Hinir áhrifalausu

Bandaríkjaforseti flaug heim í gær af fundi G7 ríkjanna, þar sem sitja forustumenn helstu Evrópuríkja og Kanada ásamt Bandaríkjunum með samtals um 780 milljónir íbúa. 

Fátt sýnir betur algert áhrifaleysi Evrópuríkjanna en þessi atburður. Bandaríkjaforseti taldi tíma sínum betur varið og líklegri til árangurs en að ráðslaga um mál við Evrópuleiðtoga. 

Evrópuríkin í Evrópusambandinu hafa undanfarin ár ráðslagast með kyn og loftslag, sem Trump afgreiddi snyrtilega í innsetningarræðu sinni, sagði að kynin væru tvö og meint hlýnun af mannavöldum væri ekki aðkallandi úrlausnarefni ef hún þá væri til staðar. 

Undanfarin ár hafa Hútar í Yemen að undirlagi Íranstjórnar stundað sjórán og ráðist á skip allra Evrópuþjóðanna sem sátu G7 fundinn. Ekkert þeirra hefur brugðist við enda heyir Íran málið ekki undir kyn eða loftslag. Þessi ríki hafa látið ræningjaflokka Húta og þursaveldi klerkana í Íran snýta sér algjörlega hvar sem á er litið og ekki var frammistaða Bandaríkjanna betri gegn þursaveldinu meðan þeir Obama og Biden fóru með völd. Þeir sendu flugvélahlaða af peningum til þursaveldisins sem útdeildi þeim til skæruliðasveita sinna Húta, Hamas og Hesbollah. 

Ekki skrýtið að komið sé svo fyrir Evrópu, að þangað sé ekki litið ef gera þarf eitthvað sem máli skiptir. Álfan er algjörlega forustulaus og tilraunir Macron Frakklandsforseta til að sýnast eitthvað eru í besta falli brjóstumkennanlegar.

Nú þegar Ísrael sýnir það þor, að ráðast gegn meinsemd þursaveldisins í Íran þora Evrópuríkin ekki einu sinni að bregðast við og lýsa yfir fullum stuðningi við aðgerðir þeirra og aðstoða þá á alla lund. Aumingjaskapurinn er því miður algjör. 

Ýmislegt bendir til þess að Trump hafi ákveðið að girða sig í brók í þessu máli og hefði það mátt fyrr vera en það er annað mál. 

Bandaríkin ættu nú að hafa forustu um að þursarnir í Íran verði hraktir frá völdum og hvetja bandamenn sína í Evrópu og víðar til að standa saman gegn hryðjuverkaríkinu og linna engu fyrr en þursarnir hafa verið hraktir frá völdum. 

Bandamenn í annarri heimstyrjöld kröfuðst skilyrðislausrar uppgjafar Þjóðverja og þess verður nú að krefjast af þursastjórnnni í Íran. Ísrael á ekki að þurfa að gera það sem frjálsar lýðræðisþjóðir hefðu átt að gera fyrir löngu. 

 

 

 

Kyn- og trúvillta kirkjan, kyrjar lofsöng um Allah

Nokkrum tíðindum þykir sæta, að í drögum að nýrri handbók íslensku þjóðkirkjunar er hún með öllu orðin kyn- og trúvillt. 

Hæstiréttur Bretlands komst að þeirri niðurstöðu að vandlega athuguðu máli, að kynin væru bara tvö í samræmi við líffræðilegar staðreyndir. Íslenska þjóðkirkjan er ósammála og vill samsama sig hugmyndafræði transfræðinnar. 

Geir Waage þjóðkirkjuprestur í Reykholti til margra ára gagnrýnir þetta réttilega og vísar m.a. í orð Jesú, en boðskapur hans virðist koma handbókarhöfundunum lítið við og verður að víkja fyrir woke og transfræðinni. Enda hefur biskup sagt í podkasti hjá Pax vobis að Jesús sé bara milliliður.

Hvernig samræmist það kenningunni um þríeinan Guð?

