Nýr meirihluti í Reykjavík.

Ég óska nýjum borgarstjóra til hamingju og óska honum velfarnaðar í störfum sínum.

Sjálfstæðismenn hafa sýnt að þeir eru tilbúnir til meirihluta samstarfs við hvern sem er nánast á hvaða grundvelli sem vera skal einungis ef þeir eru í valdaaðstöðu. Sú breyting hefur orðið á Sjálfstæðisflokknum á langri vegferð fyrst undir stjórn Davíðs Oddssonar og síðan að hann er fyrst og fremst valdaflokkur sem metur meira völd en framtíðarlausnir í íslenskum þjóðmálum.

Í viðtali við þá Ólaf F. Magnússon verðandi borgarstjóra og Vilhjálm Vilhjálmsson fyrrverandi borgarstjóra í útvarpinu í morgun voru þeir að því spurðir hvort meirihlutinn væri nægjanlega traustur miðað við að Margrét Sverrisdóttir hefði lýst yfir andstöðu við þennan nýja meirihluta. Margrét er jú varamaður Ólafs. Þeir töldu báðir að það væri ekki vandamál og hinn nýi borgarstjóri orðaði það með þeim hætti að það ætti eftir að skipa í nefndir og var á honum að skilja að hann teldi ólíklegt annað en fá mætti Margréti til fylgilags við þá félaga með því að bjóða henni góða bitlinga á vegum borgarinnar.  Það á hins vegar eftir að koma í ljós hvernig Margrét bregst við. Nú reynir á það hvort Margrét er til sölu svo sem skilja mátti á Ólafi  F. Magnússyni. Haldi Margrét hins vegar fast við andstöðu sína þá er nýi meirihlutinn vægast sagt í vanda staddur.

Ólafur F: Magnússon var valinn af Frjálslynda flokknum fyrir síðustu borgarstjórnarkosningar til að leiða lista flokksins í Reykjavík. Margrét Sverrisdóttir skipaði annað sætið. Bæði hafa þau sagt skilið við flokkinn og eru því hvorugt á ábyrgð Frjálslynda flokksins. Margrét gekk í annan stjórnmálaflokk og er þar varaformaður en Ólafur hefur ekki gefið endanlega upp stöðu sína.

Formaður Frjálslynda flokksins hefur bent á að við erum flokkur sem berst á málefnalegum grundvelli og hann lýsti því yfir að hann væri ánægður með að nýi meirihlutinn hafði ákveðið að taka upp helstu málefnaáherslur Frjálslynda flokksisns frá því fyrir síðustu borgarstjórnarkosningar. Frjálslyndi flokkurinn getur hins vegar ekki lýst yfir stuðningi við nýjan borgarstjóra eða borið nokkra ábyrgð á honum pólitískt eða starfslega nema hann taki til starfa innan flokksins í fullu samráði við Frjálslynda í Reykjavík.

Athugasemdir

[Ólína Kjerúlf Þorvarðardóttir, 22.1.2008 kl. 11:22]

Þetta er augljóslega vandræðamál. Ég lít svo á að borgarstjórn Reykjavíkur sé óstarfhæf. Setti inn færslu um það mál í gærkvöldi.

[Hjörtur J. Guðmundsson, 22.1.2008 kl. 11:29]

Og það hefur vitanlega ekkert með þínar eigin pólitísku skoðanir að gera, Ólína. Algerlega hlutlaust mat þar á ferðinni auðvitað ;)

[Anton Þór Harðarson, 22.1.2008 kl. 12:38]

Jón ég held að það séu tvær tegundir af stjórmálmönnum, önnur gerðin er sú sem er ákveðin í aðhafa völd, því að það er það eina sem gefur stjórnmálamanninum tækifæri og möguleika á að koma sínum stefnu og áhugamálum í framkvæmd, en vitanlega verða slíkir stjórnmálamenn alltaf umdeildir, því aldrei er hægt að gera svo öllum líki, en fólk sem hefur sterkar skoðanir og er tilbúið til að berjast fyrir þeim, lætur sig hafa það að taka þann slag.

