Prófkjör og verðtrygging

Ég þakka öllum þeim sem hafa hvatt mig til að gefa kost á mér í prófkjöri Sjálfstæðisflokksins í Reykjavík vegna komandi Alþingiskosninga. Niðurstaða mín varð samt sú að gera það ekki af ýmsum ástæðum.

Þessi ákvörðun breytir engu um pólitískan áhuga, skoðanir, áherslur eða baráttu fyrir réttlátu þjóðfélagi.

Mikilvægasta réttlætismálið er að fá réttlát, sanngörn og eðlileg lánakjör fyrir fólk og fyrirtæki. Mikilvægast í því sambandi er að afnema verðtrygginguna af lánum til neytenda.

Lausastök í efnahagsmálum þjóðarinnar sem valda m.a. hárri verðbólgu stafa ekki síst af því hvað auðvelt er vegna verðtryggingarinnar að velta óstjórninni yfir á almenning í landinu.

Landsfundur Sjálfstæðisflokksins samþykkti án mótatkvæða að afnema verðtryggingu á netyendalánum. Þingflokkur Sjálfstæðisflokksins hefur haft þessa ályktun að engu. Þessi afstaða þingflokksins hefur valdið mér vonbrigðum.

Miðað við það hvernig mál skipast í störfum á  Alþingi og þingflokka tel ég auðveldara að sinni að berjast fyrir þessu réttlætismáli utan þingflokksins en innan hans.

Athugasemdir

[Sigurður (IP-tala skráð) 2.11.2012 kl. 20:08]

Eru ekki alveg ágætis líkur á að verðtryggingin sé að fara sömu leið og gengistryggingin fyrir dómstólum...

Manni sýnist margt benda til þess.

[Sigurður Þórðarson, 3.11.2012 kl. 10:03]

Gjáin milli þings og þjóðar hefur ekki verið brúuð.

[Jón Magnússon, 4.11.2012 kl. 11:44]

Ég er ekki trúaður á það Sigurður.

[Jón Magnússon, 4.11.2012 kl. 11:45]

Er einhver gjá. Fólkið kýs þingmenn. Fólkið velur þingmannsefni í prófkjöri. Ef það er gjá þá er fólk að velja þingmannsefni á einhverjum fölskum forsendum.

[sæmundur (IP-tala skráð) 4.11.2012 kl. 14:13]

Góðan daginn

Mér finnst allir láta eins og óverðtryggð lán taki ekki mið af verðbólgu .

Að sjálfsögðu er verðbólga stór þáttur í verðlagningu óverðtryggðra lána

Ég held að ef að hækkun verðbóta á höfuðstól lána væri takmörkuð við t.d. 3 % þannig að

Hagsmunir fjármálafyrirtækja væri að halda veðbólgu niðri þá mundi ástandið fljótt batna

í dag hækka eignasöfn fjármálafyrirtækja í verðbólgu svo einfalt er það

[Sigurður Þórðarson, 4.11.2012 kl. 14:55]

Ég veit svei mér ekki hverju maður á að trúa. Nýlega las ég Facebook athugasemd frá góðgjarnri konu sem vildi styðja  Pétur Blöndal, vegna þess að hún treysti honum best til að berjast gegn verðtryggingunni.  .  Hinu er ég algerlega sammála að við eigum öll að taka þátt í prófkjörum og kosningum eins og við höfum burði til. Sjálfur hefði ég stutt þig ef sá kostur hefði verið í boði.

[Jón Magnússon, 4.11.2012 kl. 23:49]

Það er einmitt eitt af vondu málunum Sæmundur það eru aðilar m.a. fjármálafyrirtæki sem græða á því að hafa kerfið svona. Verðtryggðu lánin eru óhagkvæmustu lán fyrir neytendur í okkar heimshluta.

[Jón Magnússon, 4.11.2012 kl. 23:49]

Pétur Blöndal er einn helsti verjandi verðtryggingarinnar.  Þakka þér fyrir að öðru leyti Sigurður.