Stríð, vopnahlé og friður.

Í gær samþykkti Öryggisráð Sameinuðu Þjóðanna að vopnahléi skyldi komið  á í stríði Ísrael við hryðjuverkasamtök Hamas á Gasa. Vonandi gengur eftir að meðan vopnahléð stendur náist samningar um að Hamas láti af stjórn á Gasa þannig að hægt sé að semja um varanlegan frið svo þjáningum almennings á Gasa linni.

Utanríkisráðherra fagnaði vopnahléinu í færslu á fésbók, en var á sama tíma að undirrita samninga um að Ísland greiddi fyrir vopn fyrir Úkraínu til að drepa þar mann og annann. Það er frávik frá utanríkisstefnu Íslands frá því að við urðum frjálst og fullvalda ríki árið 1918. Mörgum þar á meðal þeim sem þetta ritar finnst miður að Ísland skuli blanda sér í vopnakaup fyrir stríðsaðila í stað þess að takmarka stuðning við hjálparstarfsemi og annað því tengt, svo sem verið hefur. 

En á sama tíma og Vesturlönd fagna vopnahléi á Gasa, þá er ekkert þeirra að tala fyrir vopnahléi og friðarsamningum í kyrrstöðustyrjöldinni í Úkraínu. Þjáningar óbreyttra borgara, sem verða fyrir drónaárásum og flugskeytum er gríðarleg. Þrátt fyrir það fá þeir sem tala fyrir vopnahléi eða friði í því stríði bágt fyrir meira að segja páfinn og utanríkisráðherra Íslands finnst í lagi að tala fyrir vopnahléi á Gasa á sama tíma og hann kaupir vopn fyrir Úkraínuher.

Hvernig skyldi standa á því að heimurinn fagnar vopnahléi á Gasa en telur það ekki eiga við í Úkraínu?

Við skulum senda samúðarkveðjur til Rússa.

Föstudaginn 22. mars var framið hræðilegt hryðjuverk í tónlistarhöll í Moskvu. Íslamskir hryðjuverkamenn ÍSIS voru að verki og myrtu unga fólkið, sem var að fylgjast með tónleikum, með köldu blóði. Tala látinna er nú 137 manns. 

Hryðjuverk eru alltaf fordæmanleg og ekki skiptir máli á hverjum þau bitna. ÍSIS hafa tvisvar áður framið mannskæð hryðjuverk í tónlistarhúsum annars vegar í Bataclan í París og hins vegar í Manchester á Englandi. 

Þegar hryðjuverkin voru framin í Bataclan og Manchester sendu íslenskir ráðamenn strax samúðarkveðjur til ríkisstjórna og/eða forseta viðkomandi landa.

Nú að kvöldi dags tveim dögum eftir þetta hryllilega hryðjuverk ÍSIS í Rússlandi, hafa íslenskir ráðamenn ekki hafi haft döngun í sér til að senda Rússum samúðarkveðjur. Það er þeim til skammar. Vonandi verður úr þessu bætt strax.  

 

 

Enn eitt hryðjuverk ríkis Íslam

Ríki Íslams tókst enn einu sinni að drepa fjölda fólks og særa enn fleiri þegar liðsmenn þeirra gerðu fólskulega árás á tónleika í tónlistarhúsi við Moskvu í Rússlandi. Vonandi sjá forseti Íslands og utanríkisráðherra sóma sinn í því að votta Rússum samúð sína vegna hryðjuverkaárásarinnar þar sem fjöldi saklauss ungs fólks lét lífið.

Haft er fyrir satt, að lögregla í Evrópu komi í veg fyrir meira en 90% ætlaðra hryðjuverka Íslamista, þó að þessi ógnaröfl nái ekki að framkvæma nema brot af því sem þau ætla að framkvæma, þá er þau hryðjuverk þó svo skelfileg, að það hvetur til þess að öll ríki Evrópu, Rússland þar með talið standi saman um að vinna gegn þessari óværu.

Því miður geisar stríð á milli  Úkraínu og Rússlands með miklum mannfórnum á báða bóga og miklu tjóni á mannvirkjum og öðrum innviðum. Brýnasta verkefni leiðtoga Evrópu er að koma á friði milli þjóðanna til þess að Evrópa geti sameinuð beitt sér fyrir þeim brýnustu verkefnum og gegn þeim vandamálum sem steðja að Evrópu í stað þess að bræður haldi áfram að berjast í Úkraínu.

