Snúnar stjórnarmyndunarviðræður

Líklegur forsætisráðherra Þorgerður Katrín Gunnarsdóttir segir stjórnamyndunarviðræður snúnari vegna þess að líkur séu á meiri halla á ríkissjóði en búist var við. 

Það ætti ekki að koma Þorgerði sem setið hefur lengst allra á Alþingi á óvart, að afkoma ríkissjóðs sé verri en fjárlög mæla fyrir um. Hún hefur á þingferli sínum samþykkt fjáraukalög á hverju ári vegna þess að halli var meiri á ríkissjóði en ætlað var. Hún Kristrún og Inga tóku auk heldur þátt í afgreiðslu fjárlaga fyrir nokkrum dögum. Hvað var þá hulið sem er að koma í ljós núna?

En það er minna til að eyða en þær stöllur höfðu ætlað.

Stjórnmálamenn þurfa að forgangsraða og eyða ekki um efni fram. Eitthvað sem fráfarandi ríkisstjórn hafði allt of litlar áhyggjur af og þær, sem sitja við stjórnarmyndun höfðu ef eitthvað var helst áhuga á að eyða enn meiru. 

Nú þegar horft er framan í að ábyrgðin flytjist á hendur pilsanna þriggja þá er vandinn snúnari. 

Á sama tíma er gleðilegt, sem Þorgerður upplýsir, að það sé algjör samhljómur að styðja við Seðlabankann svo hann geti haldið áfram sínu "góða verki." Hvernig samræmist það sjónarmiðum Flokks fólksins sem vildu setja neyðarlög á Seðlabankann vegna illsku hans gagnvart fólkinu í landinu. 

Það verður gaman fyrir fyrrverandi formann VR og fyrsta þingmann Suðurkjkördæmis bæði úr Flokki fólksins, að kokgleypa "góð" verk Seðlabankans nokkrum dögum eftir að þau sögðu þennan banka kyrkingaról um velferð fólksins í landinu. 

Verri afkoma tefur viðræður

2034

Fifa alþjóða knattspyrnusambandið ætlar að beita afbrigðilegum aðferðum til að tryggja að heimmeistaramótið í knattspyrnu árið 2034 verði í þursaríkinu Saudi Arabía. 

Þegar valið stóð á sínum tíma á milli Bandaríkjanna og Abu Dabi um heimsmeistaramótið 2022 þá sóttu Bandaríkjamenn það fast að fá að halda heimsmeistaramótið og sendu hina bestu samninga- og sendimenn til að tryggja að þeir hrepptu hnossið. 

Fyrir bandarísku sendinefndinni fór Bill Clinton fyrrum forseti og sagt er að þegar hann kom upp á hótelið sitt eftir að Bandaríkjunum hafði verið hafnað en Abu Dhabi valið, að þá hafi hann í reiði grýtt forláta vasa í næsta vegg með tilheyrandi afleiðingum. 

Ljóst var afhverju Abu Dhabi var valið umfram Bandaríkin og þótti flestum nóg um. 

En nú skal það vera Saudi Arabía. Ríkið sem virðir ekki réttindi kvenna auk ýmissa annarra mannréttindaskerðinga í samræmi við Sharia lögin. En það þvælist ekkert fyrir stjórnendum FIFA. Vegna þess að Mammon ræður för, en hvorki mannréttindi, siðfræði eða annað. 

Sr. Friðrik Friðriksson merkasti æskulýðsleiðtogi landsins sagði við Valsmenn eftir að hafa stofnað félagið:  Látið ekki kappið bera fegurðina ofurliði.  

Nú hafa stjórnarmenn í Fifa ákveðið að láta peningana bera allt annað ofurliði. Sýnir enn og aftur hnignun okkar menningarheims og fráhvarf frá þeim gidum, sem gerðu Evrópu að forustuálfu í heiminum. 

Gestgjafalönd HM 2030 og 2034 staðfest

Of snemmt að fagna

Stjórnmálamenn í Evrópu og Bandaríkjunum fagna falli Assad. Sumir tala um sigur lýðræðisins.  Fjarri fer því að bylting sem stýrt er af öfgafullum Íslamistum sé sigur lýðræðis og hætt er við að ný einræðisstjórn taki við af hinni fyrri jafnvel enn verri en hin fyrri. Koma verður í veg fyrir það.

Í Sýrlandi búa mörg þjóðarbrot, sem aðhyllast mismunandi trúarbrögð. Þessi þjóðrabrot hafa lifað saman í þokkalegum friði, en helsta ógnin varð framrás ISIS liða, sem hraktir voru til Idlip fyrir nokkrum árum, en láta nú á sér kræla á ný ásamt öðrum hryðjuverkahópum, sem fagna nú sigri.