Það dugar því ekki að breyta handbókinni það verður líka að breyta trúarjátningunni til samræmis við trúarskoðanir biskups. Vafalaust verður það næst á dagskrá þegar búið er að brjóta niður ýmsar fleiri meginstoðir kristilegrar boðunar.

Svo kemur óskiljanleg og dragúldin rússína í pylsuendanum. Lofsöngur til Allah. Hvaða erindi á það inn í handbók þjóðkirkjunnar. Telur íslenska þjóðkirkjan sig geta samsamað sig með þeim trúarhópi sem um aldir og enn í dag herjar á kristna söfnuði og stefnir að algjörum yfirráðum m.a. undirokun allra kristinna.

Sé sú læpuskaps ódyggð ríkjandi meðal presta þjóðkirkjunnar að hún láti þetta yfir sig ganga þá er best að biðja Guð að hjálpa sér eins og sr. Sigvaldi sagði þegar fokið var í öll skjól. Þá er spurning hvort ekki sé best að yfirgefa fleyið áður en strandkapteinar hinnar nýju boðunar sigla skipinu í strand kyrjandi lofsöng um Allah.  

 

Varar við boðun villutrúar biskups

Þorir Evrópa að standa með Ísrael gegn Írönsku ógninni?

Enn einu sinni kemur smáríkið Ísrael á óvart vegna áræðis, hugrekkis og útsjónasemi við að verja tilveru sína.  Þeir eiga raunar engan annan valkost en að berjast fyrir tilveru sinni. 

Árásin á kjarnorku- og hernaðarmannvirki Írana var svipuð snilldar aðgerð hernaðarlega og loftárásir Ísrael á Egyptaland, Sýrland og Jórdaníu við upphaf 6 daga stríðsins 1967 þegar flugfloti þessara ríkja var algjörlega eyðilagður. 

Árásin er í ætt við þegar Ísrael eyddi kjarnorkuuppbyggingu Saddam Hussein í Írak og Assads í Sýrlandi,þessi ríki höfðu lýst yfir gjöreyðingu Ísrael eins og Íran. 

Þegar Ísrael gerði að engu kjarnorkuáform einræðisherrana Saddam Hussein og Assads, fagnaði allur hinn vestræni heimur. NATO ríkin og fleiri lýstu stuðningi. 

Hvað nú. Hafa Vesturlönd döngun vit og áræði til að styðja Ísrael. Bandaríkjaforseti hefur lýst því yfir. Sama verður lesið út úr yfirlýsingum forsætisráðherra Þýskalands og framkvæmdastjóra NATO en vinstri maðurinn Keir Starmer forsætisráðherra Breta höktir í tómarúmi vesalmennskunar. 

Hvað með yfirlýsingaglaða utanríkisráðherrann og íslensku ríkisstjórnina. Munu þau samsama sig með öfgavinstri stjórnum Evrópu t.d.Noregi og Írlandi eða sýna hugdirfð og standa með eina lýðræðisríkinu fyrir botni Miðjarðarhafs og taka undir með frkv.stj. NATO,Bandaríkjaforseta og forsætisráðherra Þýskalands og styðja aðgerðir Ísrael til að verja sig og Íran hafi verið raunveruleg ógn, sem  braut alla samninga og alþjóðareglur við tilraunir til að koma sér upp kjarnorkuvopnum.

Ísrael og Íran: Hvað vitum við?

Loftslagsráðherrar

Loftslagsspekúlantar Norðurlanda komu saman í gær og líffræðingurinn sem er eins konar loftslagsráðherra Veðurstofunar og þó víðar væri leitað. Sagði það niðurstöðu sína og vina sinna, að vegna þess að hitabylgja hefði verið á Íslandi í maí yrði hitabylgja í júlí nánast óbærileg þar sem hiti gæti farið yfir 30 gráður. 

Þessi hópur sanntrúaðra ríkisstyrktra embættismanna vill í þessu sambandi vegna loftslagsvárinnar í júlí n.k. leggja sérstakar byrðar á almenning í landinu á þeim forsendum, að fólki líði best þegar það er skattlagt úr öllu hófi, svo elíta vanhæfra embættismanna hafi úr meiru að moða til að kaupa meira trjákurl og henda í sjóinn og annað því líkt. 