 

 

 

140 þúsund

Ef forseti Bandaríkjanna segði, að hann og ríkisstjórn hans ætluðu að flytja 140 þúsund Gasabúa til Bandaríkjanna,mundu hans eigin flokksmenn og Repúblikanar hlutast til um það að hann yrði látinn segja af sér og koma í veg fyrir slíkt brjálæði. 

140.000 er sambærileg tala hlutfallslega miðað við fólksfjölda eins og ríkisstjórnin er að flytja til Íslands þessa daganna.

Ólíkt okkur eru Bandaríkjamenn ekki að reyna að slá öll met í vitleysu varðandi hælisleitendur. Við höfum tekið við metfjölda hælisleitenda undanfarin ár og kerfið þolir ekki meira. Þar til viðbótar bætast náttúruhamfarir í Grindavík, sem valda því, að fjöldi fólks hefur þurft að yfirgefa heimili sín og þarf á nýjum samastað að halda. 

Vitleysisgangurinn í útlendingalögunum er slíkur, að hælisleitendunum verður útvegað húsnæði, dagpeningar, læknishjálp, tannlælknishjálp, sálfræðimeðferð o.fl. o.fl. sem stendur Grindvíkingum ekki til boða. 

Víða erlendis vekur það furðu þeirra sem hafa áhuga á Íslandi, að hér skuli vera svo vitlaus ríkisstjórn, að henni skuli detta í hug að flytja inn fjölda óviðkomandi  fólks, þegar allir innviðir eru sprungnir og náttúruhamfarir bætast við. 

Það er ekki hægt að hafa ríkisstjórn sem áttar sig ekki á þeirri grunnforsendu þjóðríkisins, að ríkisstjórn ber fyrst og fremst skylda til að huga að velferð eigin þjóðar og gæta hagsmuna hennar. 

Að hafast ekki að

Allt of langlíf ríkisstjórn Katrínar Jakobsdóttur virðist starfa eftir þeirri meginreglu, að gera ekkert nema í algjört óefni sé komið. Ekki er gætt hagsmuna skattborgarana og meðferð opinbers fjár í höndum ríkisstjórnarinnar er eins og peningar í höndum barns í sælgætisverslun. Ekki er hugað að því að tryggja þjóðinni næga vistvæna orku- og er þá fátt eitt talið. 

Verst af aðgerðarleysi og roluhætti ríkisstjórnarinnar er þó aðgerðir eða mun frekar aðgerðarleysi í málefnum útlendinga þá sérstaklega hælisleitenda. Aðgerðirnar hafa miðað að því að troða inn í landið svonefndum kvótaflóttamönnum og aðgerðarleysið birtist helst í algjöru stjórnleysi á landamærunum.

Landamærin eru galopin og þar ríkir algjört stjórnleysi. Þó svo hafi verið um langa hríð, hefur ekkert raunhæft verið gert. Margir hafa séð að nauðsynlegt væri að ganga úr Schengen strax sem einn lið í að ná stjórninni en þrátt fyrir Schengen er hægt að grípa til aðgerða til að ná stjórn á landamærunum ef stjórnvöld hafa vilja dug og þor. 

Vanrækt var að tryggja að erlent afbrotafólk verði sent tafarlaust úr landi. Stjórnvöld hafa ekki gert neinn reka að tryggja öryggi fólksins í landinu gagnvart þeim. Afleiðingin er m.a. sú, að enginn er óhultur ekki einu sinni einn æðsti maður réttargæslunnar í landinu. 

Breytingar á lögum um leiguakstur, er síðan gott dæmi þar sem vanrækt var að gæta að nauðsynlegri neytendavernd varðandi gjaldtöku og öryggi farþega. Viðskiptavinir leigubifreiðastjóra eru iðulega í viðkvæmri stöðu og því brýn nauðsyn að gæta að öryggi þeirra.  Nánast daglega má lesa í fréttum vandamál sem þessi algjöru lausatök ríkisstjórnar og Alþingis valda. 

Stefnulaus ríkisstjórn óeiningar og sundurlyndis gerir engum gagn með því að sitja nema e.t.v. þeim ráðherrum sem telja að ríkisstjórnarseta sé eitt stórt partý sem nauðsynlegast sé að standi sem lengst. 

Íran er ekki á dagskrá bara Ísrael

Árum saman hefur klerkastjórnin í Íran unnið að því að gerð verði allsherjarárás á Ísrael úr mörgum áttum og eytt hundruðum milljarða í það verkefni.