síðan er hinn flokkurinn sem talar mikið, en framkvæmir lítið, því að þeir vita að framkvæmdagleði gæti orsakað atkvæðatap, Þeirra valdtíð fer mikið í "umræðustjórnmál" því að í umræðunni felast engar áhvarðanir sem gætu reynst óvinsælar og leitt til atkvæðataps. En með nógu mikilli umræðu er möguleiki á að slá riki í augu fólks og vona að einhverjir glepist til að taka þá alvarlega.

Ég er sannfærður um að núverandi meirihluti er í fyrri hópnum og sá gamli í þeim seinni.

[Kristófer (IP-tala skráð) 22.1.2008 kl. 13:11]

Sæll Jón, Er ekki rökréttast að Frjálslyndir, í ljósi þess að 70% af málefnalista nýja meirihlutans eru baráttumál Frjálslyndra, hefji viðræður við Ólaf F. um að hann komi til baka í Frjálslyndaflokkinn þar sem hann á heima? Eða ert þú Jón fyrirstaðan sem kæmi í veg fyrir það?

Bkv, Krissi

[Helga Dóra, 22.1.2008 kl. 18:37]

Ein spurning frá mér sem hef lítið vit á pólitík... Langar að vita hvernig nokkur maður sem er búin að rembast við að komast til vald og ekki fengið atkvæði borgarbúa til þess,,,, getur hugsað sér að setjast í borgarstjórastól og til að stjórna borgarinni???? Vitandi það að fæstir borgarbúar vilja hann í stólinn. Er þetta ekki doldið halló????

[Gísli Baldvinsson (IP-tala skráð) 22.1.2008 kl. 20:00]

Þetta er drengileg afstaða Jón, sem og ég gerði ráð fyrir. Af sögulegu samhengi eru litlar eða engin tengsl milli Frjálslyndaflokkinn og F-listann í Reykjavík. Mér varð hálfbrugðið þegar einn af fyrrverandi þingmönnum Frjálslyndra bókstaflega bauð Ólafi F. formannssætið og undir það var tekið af ofurbloggaranum Jens, sem ég held að teljist til forystumanna Frjálslyndra a.m.k. að eigin mati.

Verknaðurinn - er ógeðfelldur og ekki furða að VÞV var kallaður fyrir áraáratugum - Villi plott.

[Júlíus Valsson, 22.1.2008 kl. 22:11]

"Sjálfstæðismenn hafa sýnt að þeir eru tilbúnir til meirihluta samstarfs við hvern sem er nánast á hvaða grundvelli sem vera skal einungis ef þeir eru í valdaaðstöðu."

Hvaða, hvaða Jón! Ólafur F. er nú ekki hver sem er!

[Halldór Jónsson, 22.1.2008 kl. 22:34]

Getur Ólafur F. ekki losnað undan því að hafa Margréti þessa sem sinn varamann ?. Hvað ef hann gengi í borgarstjórnarflokk Sjálfstæðismanna, án þess að ganga í Sjálfstæðisflokkinn ?  Hver yrði þá varamaður hans ?

[Guðrún Þóra Hjaltadóttir, 23.1.2008 kl. 00:44]

Mér finnst staðan mjög sérkennileg. Ég vona svo sannanlega að Ólafur F. haldi heilsu og standi sig vel.

Eins og þú segirJón þá er hvorki Ólafur F. né Margret í FF. Ég skil ekki alveg Kristófer af hverju Jón ætti að standa í veginum fyrir því að Ólafur kæmi í FF. Hann er tiltölulega nýlega búin að segja sig úr flokknum og af hverju ætti hann að vilja koma aftur? Það var engin sem rak hann úr flokknum, fylgdi hann ekki bara Margreti?

Ég óska Ólafi F. og Vilhjálmi til hamingju með þessa ákvörðun, þar er ég sammála þér Jón.