Einhvern veginn af óskiljanlegum ástæðum hefur það farið fram hjá þessum loftslagssnillingum að fyrstu 10 dagar júní eru 3 gráðum kaldari en meðaltalstölur síðustu 30 ára. Vafalaust mætti finna það út með sömu skarpskyggni og einkennir loftslagssérfræðinganna, að þetta þýði að kuldabylgja sem gæti verið í október mundi vera hrikalega köld jafnvel 20 stiga frost. 

Eða gilda sitthvor vísindin þegar talað er um hitabylgju eða kuldabylgju. 

Svo bætti það nú heldur betur gráu ofan á svart að strandkapteinninn Katrín Jakobsdóttir skuli hafa verið dregin á flot. Ekki af Davos eins og búast hefði mátt við heldur af WHO þeirri gjörspilltu stofnun Sameinuðu þjóðanna, sem hefur kostaði heimsbyggðina á aðra trilljón bara út af Kóvíd. Þar ætlar Katrín að hamast að almenningi með kröfum um aukna skattheimtu vegna þess hve heitt er á norðurhveli og að sjálfsögðu skýrslugerð um afleiðingar þess hræðilega hita sem við höfum þurft að búa við undanfarin ár vegna hnattrænnar hlýnunar af mannavöldum. 

Ja sér er nú hver sköpin sagði kellingin þegar hún spýtti tóbaksrullunni út úr sér eftir að hafa hlustað á Sölva Helgason segja frá því hvernig hægt væri að reikna barn í konu. 

Sagan kennir mér að átta mig á framtíðinni.

Gildi söguþekkingar fyrir stjórnmálamenn var viðurkennd á árum áður m.a. mótuðu þeir Winston Churchill forsætisráðherra Breta og Franklin Delano Roosevelt Bandaríkjaforseti mikilvæga framtíðarsýn m.a. með Atlantshafssáttmálanum 1942, þegar grimmilegt heimsstríð var í algleymingi.

Þeir höfðu þekkingu og framtíðarsýn. Þeir vissu, að það þurfti að uppræta óargadýr nasismanns og fasismanns ekkert minna var í boði hvað svo sem það kostaði í mannfórnum og hörmungum almennra borgara. Hið illa varð ekki þá frekar en nú með öðru en illu út að rekið.

Söguleg vanþekking, rangfærslur og lygi einkennir mikið af umræðunni um átök varnarsveita Ísrael.

Frá því að Sameinuðu þjóðirnar samþykktu sjálfstætt þjóðríki, Ísrael 14. maí 1948 ekki síst vegna snöfurmannlegrar framgöngu sendiherra Íslands, Thor Thors. Réðust Egyptaland, Jórdanía, Sýrland og Írak inn í Ísrael daginn eftir í þeim tilgangi að eyða Ísrael. Drepa átti alla Gyðinga sem ekki legðu á flótta.

Vestubakkinn svonefndur var aldrei tekinn af Palestínumönnum, hann var hluti Jórdaníu þangað til í 6.daga stríðinu 1967 þegar Jórdanir ásamt Egyptum og Sýrlendingum reyndu enn að útrýma Ísrael og Gyðingum.

Með Oslóarsamkomulaginu 1990 var Palestínumönnum boðið frjálst ríki og fullveldi, en í kjölfarið fylgdu gríðarlegar hryðjuverkaárásir m.a. sjálfsmorðssprengingar víða um Ísrael sem kostuðu fjölda Ísraelsmenn lífið og kom í veg fyrir að Oslóarsamkomulagið næði fram.

Árið 2000 var Palestínumönnum boðið það sama í Camp David og 96% af Vesturbakkanum en þeir höfnuðu því.

Árið 2008 bauð þáverandi forsætisráðherra Ísrael Ehud Olmert Palestínumönnum 94% af Vesturbakkanum, Austur Jerúsalem sem höfuðborg Palestínu og að gamli bærinn í Jerúsalem yrði undir alþjóðlegri stjórn. Því hafnaði Abbas leiðtogi Palestínumanna.

