Leita í fréttum mbl.is

Bloggfærslur mánaðarins, desember 2009

15 milljarða jólagjöf Jóhönnu og Steingríms

Skattahækkanir ríkisstjórnarinnar á árinu hækka höfuðstól verðtryggðra skulda heimilanna um 15 milljarða. Þannig gefur ríkisstjórnin fjármagnseigendum 15 milljarða.  Verðtryggingin er djöfullegasta lánakerfi sem fundið hefur verið upp.  Þegar skattar hækka og fólk á minni peninga hækka lánin. Þó engin virðisauki sé í þjóðfélaginu eða jafnvel neikvæður eins og hjá okkur þá hækka verðtryggðu lánin samt. Þau hækkuðu líka þegar íslenska krónan var í hæstu hæðum. Kerfið er nefnilega galið.

Var það skjaldborg um fjármagnseigendur, banka og lánastofnanir sem Jóhanna ætlaði að slá upp?

Svona ranglæti má ekki þrífast lengur. Ríkisstjórnin verður að koma á eðlilegu lánakerfi strax, sambærilegu við það sem er í okkar heimshluta. Jóhanna Sigurðardóttir var einu sinni á móti verðtryggingu. Nú hefur hún völdin. Ætlar hún að standa með skoðunum sínum eða eru það aðrir hagsmunir sem ráða?

Höfuðstólsleiðrétting lána og eðlilegt lánakerfi er mikilvægast.


Löstur er ekki glæpur

Danir vilja virða lesti reykingarfólks og gefa því kost á að eiga sitt griðland. Danir hafa heimilað kráareigendum á krám sem eru 40 fermetrar eða minna að leyfa reykingar í sínum veitingahúsum. Nú sýna skoðanakannanir að meiri hluti Dana vill virða þennan sjálfsákvörðunarrétt og heimila reykingarfólki löst sinn án algers banns.

Við ættum að hugleiða þessa leið líka. Það er óneitanlega ankannalegt að sjá fólk norpa í vetrarkulda eða sumarrigningum fyrir utan veitingastaði. Annað sem væri þó betra að mínu mati og ég lagði til á þingi í fyrra, að heimila uppsetningu á sérstökum reykherbergjum.

Löstur er ekki glæpur og það verða rétttrúnaðarþjóðfélög ríkisafskipta af einstaklingunum að virða. Ég er persónulega algerlega á móti reykingum en get ekki og á ekki að stjórna því fyrir aðra svo fremi það trufli ekki þá sem ekki reykja.  Það hefði verið betra að við hefðum tileinkað okkur meira af dönsku umburðarlyndi.


99 milljarða fjárlagahalli

Ríkisstjórn sem afgreiðir fjárlög með 99 milljarða fjárlagahalla hefur gefist upp við að reyna að stjórna með vitrænum hætti. 


Forseti ASÍ gefur leiðbeiningar.

Getur það verið rétt að forseti ASÍ hafi gefið stjórnvöldum þær opinberu leiðbeiningar að  rétt sé að afskrifa milljarða skuldir á Bónusfeðga af því að þeir væru með fyrirtæki í rekstri en rangt að gefa skattaafslátt á fyrirtæki vegna þess að það væri  að hluta í eigu Björgólfs Þórs?

Getur einhver verið svo vænn að skýra fyrir mér hvaða vitræn glóra getur verið  í svona málflutningi verkalýðsforustunnar. 

Launafólk í landinu þarf greinilega engu að kvíða með forustu sem fer fram á milljarðaafskriftir opinberra banka á skuldum útrásarvíkinga.


Kaldhæðni náttúruaflanna

Er það ekki með ólíkindum að þegar trúboðar hnattrænu hlýnunarinnar sem setið hafa á rökstólum í Kaupmannahöfn í heila viku til að velta upp hugmyndum um með hvaða hætti menn geti takmarkað hlýnun jarðar við 2 gráður að þá skuli þeir Gordon Brown og Sarkozy koma heim þar sem lestarsamgöngur á milli landanna eru frosnar og meiri kuldi en mælst hefur í langan tíma.

Obama Bandaríkjaforseti snýr til höfuðborgar sinnar Washington DC þar sem snjór er nú meiri en elstu menn muna.

Hvernig skyldu trúboðar hnattrænu hlýnunarinnar skýra þetta?