Ástandið í Sýrlandi er bæði hættulegt og eldfimt. Nú reynir á að komið verði í veg fyrir að nýtt Talibana ríki raungerist í Sýrlandi. Þó helsti talsmaður uppreisnarmanna sé mjúkmáll í dag, þá ber að hafa í huga að þannig töluðu talsmenn Talibana í Afganistan líka þegar ameríski herinn var að fara úr landinu. 

Það virðist ganga illa fyrir vestræna stjórnmálamenn að átta sig á hverskonar óöld, frelsisskerðingar, kvennakúgun og þjóðarmorð fylgja alltaf yfirráðum öfgafullra Íslamista. 

Nú reynir á að vestrænir stjórnmálamenn hlutist til um það, að fólk í Sýrlandi fái að njóta almennra mannréttinda, aðhyllast þá trú sem það vill og landinu verði stýrt á átt til þess lýðræðis sem gæti gefist best í landinu. 

Það má ekki láta hryllingin sem fylgdi  ISIS  endurtaka sig. Þar voru konur sigraðra þjóðarbrota seldar mannsali á opinberum uppboðsmörkuðum, hommum hent fram af húsþökum, kristið fólk tekið af lífi í fjöldaaftökum og vestrænir hjálparstarfsmenn skornir á háls og morðin tekin upp á myndskeið sem síðan voru sýnd og send fjölmiðlum.  

 

Í upphafi skyldi jafnan endinn skoða

Íranir lögðu á ráðin með hryðjuverkaárásirnar á Ísrael 7. október 2023 og studdu hryðjuverkasveitir Hamas á Gasa, Hesbollah í Líbanon og Houti í Yemen. Ætlunin var að valda sem mestu tjóni og hrinda af stað stórstyrjöld gegn Ísrael.

Vegna baráttu varnarsveita Ísrael tókst það ekki. Meira en 20.000 vígamenn Hamas liggja í valnum. Hernaðarmáttur Hesbollah er nánast enginn. 

Ríkisstjórn Assad Sýrlandsdforseta er fallin og í dag má sjá uppreisnarmenn fara ránshendi um íranska sendiráðið í Damascus. Svo mjög hafa Íranir og helstu hryðjuverkasamtök þeirra veikst vegna árásarinnar á Ísrael, að þeir gátu ekki bjargað óngarstjórn Assad lengur.

Íranir lögðu á ráðin með hryðjuverkaárásirnar 7.okt. en sitja nú uppi með ósigur á öllum vígstöðvum nema heimavígstöðvum. En að því mun koma fyrr heldur en síðar. 

 

 

Þitt er mitt

Í gær birtist sameiginleg yfirlýsing ASÍ og SA, þar sem varað var stranglega við tillögum Flokks fólksins um að iðgjöld í lífeyrissjóði verði skattlögð við inngreiðslu í lífeyrissjóði í stað þess að lífeyrir komi til skattlagningar við útgreiðslu. 

Fátítt er að öflug samtök vari við stefnumálum flokka sem eiga í stjórnarmyndunarviðræðum, en nú þurftu þessi öflugustu og fjársterkustu samtök að stilla saman strengi og vara við þeim "afglapahætti" að laun sem greiðast í lífeyrissjóði séu skattlögð strax í stað þess að lífeyrissjóðirnir fari með þetta skattfé áratugum saman og við útgreiðslu sé það tekið af greiðslum til lífeyrisþega.

Í raun réttlætir ekkert það kerfi sem við höfum í dag, að ríkisvaldið taki ekki skattfé strax heldur feli lífeyrissjóðum vörslu þess og ávöxtun þar til  útgreiðslur til lífeyrisþega koma til. Yrði tillaga Flokks fólksins samþykkt yrðu greiðslur til lífeyrisþega skattfrjálsar þegar þær greiðast.

Af hverju er það fráleitt að ríkið tæki þetta skattfé strax. Réttindi lífeyrisþegar rýrna ekkert við það svo sem forseti ASÍ hélt ranglega fram í viðtali í fréttum í gær. 

Hvað mælir þá á móti því að ríkið taki þessa fjármuni sína strax og nýtti til að greiða ríkisskuldir og mætti setja lög um að svo væri og mætti ekki nota í annað fyrr en ríkisskuldir eru að fullu greiddar. 

Er  eðlilegt að öflugstu félagasamtök landsins skuli veifa fánanum með vígorðinu

"Þitt er mitt og láttu svo mitt í friði"

Eru fiskar undir steinum hjá Biden feðgum?