[Júlíus Már Baldursson (IP-tala skráð) 23.1.2008 kl. 03:20]

Mér sýnist nú á öllu að Framsóknarflokkurinn sé ekkert betri en Sjálfstæðisflokkurinn í þessu sama sem þú ert að benda á Jón.

Hann virðist ekki vera síður auðkeyptur ef hann kemst til valda......hvernig hefur Ríkisstjórnin verið hér á landi árum saman?
Með Framsókn innanborðs og þeir ætluðu sér að halda áfram samstarfinu eftir síðustu kosningar.Fóru svo bara í fílu og urðu reiðir þegar hinir vildu ekki treysta á svo lítinn meirhluta.Hvað gerði svo framsóknarmaðurinn eftir síðustu borgarstjórnarkosningar?Og 17 mánuðum síðar?Hvað var hann svo að spá í í vikunni?Að hætta í Framsókn vegna innandeilna.Þó ég sé ekki Sjálfstæðismaður þá er nú sá flokkur ekki einn um þetta eins og þú talar um,grunar að þeir séu það allir.Allir vilja ráða og stjórna ef þeir hafa tök á því.Og virðist vera sama hvað í boði er,bara að þeir komist að.

[Valdís (IP-tala skráð) 23.1.2008 kl. 04:28]

Ég á í verulegum vandræðum með að skilja afstöðu þína Jón.

Þó á ég í mestum vanda með "að flokkurinn geti ekki lýst yfir stuðningi við nýjan borgarstjóra". Flokkurinn getur bara víst lýst yfir stuðningi og ætti svo sannarlega að gera það. Því hvort sem Ólafur er flokksbundinn eður ei, þá er þetta klárlega stefna F.F. eins og ég þekki hana, sem þarna er reynt að framfylgja.

Ólafur F. Magnússon fær minn stuðning og ég er flokksbundinn til margra ára í F.F.

[Dr. Phil (IP-tala skráð) 23.1.2008 kl. 09:52]

http://eyjan.is/silfuregils/2008/01/22/skritin-atbur%c3%b0aras/#comments

athyglisvert komment veist þú eitthvað um þetta Jón?? 

[Jón Magnússon, 23.1.2008 kl. 12:06]

Vegna ummæla í athugasemdum þá skal það upplýst að ég hef ekki staðið í vegi fyrir því að Margrét Sverrisdóttir eða Ólafur F. Magnússon gengju í Frjálslynda flokkinn á nýjan leik en bæði sögðu þau sig úr flokknum og studdu Íslandshreyfinguna við síðustu Alþingiskosningar. Hvorugt þeirra hefur viljað ljá máls á því að koma til liðs við Frjálslynda flokkinn aftur.  Þau Margrét og Ólafur eru bæði eftir því sem ég best veit í Íslandshreyfingunni sem er stjórnmálaflokkur en ekki í Frjálslynda flokknum. Frjálslyndi flokkurinn hefur því ekkert með störf þeirra í borgarstjórn að gera eða ber pólitíska ábyrgð á þeim.  Það væri eðlilegra að Ómar Ragnarsson formaður Íslandshreyfingarinnar tjáði sig um það mál.

Stuðningur við Ólaf Magnússon kemur að sjálfsögðu ekki til greina meðan hann er pólitískur andstæðingur. Hitt er annað mál að á baráttumál einstaklinga í öðrum stjórnmálalfokkum geta verið ágæt og formaður Frjálslynda flokksins hefur lýst því yfir og ég tek undir það með honum heils hugar að við styðjum þau góðu mál sem nýr borgarstjórnarmeirihluti stendur fyrir og eru í samræmi við okkar stefnumál.  Annað höfum við ekki með nýjan meirihluta að gera.

[Kristófer (IP-tala skráð) 23.1.2008 kl. 13:13]

Sæll Jón,

Þakka fyrir greinagóð svör varðandi Ólaf F. Nú er boltinn augljóslega hjá Ólafi!