Eina skilyrði Ísraelsmanna í öllum þessum tilvikum var að Palestínumenn viðurkenndu Ísrael og gerður yrði friðar og vináttusamningur milli ríkjanna sem aðilar skuldbindu sig til að fylgja. Það hafa Palestínumenn aldrei verið tilbúnir að gera. Af hverju?

Af því að tilvera Ísrael er þeim þyrnir í augum. Þeir vilja ekki ríki við hlið Ísrael þeir vilja ríki án Ísrael. Meðan svo er eru engar forsendur til að semja um tveggja ríkja lausn. Hún gengur ekki upp nema öryggi fólks í báðum ríkjum sé tryggt og aðilar virði tilverurétt hvors annars.

Ef farið væri að kröfum utanríkisráðherra Íslands, varðandi tveggja ríkja lausn mundi það land sem helmingur Ísraelsbúa eiga heima vera 15 km. breitt, á svæði sem mikilvægustu innviðir Ísrael eru, m.a. Tel Aviv og Ben Gurion flugvöllurinn. Það gengur aldrei upp og var viðurkennt í Osló,Camp David og tilboði Ehud Olmert. En samt hamast Þorgerður.

Eftir hryðjuverkaárás Hamas á Ísrael 7.október 2023 með fjöldamorðum, nauðgunum, gíslatökum, þar sem ungabörn voru steikt lifandi áður en foreldrar þeirra voru drepin. Konu var hópnauðgað og drepin og líki hennar ekið um götur í Gasa þar sem lýðurinn svívirti lík hennar og hrækti á það. Hún hafði það eitt til saka unnið að tilheyra ákveðnum kynþætti.

Samt tala vestrænir fjölmiðlar ekki um kynþáttahatur eða þann skefjalausa ógeðslega rasisma, sem tilveruréttur Hamas byggir á. Það fólk sem veifar Hams fánanum ætti að athuga að með því er það að gerast talsmenn kynþáttahaturs,skefjalausasta rasisma í heiminum þar sem stefna Hamas er að drepa alla Gyðinga hvar svo sem þeir finnast.

Leiðtogi Palestínu Mahmoud Abbas er óhæfur gjörspilltur leiðtogi. Hann var kosinn til fjögurra ára fyrir 20 árum. Engar kosningar hafa verið í Palestínu síðan 2005. Abbas hefur það helst til frægðar unnið að hafa prófgráðu frá Moskvuháskóla, í endurskoðun á helförinni. Ríkisstjórn hans greiðir bætur til fjölskyldna hryðjuverkamanna. Þeim mun hærri eftir því sem hryðjuverkin kosta fleiri Gyðinga lífið.

Þegar Ísrael yfirgaf Gasa árið 2005, án skilyrða, taldi Ariel Sharon og ríkisstjórn hans að alþjóðasamfélagið mundi fordæma hverja árás Gasa búa á Ísrael og bregðast við. Þar skjátlaðist hinum aldna hershöfðingja illilega. Strax og Gaza búar voru frjálsir, hóf Hamas sem tók alla stjórn á Gasa að skjóta flugskeytum á Ísrael og senda konur og börn til að fremja hryðjuverk í Ísrael þangað til Ísrael lokaði landamærunum.

Gasa búar áttu alla möguleika á því að byggja upp nútíma ríki með frjálsum viðskiptum og nýsköpun. En þeir ákváðu að halda áfram að hata Ísrael og skipuleggja gjöreyðingu Gyðinga. Gasa búar fá stóran hluta flóttamannaaðstoðar Sameinuðu þjóðanna, en þeir teljast hafa verið „flóttamenn“ frá 1948 eða í 77 ár.

Þegar Al Kaída illyrminn frá Sádi Arabíu flugu á tvíburaturnana í New York o.fl byggingar í Bandaríkjunum var þjóðhátíð á Gasa og hryðjuverkunum fagnað.