Árásarhringurinn um Ísrael, sem klerkastjórnin hefur búið til er Hesbollah í Líbanon, Hamas á Gaza, Vígasveitir m.a. íranskar í Sýrlandi og vígasveitir á svokölluðum  Vesturbakka. Árás Hamas á Ísrael 7.okt.s.l. var skipulögð og fjármögnuð af Íran.

Vestrænir fjölmiðlar fjalla ekki um þessi mál og hvað mikið er lagt í sölurnar til að ná fram allsherjarútrýmingu á Gyðingum ekki bara Gyðingum í Ísrael heldur öllum Gyðingum. Klerkastjórnin í Íran og ofangreindir nótar þeirra eru mun róttækari en nasistarnir á miðri síðustu öld, en glæpur þeirra ætti að vera öllum víti til varnaðar. 

Á Vesturlöndum hefur engin mótmælt þessum hrikalega stríðs undirbúningi klerkana í Íran eða hvatt fólk til að sniðganga Íranskar vörur.

Árið 2022 leyfði 22 ára stúlka í Íran Masha Amin sér að ganga um án þess að hylja hár sitt. Hún var handtekin og drepin. Frelsi til að ráða klæðaburði sínum nær ekki til kvenna í Íran þrátt fyrir langa baráttu. Kvennasamtök um allan heim horfa framhjá því þegar þær hitta kvenkyns fulltrúa klerkana á ráðstefnum. 

Í kjölfar drápsins á Masha Amin urðu mikil mótmæli og klerkastjórnin drap fjölda fólks aðallega ungt fólk allt niður í 9 ára börn. Margir halda því fram, að fleiri hafi verið drepnir vegna mótmælanna í Íran en fallið hafa á Gasa. 

Á Vesturlöndum hafa mótmæli verð óveruleg vegna þessarar kúgunar, illmennsku og morða í Íran. Ekki eru gerðar kröfur um að fólk kaupi ekki vörur frá Íran og þessi hryðjuverkastjórn verði sniðgengin. Á sama tíma æða þúsundir vinstri sinnaðs fólks og nytsamra sakleysingja í mótmælum gegn Ísrael og er orðið að fimmtu herdeild Írana í  fyrirhuguðu útrýmingarstríði þeirra gagnvart Ísrael. Þetta fólk tekur undir hugmyndir Hamas, Hesbollah og Íran um að má Ísrael út af landakortinu. Þess er krafist að fólk hætti að kaupa vörur frá Ísrael og sniðgangi fyrirtæki eins og Rapid, sem ekkert hefur til saka unnið, út frá rasískum forsendum.

Þetta er krafa af sama meiði og nasistarnir á síðustu öld beittu gegn Gyðingum. Þeir sem þekkja þá sögu blöskrar það sem nú er að gerast meðal vinstri sósíalista í Evrópu. Þeir hafa tekið sér þjóðernissósíalistanna á síðustu öld til fyrirmyndar. Gegn slíkum útrýmingar rasisma verður að bregðast af hörku. 

Þeir sem hingað til hafa jafnan haft rasistaheiti á hraðbergi gagnvart fólki sem vill vernda þjóðleg gildi og takmarka aðgengi ólöglegra hælisleitenda til landsins er fólkið sem nú gerir sig sekt um að vera hinir raunverulegu rasistar. Til dæmis um það má benda á,að engin af þessu liði setur fram kröfu á hendur Hamas að þeir láti eftirlifandi gísla sem voru á sínum tíma meir en 200 lausa. Enginn.

Er það ekki sérkennilegt að kröfur þessa fólks skuli bara vera á annan veginn og beinast á rasískum forsendum að Gyðingum. 

 

 

 

Við gefumst upp?

Danski stjórnmálamaðurinn Mogens Glistrup sagði að danski herinn gæti ekki varið Danmörku og þessvegna væri best að koma upp á öllum landamærastöðvum sjálfvirkum símsvara sem segði á öllum tungumálum "Við gefumst upp." Síðan þá hefur danski herinn heldur betur látið til sín taka.

Mér var hugsað til þessa þegar ég hlustaði á umræður á Alþingi vegna fyrirspurna Diljá Mist Einarsdóttur um stöðuna á landamærum þjóðarinnar. Svörin voru nánast þau, að ekkert væri hægt að gera vegna Schengen reglna, reglna Evrópusambandsins skorti á áhættumati Ríkislögreglustjóra og fram eftir þeim götunum. 

