er víst að kreppan fer ekkert við það að kjósa, því miður.