Tveggja ríkja lausn býður ekki upp á frið og öryggi í þessum heimshluta í dag því miður, heldur þvert á móti. Þorgerður Katrín og vinstri sinnuðustu ríkisstjórnir Evrópu spyrja „Hvað í ósköpunum ætti svo sem að fara úrskeiðis,“ þegar þeir bera fram tveggja ríkja lausnina. Barnaskapur af sama tagi og þau sýna færist því miður í aukanna eftir því sem sögulausum stjórnmálamönnum á vinstri kantinum fjölgar.

Það er líka auðveldara að hætta lífi barna annarra en sínum eigin þegar dyggðaflöggun friðarins er dregin upp úr pússi utanríkisráðherra Íslands.

Ísraelsmenn eiga í stríði sem þeir hvorki hófu né vildu. Stríð er algjör viðbjóður og helvíti og verst þegar vígamenn fela sig bak við almenna borgara og hafa stjórnstöðvar undir skólum, barnaleikvöllum og sjúkrahúsum eins og Hamas gerir og hafast við í undirgöngum sem eru lengri en neðanjarðarlestarkerfi Lundúna.

Það hefur alltaf legið fyrir að stríðinu á Gasa lýkur sama dag og gíslum Hamas er skilað og aðrir taka við stjórn Gasa en hryðjuverkasveitir Hamas. Allt tal um þjóðarmorð eins og íslenski utanríkisráðherrann hefur ítrekað sakað varnarsveitir Ísrael um er því fáránleiki.

Ísrael varar fólk á Gasa við væntanlegum árásum, flytur borgara frá hættusvæðum og nú streymir aðstoð og vistir frá Ísrael til íbúa Gasa en ekki Hamas eins og það var meðan Sameinuðu þjóðirnar sáu um þessa neyðaraðstoð. Þá stálu Hamas liðar neyðaraðstoðinni og seldu íbúum Gasa á uppsprengdu verði til að geta haldið úti hernaðinum gegn Ísrael og borgað hermönnum Hamas.

Aðstoð eins og sú sem Gasa búum er veitt var ekki í boði fyrir íbúa Þýskalands þegar herir bandarmanna sóttu þar inn í síðara heimstríði. Þá datt engum skynsömum stjórnmálamanni í hug að tala um þjóðarmorð og hinir sem höfðu verið aftar á bekknum þegar drottinn útdeildi gáfunum datt það ekki heldur í hug ólíkt þeim stjórnmálamönnum í dag, sem á aftasta bekknum sátu og tala af algjöru þekkingaleysi um þjóðarmorð á Gasa.

Vandamálið sem við er að eiga í dag og allt frá 1948 þegar Ísraelsríki var stofnað er tilveruréttur lands Gyðinga í Ísrael. Meðan Palestínumenn viðurkenna ekki tilverurétt Ísrael og Gyðinga, þá eiga Ísraelsmenn ekki annan valkost en að berjast til sigurs á Gasa, á Vesturbakkanum á landamærum Sýrlands og Líbanon og við Húti hryðjuverkamennina í Yemen þar sem fjöldi barna deyr úr sulti daglega ólíkt því sem er á Gasa.

Allir þessir aðilar heimta fullan sigur og útrýmingu Gyðinga í Ísrael. Ísrael á því ekki annan valkost en að útrýma hinu illa hvað sem það kostar eins og nasismanum og fasismanum var útrýmt árið 1945. Við eigum að standa með þessu eina lýðræðisríki fyrir botni Miðjarðarhafs í þeirri frelisbaráttu.

Það er ekki hægt annað en að fordæma sögulausa,lýðsleikju stjórnmálamenn eins og Þorgerði Katrínu, Kristrúnu Frostadóttur og Ingu Sæland, sem taka sér stöðu með hryðjuverkasamtökum í beinni andstöðu við söguleg rök, rökræna framtíðarsýn, frið og skynsemi og viðhafa orðfæri sem eru fráleit og lögfræðingurinn í hópnum ætti að vita betur, en hún fer samt fram sem dólgslegast.