Hvað gerir þjóð sem ráðist er á? Hún gefst upp eins og Mogens Glistrup talaði um. Eða hún tekur til varna. Hún tekur til varna strax og árásin á sér stað, en bíður ekki eftir áhættumati Ríkislögreglustjóra, að Alþingi samþykki breytingar á lögum eða leyfi fáist frá Schengen. Skylda ráðamanna er við þjóðina en ekki við Schengen og Evrópusambandið. Taka verður strax á þeim málum sem þola enga bið.

Stjórnleysið á landamærunum verður að taka enda núna. 

Stjórnleysið við að koma ólöglegum innflytjendum úr landi verður að taka enda núna. 

Öryggi landsmanna og velferð er í húfi. 

 

 

Hverju mega þá aðrir búast við?

Helgi Magnús Gunnarsson vararíkissaksóknari gerir grein fyrir því í blaðaviðtali, að erlendur hælisleitandi og afbrotamaður, hafi ítrekað haft í hótunum við sig m.a. hótað sér lífláti. Hann þurfti að vara börnin sín við að opna ekki útidyr og vera á varðbergi gagnvart ógnvaldinum.

Þrátt fyrir að um sé að ræða mann sem á töluvert undir sér, þá fékk hann enga vernd og mátti þola að vera stöðugt á varðbergi gagnvart hugsanlegri árás á sig og fjölskyldu sína. 

Fyrst svo er komið með vararíkissaksóknara, hvernig er þá staða almennra borgara? Hvaða réttarvernd hafa þeir? Sagt er að margir láti nú þegar hjá líða að gæta réttar síns til að lenda ekki í útstöðum við erlend glæpagengi á Íslandi.

Af öllum hópum innflytjenda er reynslan sú, að þeir sem eru seinfærastir og erfiðastir og liggja að meginhluta upp á velferðarkerfinu með hæstu glæpatíðni, koma frá því svæði í Mið-Austurlöndum, sem ríkisstjórnin hamast við að flytja inn sem flesta. Þetta er gert þrátt fyrir að reynsla allra þjóða af innflutningi fólks frá þessum heimshluta.

Fyrst stjórnleysið er orðið svo mikið sem kemur fram hjá vararíkissaksóknara nú þegar við hverju má þá búast í framtíðinni eftir helstefnu ríkisstjórnarinnar í málefnum hælisleitenda. Já og hvernig á að bregðast við til að tryggja að við búum í virku réttarþjóðfélagi þar sem fólk getur gengið öruggt um göturnar og búið við öryggi heima hjá sér?   

Hnignun stjórnmálastéttarinnar

Í grein, sem Francis Fukuyama skrifaði í helgarblað Financial Times þ. 2.mars s.l., segir hann að skv. niðurstöðu rannsóknarstofnunarinnar "Freedom House" (FH) hafi stjórnmálastéttinni í lýðræðisríkjum heimsins hrakað mikið síðustu 18 árin. Alvarlegasta ástandið sé í Bandaríkjunum.

Hnignun stjórnmálastéttarinar og stofnana þjóðríkis verður m.a. þegar þessir aðilar bregðast ekki við og aðlaga sig ekki að breyttum aðstæðum.

Þegar litið er á Ísland verður ekki annað séð, en niðurstaða FH sé í samræmi við það sem hefur verið að gerast hér. Stjórnmálastéttinni hefur hnignað bæði hvað varðar mannval og siðferðilegar viðmiðanir. Sem dæmi eru ofurlaunin sem stjórnmálamenn skammta sér, vaxandi sveit verklítilla pólitískra aðstoðarmanna og milljarðarnir sem stolið er úr ríkissjóði til að fjármagna starfsemi stjórnmálaflokka.

Greinarhöfundur telur að hnignun stjórnmálastéttarinnar sé mest í Bandaríkjunum og bendir á komandi forsetakosningar mili Joe Biden og Donald Trump.

Margir spyrja hvernig standi á því að Bandaríkin, sem búa yfir miklum mannauði skuli vera í þeirri stöðu að sitjandi forseti sem kemst varla skammlaust fram úr skrifuðum ræðum, getur ekki setið fyrir svörum svo vel sé og rugli jafnvel saman Úkraínu og Gaza í umræðum verði frambjóðandi Demókrataflokksins.

Hvað þá að frambjóðandi Repúblíkanaflokksins verði Donald Trump, sem átti dapra leiki þegar hann var að láta af embætti fyrir fjórum árum síðan, sem m.a. leiddi til skrílsláta og árásar á þinghús Bandaríkjanna. Flestir hefðu talið að það mundi nægja til að hann yrði ekki aftur í kjöri, en sú varð ekki rauninn. Nýlega bauð hann Rússum að ráðast á hvaða NATO ríki sem væri, sem borgaði ekki ímyndaða skuld við bandalagið. 

Við höfum lítið með forsetakosningar í Bandaríkjunum að gera,en úrslitin þar skipta okkur og heimsbyggðina miklu.

Eitt af því sem ekki er nefnt í greininni, en skiptir miklu er sú staðreynd, að hugmyndafræðilegur ágreiningur meginflokka er ekki lengur til staðar og stjórnmálamenn þeirra eru þáttakendur í stjórnmálapartíi en ekki stjórnmálum sbr. íslensku ríkisstjórnina. 

 

Ást og friður

Í gær fengu landsmenn smjörþefinn af því sem koma skal ef fjölmenningarstefna opinna landamæra, sem Samfylkingin, Viðreisn og einkum Píratar leiða, nær fram að ganga.

Ofbeldisfólk opinna landamæra talar um stefnu sína sem stefnu "ástar og friðar". Hvílík öfugmæli. Alls staðar þar sem fólk eins og þremenningarnir sem hælisleitendaiðnaðurinn virkjaði til mótmæla á Alþingi í gær kemur, veldur það illindum, öryggisleysi almennra borgara og hryðjuverkum. Í stað ástar og friðar fylgir því, hatur og ofbeldi.

Þeir sem ímynda sér að hugmyndafræði "Dýranna í Hálsaskógi" um að öll dýrin í skóginum geti verið vinir, eigi við í málefnum hælisleitenda hafa ekki kynnt sér ástandið í heiminum eða í  nágrannalöndum okkar. 

Í Noregi, Danmörku og Svíþjóð eru hópar sem fóru að berjast með ISIS og frömdu þar voðaverk í nafni Íslam og andstöðu og haturs á Vesturlöndum. Á þeim forsendum var heimilt að drepa óvinina, sem stundum voru hjálparstarfsmenn með því að skera þá á háls. Síðan kom þetta lið til baka og hefur frjálsan aðgang að öllum löndum á Schengen svæðinu í nafni ástar og friðar.

Í Osló eru samhliða samfélög þar sem fólk talar ekki norsku og áletranir eru á arabísku. Í Svíþjóð er fjöldi samhliða þjóðfélaga innflytjenda, þar sem lögregla, sjúkralið eða brunalið fer ekki inn í nema með aðstoð þungvopnaðra hermanna. 

Fjöldi hryðjuverka, sem fylgir er gríðarlegur en ég minni bara á Manchester fyrir nokkrum árum,þar sem ungt fólk á tónlistarhátíð  var drepið miskunarlaust á altari fjölmenningarsamfélagsins og Bataclan í París, þar sem það sama gerðist.

Í gær réðust þrír hælisleitendur að löggjafarvaldinu, Alþingi, en var sem betur fer komið í burtu án þess að tjón hlytist af. Því er haldið fram, að þeir hafi verið hvattir áfram af innlendum fylgjendum opinna landamæra, en ekki veit ég það svo gjörla. Hitt veit ég að það verður að vísa þessum mönnum úr landi og flytja þá burt og gæta þess að þeir komi aldrei aftur og það þegar í stað. Allt annað er óheyrileg linkind og sýnir þá þeirra líkum þ.e. að Ísland líði hvað sem er. 

Dettur einhverjum í hug að með því að senda slík skilaboð, þá komi færri þeirra líkar til landsins til að leggjast upp á skattgreiðendur. Að sjálfsögðu ekki og skiptir þar frumvarp dómsmálaráðherra ekki sköpum það þarf miklu meira til að koma.

Á sama tíma og þessir ofbeldismenn gagnvart löggjafarvaldinu ættu að vera á leiðinni úr landi með algjört komubann vegna ólíðandi og hættulegrar framkomu, þá býsnast þingmenn allra flokka með það hvernig helsta ofbeldismanninum líði.

Þessir sömu þingmenn hafa ekki velt fyrir sér undanfarna daga hvernig fórnarlömbum aðfluttra ofbeldismanna líður og væri það þó verðugra verkefni.  En e.t.v. sýna þessi ummæli þingmannanna hversu gjörsamlega vanhæfir þeir eru til að gæta þjóðarhags og öryggis eigin samborgara.