Þ.31.maí s.l. sagði Joe Biden forseti Bandaríkjanna að enginn væri æðri lögunum, eftir að Donald Trump var dæmdur á vafasömum forsendum af dómstól í New York vegna minni háttar  viðskiptabrota.

Biden sýnir nú að hann samsamar sig með hugmyndafræði svínanna í „Animal farm“,að hvað sem lögunum líður þá séu sum dýr jafnari en önnur dýr.

Biden náðaði Hunter son sinn með einstökum hætti. Náðunin tekur til allra glæpa sem Hunter hefur framið eða kann að hafa framið frá 1.janúar 2014 til ársins 2025. Náðun forseta Bandaríkjanna er endanleg og henni verður ekki hnekkt.

Ekki nóg með það Biden forseti tók sig til og gaf yfirlýsingu um að bandarísku dómskerfi væri lítt treystandi atriði sem fjölmiðlar hafa gefið lítinn gaum eins og raunar annað neikvætt sem varðar Demókrata.

Hunter Biden var dæmur í aðskildum málum fyrir skattsvik, fíkniefnalagabrot og vopnalagabrot. Dómstólarnir ætluðu að dæma um fangelsisrefsingu Hunter í þessum mánuði fyrir brot, sem geta varðað allt að 17 ára fangelsi í skattsvikamálinu eingöngu.

Allan tímann sem Hunter var fyrir rétti sagði faðir hans stöðugt að hann mundi hvorki náða son sinn né létta fangelsisrefsingu hans yrði hann dæmdur. Saksóknarar í báðum tilvikum gagnvart Hunter áttu starf sitt að þakka dómsmálaráðuneyti Biden, en samt lýsir Biden því yfir að þeim sé ekki treystandi og íjar að pólitískri misnotkun. Hvað hefur þá Trump mátt þola frá handlöngurum Biden og annarra ráðamanna Demókrata?

Margir velta því fyrir sér hvort að náðun Hunter eigi sér aðrar ástæður og varði brýna hagsmuni Joe Biden sjálfs auk Hunter.

Tímalengd náðunar frá 2014 til 2025 er athyglisverð í því sambandi. Árið 2014 var Hunter kjörinn í stjórn orkufyrirtækisins Burisma í Úkraínu, sem var grunað um glæpi, svindl og svik á þeim tíma sem Hunter sat í stjórninni og Biden var varaforseti Bandaríkjanna.

Hunter var valinn í stjórnina til að fyrirtækið gæti nýtt sér völd og áhrif Biden. Þegar saksóknari í Úkraínu byrjaði sakamálarannsókn á fyrirtækinu Bursima beitti Biden áhrifum sínum til að hann yrði rekinn og rannsókn hætt.

Ef til vill væri hollt að fjölmiðlar í lýðræðisríkjum færu í gagnrýna skoðun á því af hverju Biden sá sig tilneyddan til að náða Hunter son sinn og af hverju náðunin var látin ná aftur til ársins 2014 vegna hugsanlegra glæpa Hunter og hvort viðbrögð Bandaríkjanna síðar gagnvart Úkraínu, undir forsæti Joe Biden hafi eitthvað með þessa viðkvæmu stöðu þeirra Biden feðga að gera.

Hér er a.m.k. fiskur undir steini. Sennilega margir undir mörgum.

Nú þarf að breyta leikreglunum

Þegar gengið er til kappleiks þekkja þáttakendur leikreglurnar og vita að það þýðir ekki að deila við dómarann eftir á yfir því að hann dæmdi skv. reglunum. 

Þegar gengið var til kosninga vissu allir, að flokkar þurfa 5% atkvæða á landsvísu til að fá úthlutun jöfnunarsæta og þeir sem ná ekki 2.5% fylgi fá ekki ríkisstyrk. Raunar telur sá sem þetta ritar, að það sé spilling að stjórnmálaflokkar séu á framfæri ríkisins en það er annað mál. 

Þannig eru leikreglurnar öllum ljósar fyrirfram og flokkar eins og Píratar og VG hafa enga tilraun gert til að breyta þeim. 

Þrátt fyrir þetta kom ekki á óvart, að gamla vinstrimanninum Ólafi Harðarsyni sérlegum fréttamanni RÚV um stjórnmál, skyldi vera mikið niðri fyrir og óðamála þegar hann ræddi um lýðræðishalla vegna þess að villta tryllta vinstrið fékk engan mann kjörinn á þing. 

Svo virtist sem þessi rólegi viðkunnalegi prófessor emeritus hefði farið á námskeið hjá Höllu Hrund Logadóttur í handahreyfingum því nú lá mikið við. Prófessorinn taldi að breyta þyrfti leikreglunum til að auka möguleika örflokka til að fá kjörinn þingmann. En er það það brýnasta?