Verður jörðin ekki bara vistvænni ef það hlýnar um 2 gráður eða rúmlega það? 

Hvað svo sem hin pólitíska veðurfræði segir um það þá held ég að við höfum ekkert eða sára sára lítið með það að gera.

Hitt er svo annað mál að við eigum að takmarka óþverra og óþrif sem mest og þess vegna eigum við að gæta að okkur og sýna náttúrunni sem mesta tillitsemi, en ekki með því að setja á kvótakerfi losunar eða borga einræðisherrum eða spilltum stjórnvöldum út og suður milljarða á altari trúarbragðanna um hnattrænu hlýnunina.


Svínaflensan ógurlega

Nú er komið í ljós að svínaflensan svokallaða er mildasti heimsfaraldur sem sögur fara af. Í byrjun maí mátti skilja á fréttamiðlum að þvílíkt fár væri í uppsiglingu þar sem svínaflensan var að Spánska veikin sem gekk yfir 1918 væri barnaleikur miðað við það sem nú væri í vændum. Ég var staddur erlendis á þessum tíma og dag eftir dag snérust heilu fréttatímar heimsféttamiðlana um þá ógn sem mannkyni öllu stafaði af svínaflensunni. Ferðir milli landa voru takmarkaðar og ferðamannaiðnaður Mexícó lagður í rúst.

Svo reyndist þetta ægilega fár geisa fyrst og fremst í fjölmiðlum. Samt sem áður dugði það til að æra fólk og ríkisstjórnir þannig að milljarðar skiptu um hendur vegna fjölmiðlaógnarinnar.  Nokkru áður komu fjölmiðlar á þeirri ógnarspá að fuglaflensa mundi verða ægilegasti faraldur allra tíma. Afleiðing þess var að milljónum fugla var slátrað og menn veltu því fyrir sér hér á landi hvaða varnarviðbúnað yrði að setja upp til að farfuglarnir kæmu ekki hingað ósótthreinsaðir. Svo hvarf sú vá.

Það er alltaf verið að finna upp nýja og nýja váboða. Stefnulausir stjórnmálamenn eru fljótir að renna í fjölmiðlaslóðina til að freista þess að slá sig til riddara sem baráttufólk gegn vánni. Þeir krefjst þess að gripið verði til dýrra aðgerða og það án tafar á kostnað almennings. Þannig hefur það verið með svínaflensuna og fuglaflensuna. 

Sama gildir e.t.v.  um loftslagsbreytingarflensuna?


Athyglisvert

Ögmundur Jónasson upplýsti það í viðtali í morgunútvarpi Rásar 2 áðan að skrifað hafi verið undir Icesave samninginn í vor þó vitað væri að ekki væri þingmeirihluti fyrir málinu eins og hann orðaði það.

Óneitanlega kom þessi yfirlýsing Ögmundar á óvart. Sennilega er einsdæmi í lýðveldissögunni að skrifað hafi verið upp á milliríkjasamning sem vitað var að ekki var þingmeirihluti fyrir.  Auk þess að sýna Alþingi lítilsvirðingu þá sýnir þetta mikla léttúð og ábyrgðarleysi í meðferð opinbers valds.


Atvinnuleysi

Atvinnulausir eru um átta þúsund og mun fara fjölgandi næstu mánuði því miður. Hér á landi hefur atvinnuleysi sem betur fer verið sjaldgæfur vágestur. Því miður bendir ýmislegt til að atvinnuleysið sé komið til að vera.

Atvinnuleysi dregur mátt úr fólki og margir sem hafa verið atvinnulausir lýsa því með hvaða hætti smám saman dró mátt úr þeim. Þannig er það með fólk sem er fullt af lífslöngun og krafti.

Í gær hitti ég menn sem reka mismunandi fyrirtæki sem þó eiga það sammerkt að þjónusta atvinnuvegina. Þeir sögðu mér hver sína sögu um gríðarlegan samdrátt  í sölu fyrirtækja sinna. Allt að 70% samdráttur var hjá einu góðu gömlu og grónu fyrirtæki. Af hverju? Það eru engin verk að fara af stað sagði verslunarstjórinn.

