Merkasti stjórnmálamaður seinni hluta 20.aldar fallinn frá.

Margaret Thatcher hafði hugsjónir og vissi hvert hún vildi stefna.  Þegar hún tók við völdum í Bretlandi var efnahagslífið í miklum erfiðleikum. Verkföll lömuðu þjóðfélagið aftur og aftur. Atvinnuleysi var mikið og fór vaxandi. Thatcher þurfti að beita óvinsælum ráðstöfunum sem bitnuðu á sérhagsmunum verkalýðshreyfingarinnar og ýmissa annarra en skiluðu sér í bættum hag alls almennings í landinu og auknum hagvexti.

Undir stjórn Margaret Thatcher breyttist Bretland úr því að vera verkfalls og óreiðuþjóðfélagið sem ekki var hægt að treysta,  í þjóðfélag, aga, skipulags hagvaxtar og framfara.

Hugmyndafræði Thatcher var ekki flókin. Draga úr ríkisrekstri. Virða mannréttindi. Draga úr skattheimtu.  Treysta meira á einstaklinginn en dauða hönd ríkisvaldsins.

Nú eru vestræn þjóðfélög komin fram að þeirri bjargbrún í ofurrekstri ríkisins og virðingarleysi fyrir einstaklingnum, getu hans og framtaki, sem Margaret Thatcher færði Bretland frá með aðgerðum sínum og stefnufestu.

Ísland þarf á því að halda að stjórnmálamaður með framtíðarsýn og einföld skír markmið um samdrátt í ríkiskerfinu, lækkun skatta, réttlæti og virðingu fyrir getu og hæfileikum einstaklinganna taki við völdum eftir næstu kosningar.

Annars heldur hrunadans íslenska samfélagsins áfram.

Athugasemdir

[Haukur Kristinsson (IP-tala skráð) 8.4.2013 kl. 13:59]

Ætla ekki að tjá mig um þær breytingar sem valdatími Thatcher hafði í för með sér.

En að virðing hennar fyrir mannréttindum hafi einkennt hana, vil ég draga í efa.

Vinátta Thatcher og fjöldamörðingjans Augusto Pinochet gerir þessa manneskju í mínum augum fyrirlitlega og Bretum til ævarandi skammar.

[Orri Ólafur Magnússon (IP-tala skráð) 8.4.2013 kl. 20:49]

Sæll Jón, ekki eru allir jafn sannfærðir um ágæti M.T. og þú virðist vera. Bretland stendur höllum fæti  í alþjóðlegum samanburði.  Iðnaður  stendur t. a. m.  ekki nema undir 12% tekna landsins  samanborið við > 25% hjá Þjóðverjum. Breski banka - og fjármálageirinn er aftur á móti stokkbólginn Þetta er ekki svo  glæsileg arfleifð eða til eftirbreytni , finnst mér .   

[Jón Magnússon, 8.4.2013 kl. 22:48]

Haukur stundum er sagt "politics makes strange bedfellows." Þannig þurfti Churchill að semja við Stalín til að vinna bug á nasismanum. Ingibjörg Sólrún að sækja einræðisherra heim og vingast við þá vítt og breitt um veröldina þegar hún vildi að við færum í Öryggisráð Sameinuðu þjóðanna. Pinochet studdi Breta minnir mig í Falklandseyjadeilunni og þannig varð hann Bretavinur.

[Jón Magnússon, 8.4.2013 kl. 22:49]

Þetta er ekki arfleifð Margaret Thatcher, Orri. Þetta er arfleifð Tony Blair og Gordon Brown. Ástandið var allt annað þegar Thatcher lét af völdum.