Hvernig væri að taka kosningakerfið til rækilegrar endurskoðunar. T.d. að landið yrði eitt kjördæmi og hver kjósandi fengi 63 atkvæði jafnmörg og þingmennirnir sem kjósa á og gætu greitt hvaða einstaklingi, á hvaða lista sem er atkvæði sitt. Væri það ekki leið til að auðvelda valkosti kjósenda og tryggja virkt lýðræði og raunverulegt prófkjör og kosningu á kjördag. 

Svo má spyrja hvort ekki væri í ráði að helmingur þingmanna yrði kjörinn hlutallskostningu og helmingur persónukosningu þar sem væri tvöföld umferð eins og í Frakklandi. Margar aðrar leiðir og aðferðir mætti nefna, sem mundi auka valkosti kjósenda og búa til betra og lýðræðislegra umhverfi. 

Okkar kerfi er gott og skilvirkt og almennt hafa ekki mörg atkvæði dottið dauð niður fyrr en nú. Sú sérkennilega niðurstaða kallar ekki á að við förum smáflokkaleiðina eins og Danir heldur þurfum við að finna leiðir til að valkostir kjósandans sé sem mestur því að kosningakerfi á fyrst og fremst að vera fyrir kjósendur og tryggja rétt þeirra og sem mesta valkosti.

En ég spyr hvenær hefur Ólafur Harðarson prófessor emeritus gert athugasemdir við kerfið og krafist breytinga þau 40 ár, sem hann hefur verið helsti umræðustjórinn allar kosninganætur ásamt vini sínum og félaga Boga Ágústssyni. 

Það er of seint að byrgja brunninn þegar vinstrið er dottið ofan í eins og segir í góðum og gömlum málshætti að breyttum breytanda.

Næsta ríkisstjórn

Telja má upp á að Kristrún Frostadóttir muni fá umboð til myndunar ríkisstjórnar. Hún er formaður stærsta flokksins og stjórnarandstöðuflokkarnir, Samfylking, Viðreisn og Flokkur fólksins náðu hreinum meirihluta í kosningunum. 

Allir þessir flokkar töluðu fyrir breytingum, sem fólst í að aðrir flokkar en núverandi stjórnarflokkar tækju sæti í ríkisstjórn.

Ríkisstjórnarflokkarnir urðu allir fyrir verulegu fylgistapi. Ekki þarf því að fara í grafgötur með það hver meirihlutavilji kjósenda er. 

En þá reynir á hvort einhver innistæða er fyrir öllum loforðum stjórnarandstöðuflokkanna og orðagjálfrinu. Nú reynir á lipurð og stjórnkænsku Kristrúnar.

Pilsin þrjú

Sigurvegarar kosninganna eru Samfylking, Viðreisn og Flokkur fólksins. Sú stjórn hefði góðan þingmeirihluta og áherslur þeirra einkum í velferðarmálum eru í meginatriðum þær sömu. Þeir Dagur B. og Jón Gnarr gætu þá náð saman á nýjan leik um nýtt Reykjavíkurmódel, en vissulega hræða sporin. 

Sem betur fer þurkaðist villta tryllta vinstrið út af þingi, sem skýrir að stórum hluta fylgisaukningu Samfylkingar og hluta til Flokks fólksins.

Sjálfstæðisflokkurinn stendur frammi fyrir verstu kosningaúrslitum, sem Flokkurinn hefur nokkru sinni fengið. Þó komist hafi verið hjá algerri niðurlægingu með vasklegri kosningabaráttu, þar sem skipulag og forn frægð reyndist heilladrjúg, þá eru þessi kosningaúrslit ekki ásættanleg og verða að leiða til endurskoðunar bæði á málefnalegum áherslum og forustu.

Keppikefli Sjálfstæðisflokksins er ekki að komast í ríkisstjórn hvað sem það kostar eins og verið hefu. Það þarf að byggja upp sterkan hugmyndafræðilegan grunn á forsendum Sjálfstæðisstefnunnar, sem mundi tryggja Sjálfstæðisflokknum á ný verðskuldað ótvírætt forustusæti í íslenskum þjóðmálum.

Við getum lagt út í baráttuna eins og Friðrik mikli Prússakonungar gerði þegar hann sagðist eiga í stríði við pilsin þrjú.Þ.e. keisaraynjurnar í Rússlandi, Austurríki og hjákonu Lúðvíks 15 í Frakklandi. Kjósendur hafa valið pilsin þrjú, Ingu, Kristrúnu og Þorgerði og þá þurfum við Sjálfstæðisfólk að finna okkar Friðrik mikla til að leiða baráttuna til sigurs.