Eitt af því mikilvægasta sem stjórnvöld geta gert er að reyna eftir mætti að koma í veg fyrir atvinnuleysi. Það er hægt að gera með því að haga skattheimtu þannig að ekki dragi mátt úr framkvæmdaraðilum. Við búum í þannig landi að það er fullt af tækifærum. Það þarf hugrekki, þor og jákvæðar kringumstæður til að virkja fólk til athafna. Þá má ríkið ekki þvælast fyrir. Því miður þá sýnist mér þó svo komið að þannig sé það með ofursköttum og fyrirfarandi tálmunum umhverfisráðherra. 


Ofurlaun

Sýnt hefur verið fram á með ágætum rökum að svipaðar aðstæður sköpuðust í ýmsu fyrir efnahagshrunið 1929 og fyrir efnahagshrunið 2008. Hvað mest sláandi er þróun launa. Í báðum tilvikum fóru laun bankastjórnenda í himinhæðir. Stjórnmálamenn gerðu því miður ekkert í því.  Að því leyti má segja að stjórnmálastétt heimsins hafi brugðist.

Nú hafa forsætisráðherra Bretlands og forseti Frakklands náð samkomulagi um að berjast fyrir því að settar verði alþjóðlegar reglur um sérstaka skattlagningu ofurlauna eins og bankamenn skömmtuðu sér. Vandinn er  sá í þessum löndum að þrátt fyrir að teknar hafi verið trilljónir króna til að halda föllnum bönkum á lífi þá halda stjórnendur þeirra áfram að skammta sér  hundruði milljóna kaupauka og ofurlaun.

Væri ekki ráð að við gengjum á undan og mótuðum strax  skýrar lagareglur í þessu sambandi varðandi raunveruleg ofurlaun í stað þess að búa til skattahásléttu fyrir fólk með meðaltekjur. Það er oft betra að bregðast við áður en vandinn hefur knúið dyra.


Hvar eru mótmælendur nú?

Í fréttum er greint frá því að fjöldi lögreglumanna hafi hlotið alvarleg líkamleg meiðsl eftir óeirðir svonefndra mótmælenda við Alþingishúsið og Stjórnarráðið í fyrra. Skríl eins og þann sem veitti lögreglumönnunum þessi líkamsmeiðsl á að sækja til saka. Yfirstjórn lögreglunnar stóð því miður ekki nægjanlega með sínu fólki þegar óeirðirnar gengu yfir með því að handtaka og láta þá sæta refsiábyrgð sem unnið höfðu til þess.

Áður en átökin urðu hörð höfðu Steingrímur J. Össur og Ögmundur lagt á ráðin um myndun nýrrar ríkisstjórnar. Nú hefur byltingin étið fyrsta barnið sitt Ögmund Jónasson sem rekinn var úr ríkisstjórninni.

Hvernig stóð á því að óeirðirnar fóru gjörsamlega úr böndum eftir samkomulag þremenningana?

Sumir segja að þar hafi óeirðaöflin í VG undir forustu heilbrigðisráðherra og skrímsladeildin í Samfylkingunni undir forustu utanríkisráðherra skipulagt aðför að sitjandi stjórnvöldum til að ná fram samstjórn Vinstri grænna og Samfylkingar.

Nú ári síðar er ástandið alvarlegra en það var í janúar 2008. Ekkert hefur verið gert varðandi skuldavanda heimilanna sem skiptir máli.  Sömu athafnamennirnir sitja við völd í fyrirtækjunum sínum með örfáum undantekningum.  Enginn hefur verið lögsóttur og ríkisstjórnin er ónýt og úrræðalaus.

Samt sem áður mætir óeirðafólkið ekki lengur niður á Austurvöll.  Af hverju ekki? 

Var eina raunverulega markmið skipuleggjenda óeirðanna að fella sitjandi ríkisstjórn og koma á þeirri sem nú situr?


Næsta síða »

Höfundur

Jón Magnússon
Jón Magnússon

Síðuritari er Hæstaréttarlögmaður og fyrrverandi alþingismaður.

 

Eldri færslur

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (19.3.): 8
  • Sl. sólarhring: 132
  • Sl. viku: 4598
  • Frá upphafi: 2267742

Annað

  • Innlit í dag: 7
  • Innlit sl. viku: 4246
  • Gestir í dag: 7
  • IP-tölur í dag: 7

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband