Ramses III. og Móses

Fundist hefur merkisteinn Ramses III í norðvesturhluta Saudi Arabíu. Þessi fornleifafundur er merkilegur og sýnir að veldi Egypta hefur teygt sig allt austur til Saudi Arabíu á valdatíma Ramsesar III sem kallaður hefur verið síðasti mikli Faraóinn. Hann ríkti á árunum 1187 til 1156 fyrir Krist.

Ramses III þurfti að berjast við ýmsa en mesta baráttan var við fólkið sem kom frá sjónum eins og Egyptar kölluðu það, en þar gæti verið um að ræða fólk af grísku eyjunum sem flúði náttúruhamfarir og neyð eftir sprengigosið á Santorini sem hafði í för með sér hrun Krítversku menningarinnar.  Eftir að Ramses III hafði sigrað fólkið sem kom frá hafinu þá virðist sem tekist hafi að semja frið við það og þetta fólk nam land á strandsvæðum Palestínu.  Þetta voru Filistarnir sem mikið er talað um í Gamla Testamenntinu.  Raunar þýðir nafnið Palestína, Filista land.

Nokkuð góðar sagnfræðilegar heimildir eru um stjórnarár Ramsesar III og það liggur fyrir að Egyptar stjórnuðu á hans tíma auk Egyptalands allri Palestínu og sennilega stórum hluta Sýrlands og að því er virðist miðað við síðasta fornleifafund hefur veldi þeirra teygt sig á þessum tíma allt inn í Saudi Arabíu.

En hvar var þá Móses og Ísraelsmenn?  Miðað við sagnfræði og fornleifafræði hvar er þá pláss fyrir Móses og flótta Gyðinga frá Egyptalandi? Eyðimerkurgönguna í 30 ár o.s.frv.

Athugasemdir

[Mofi, 8.11.2010 kl. 23:32]

Hérna er ágætis grein með hugmyndir varðandi þetta, sjá: https://www.amazingdiscoveries.org/egypt-and-the-bible.html

[Jón Magnússon, 9.11.2010 kl. 08:54]

Þakka þér fyrir það. Þetta er ágætis grein þó hún orki að hluta til tvímælis sagnfræðilega.

[Mofi, 9.11.2010 kl. 09:54]

Það var lítið, aðeins áhugaverð hugmynd. Það er fátt sem orkar ekki tvímælis, fátt er þannig að allir eru sammála um það.

[Jón Magnússon, 9.11.2010 kl. 15:10]

Það er rét einkum hvað varðar sögu þessa svæðis á þeim tíma sem sögur Gamla testamenntisins taka til.  Hingað til hafa margir litið á Gamla testamenntið sem sagnfræðilega heimild.