Verndarar sjálftökuliðsins

Guðlaugur Þór Þórðarson alþingismaður bendir á það í Morgunblaðsgrein í gær að laun slitastjórnarmanna hafi hækkað úr 16.000 krónur á klukkustund í 35.000 á 4 árum eða um tæpan helming. Þá bendir Guðlaugur Þór á það með glöggum hætti að slitastjórnir heyra undir eftirlit Fjármálaeftirlitsins og ríkisvaldinu í lófa lagið að taka í taumana og stöðva sjálftöku slitastjórnarfólks,  ef vilji væri fyrir hendi.

Frá því í janúar 2010 og allt til þessa dags hefur þetta mál ítrekað komið til umræðu á Alþingi og jafnan hefur Steingrímur J. Sigfússon fordæmt sjálftöku slitastjórnanna og hvatt til aðgerða. Aðgerðirnar heyra raunar undir hann og hann getur haft frumkvæði í málinu en gerir það ekki eins og Guðlaugur Þór bendir réttilega á.

Í bloggfærslu 27.9.2012  http://jonmagnusson.blog.is/blog/jonmagnusson/entry/1259678/

benti ég sérstaklega á þá svívirðu sem hér væri á ferðinni og hvernig þau Steingrímur J. Sigfússon, Jóhanna Sigurðardóttir og fyrr Gylfi Magnússon hefðu í raun gerst verndarar sjálftökuliðsins. Þau hefði látið undir höfuð leggjast að taka á málinu.

Enn viðgengst sjálftaka slitastjórna þar sem fólk hækkar laun sín að vild og beinir viðskiptum til eigin fyrirtækja án þess að eftirlitsaðilinn eða ráðherra láti sig málið varða nema með því að gelta á Alþingi.

"Alþýðuforingjarnir" Jóhanna og Steingrímur J. hafa því í verki gerst verndarar sjálftökuliðsins. Gott væri ef "alþýðuforingjarnir" hefðu bætt kjör fólksins í landinu með sama hætti og laun sjálftökuliðsins, en því miður njóta almennir sjálfstæðir atvinnurekendur og launþegar ekki sömu náðar.

Athugasemdir

[Þórir Kjartansson, 7.12.2012 kl. 10:26]

Eru þetta bar ekki taxtar lögfræðinga, Jón?  Þú hlýtur að þekkja þá sem hæstaréttarlögmaður.  Svo hélt ég nú að þú og Guðlaugur Þór væruð ekki talsmenn þess að stjórnvöld væru með puttana í verðlagningu á vörum og þjónustu.   -   En auðvitað er ég alveg sammála inntaki færslunnar þinnar.

[Erlingur Alfreð Jónsson, 7.12.2012 kl. 10:40]

Þessi hringavitleysa verður náttúrulega að fara taka enda.

En er ekki vandamálið að slitastjórnir eiga að vinna að því að tryggja áframhaldandi viðskiptabankastarfsemi gömlu bankanna skv. ákvörðunum FME um skipan skilanefnda frá því í október 2008? Eru ekki hendur þeirra þar með svolítið bundnar? 

Að mínu mati er FME og ríkisvaldinu einnig í lófa lagið að binda enda á þetta nauðasamningaþras og hreinlega segja kröfuhöfum hvað þeir fái út úr þrotabúunum, í krónum, og enda þar með þessar vangaveltur um allar snjóhengjur.  Felli kröfuhafar sig ekki við slíkan Salomónsdóm gilda ákvæði gr. 103.a. um lok slitameðferðar, þ.e. nauðasamningar tókust ekki, og þrotabúin fara í hefðbundna gjaldþrotameðferð.  Þá er spurning hvað þeir bera úr býtum.

[Sigurður Þórðarson, 7.12.2012 kl. 16:33]

Er ekki einmitt þjóðhagslega hagkvæmt að vogunarsjóðirnir greiði rífleg laun til þjónustufulltrúa sinna, sem greiða skatta hérlendis?

[Elle_, 7.12.2012 kl. 17:37]

´Alþýðuforingjarnir´ er gott háðsyrði yfir þessa foringja ´ríkisvæðingar fjármálalífsins´, Jón.  Þau unnu aldrei fyrir, heldur beinlínis gegn, alþýðu eftir að þau komust í stjórn.

[Halldór Egill Guðnason, 8.12.2012 kl. 05:54]

Hvað er þetta annað en VIÐBJÓÐUR?

[Jón Magnússon, 8.12.2012 kl. 12:32]

Lögmenn hafa hver sína gjaldskrá og mega ekki hafa samráð um taxta frekar en almennt gildir um samkeppnsatvinnurekstur.  Þó ég vilji afskipti ríkisins sem minnst þá er hér um sérstakt atriði að ræða. Slitastjórnirnar voru skipaðar í framhaldi af beitingu neyðarlaga.  Ég vildi þá að þær kæmu að málum sem stjórnir fjármálafyrirtækja sem bankaráð en það fannst mönnum á þeim tíma of dýr leið og völdu leið sem eru margfalt dýrari. Svo er þetta opinbera kerfi Þórir þannig að menn gera nánast það sem þeim sýnist sem iðulega fer í bág við samkeppnislög fyrir utan svo margt annað. Steingrímur og Jóhanna hafa iðulega talað um nauðsyn þess að taka á þessari óværu, en síðan gerist ekkert.  Þetta aðgerðarleysi er það sem verið er að vekja athygli á Þórir.

[Jón Magnússon, 8.12.2012 kl. 12:32]

Alveg sammála Erling

[Jón Magnússon, 8.12.2012 kl. 12:33]

Það er aldrei í lagi að hlutirnir séu á skjön við eðlilega starfsemi í þjóðfélagi Sigurður.

[Jón Magnússon, 8.12.2012 kl. 12:33]

Takk fyrir það Elle.

[Jón Magnússon, 8.12.2012 kl. 12:34]

Ég held að það sé einmitt nafnið sem á að gefa þessu Halldór.

[Sigurður Þórðarson, 8.12.2012 kl. 14:37]

Kannski frekar spurning hvort eitthvað hafi yfirhöfuð verið eðlilegt við þessa bankastarfsemi?