Það eru aumir leiðtogar sem láta berast með straumi lygafrétta og sögufalsana og rísa ekki upp til að bera sannleikanum vitni jafnvel þó það kosti nokkur skálaboð með vinstri elítunni í Brussel, Osló og Madrid.

AA samtökin 90 ára

AA samtökin eiga 90 ára afmæli í dag,en þ.10.júní 1935 setti annar stofnandi samtakanna Bill W tappann í flöskuna og tók hann ekkert úr eftir það. 

Þær eru ótaldar milljónirnar, sem hafa fundið leið frá áfengisfíkn og raunar fleiri fíknum með því að tileinka sér þá leið sem AA býður fólki upp á til að öðlast nýtt og betra líf. 

Eftir því sem þekkingu okkar fleytir fram, þá kemur betur og betur í ljós hvað áfengi er vondur vímugjafi og fer illa með fólk.

Þegar ég fann leiðina frá áfenginu í gegnum AA samtökin, þá fannst mér súrt í broti að áfengisneysla minnkaði ekkert hún jókst þrátt fyrir að ég væri hættur, það munaði ekkert um mig. 

Nú er öldin hins vegar önnur og áfengisneysla hefur minnkað til muna í heiminum svo mög að tímartiið "The Economist gerði það að umtalsefni þ. 3. maí s.l. Blaðið benti t.d. á að 3 af fjórum síðustu forsetum Bandaríkjanna notuðu ekki áfengi (bara Obama)og fólk sem er framarlega í viðskiptum t.d. Elon Musk láta áfengi algerlega eiga sig. 

Fólk hefur fundið, að það vinnur betur með því að drekka vatn eða sódavatn heldur en þegar það hefur áfengi um hönd. Aðrir finna að þeim líður betur og líta betur út og eru hamingjusamari þegar áfengið er látið eiga sig. 

Forstjóri stórfyrirtækis sagði við starfsfólkið sitt fyrir margt löngu, ég vil biðja ykkur um það ef þið viljið fá ykkur drykk í hádeginu að fá ykkur þá whisky, vodka eða gin eitthvað sem gerir að það finnst af ykkur áfengislykt þannig að viðskiptavinirnir viti að þið eruð bara full en ekki svona vitlaus.

En það eru samt allt of margir, sem eiga erfitt með að stoppa og leggja líf sitt og ástvina sinna í rúst. AA samtökin og boðskapur AA er ekki síður mikilvægur nú en hann hefur verið öll 90 árin sem samtökin hafa starfað.

Fólk sem á í erfiðleikum þarf að fá að vita, að AA samtökin eru ekki samtök fólks sem hneykslast á öðrum heldur eru til að hjálpa. Við sem erum þar höfum ekki úr háum söðli að detta og vondir hlutir voru farnir að gerast í okkar lífi við mættum öll of seint á okkar fyrsta AA fund og viljum því hjálpa öðrum til að finna leiðina sem fyrst.  

Vinslit ekki af ástæðulausu

Eitt helsta vandamál vestrænna ríkja er að þau eyða um efni fram og safna skuldum. Þetta voru þeir sammála um Trump og Musk þegar sá fyrrnefndi settist í forsetastól og sá síðar nefndi tók sæti í ríkisstjórn hans sem sparnaðarráðherra.

Musk var nokkuð ágengt og náði að spara 175 þúsund milljónir dollara í gegn um Skilvirknisstofnun(Doge)sína. Svo súrnaði samband þeirra og Musk fór úr ríkisstjórninni eftir að hafa gagnrýnt fjárlagatillögur forsetans. 

Fjárlagatillögur Trump gera ráð fyrir miklum ríkissjóðshalla og skuldaaukningu upp á 2.3 trilljónir dollara næsta áratug. Einmitt það sem Musk var ráðinn til að koma í veg fyrir. Í sjálfu sér eðlilegt að hann yfirgefi ríkisstjórn við þær aðstæður og sendi „vini“ sínum blendnar kveðjur fyrir að víkja svo gróflega frá kosningaloforðum sínum.

Musk fór líka háðulegum orðum um að stefna ríkisstjórnarinnar væri greinilega að trúa á að aukning þjóðarframleiðslu gæti komið í veg fyrir gjaldþrot alríkisins. Raunar sama stefna og síðasta ríkisstjórn Íslands fylgdi og sú sem nú situr virðist ekki ætla að takast að breyta þar nokkru um þrátt fyrir fögur fyrirheit.

Það er erfitt að vera ósammála Musk eða vera bjartsýnn á fjámálalega framtíð svo dæmi sé tekið Bandaríkjanna,Breta, Frakka.

Velferðarkerfið kostar um helming ríkisútgjalda og meirihlutinn t.d. í Bretlandi 53% þjóðarinnar fær meira frá ríkinu en þau borga í skatta. Alþjóðagjaldeyrissjóðurinn segir breska ríkið hafa fengið svo mikil lán að ekki sé svigrúm til að lána þeim meira.

Ef stjórnmálamenn hafa ekki hugrekki til að ráðast að rótum skuldavanda og eyðslustefnu, þá verða valkostirnir fljótlega lítt fýsilegir. Því miður hefur Trump nú sýnt það, að hann velur vinstri valkosti í ríkisfjármálum þegar nauðsynlegt er að spara eins og Elon Musk bendir á og komist að því hversu gjörólíkt það er að stjórna þjóðfélagi og fyrirtæki.

Stjórnmálastéttin hér á landi er gjörsamlega ábyrgðarlaus varðandi eyðslustefnu sína bæði í fjármálum ríkis og sveitarstjórna og því miður engin stjórnmálaflokkur sem hefur döngun í sér til að bregðast við vandanum meðan enn er svigrúm til þess. Við siglum því hraðbyrði og sennilega hraðar að feigðarósi en  þeir Trump, Starmer og Macron

Það sem Júpíter má leyfist ekki nautinu

Rómverskur málsháttur frá gullöld þeirra segir "Það sem Júpíter (Júpíter var æðsti Guð Rómverja)má leyfist ekki nautinu" (Quod licet Jovi, non licet bovi) Sambærilegur málsháttur íslenskur "Það sem höfðingjarnir hafast að, hinir ætla sér leyfist það."

Í Silfrinu á mánudaginn 2 júní, sagði dómsmálaráðherra sérstaklega aðspurð um hvort hún mundi beita sér í máli 17 ára kólumbísks drengs sem vísað hafði verið úr landi. 

Þorbjörg sagðist ekki mundu gera það. Hún sagði, að Alþingi hefði mótað ákveðið verklag og Útlendingastofnun sem væri sjálfstæð stofnun hefði með þetta mál að gera og ekki væri gert ráð fyrir pólitískum inngripum til að tryggja jafnræði milli allra. 

Dómsmálaráðherra lýsti því þar með yfir, að hún sem dómsmálaráðherra hefði ekki og gæti ekki haft aðkomu að þessu máli vegna þess regluverks sem Alþingi hefði mótað. 

Daginn eftir brá svo við að þingmaður Samfylkingarinnar Víðir Reynisson gerðist sekur um að brjóta gegn öllu því sem dómsmálaráðherrann Þorbjörg Sigríður Gunnlaugsdóttir sagði um málið í Silfrinu.

Hvað ætlar nú Þorbjörg Sigríður að segja og gera varðandi brot þingmannsins gegn þeim reglum sem Alþingi hefur mótað til þess að tryggja jafnræði milli aðila. Mun hún fordæma þessa ólögmætu og  glórulausu aðför þingmannsins að því regluverki sem hún lýsti svo vel í Silfurþættinum. Dómsmálaráðherra ætti að fara þar fremst í flokki og fordæma þessi vinnubrögð. 

Mun dómsmálaráðherra fordæma Víði þingmann fyrir að hafa beitt ósannsögli til að koma fram vilja sínum við framkvæmdastjóra Útlendingastofnunar? 

Dómsmálaráðherra hlítur að fylgja meginreglu laga um að það sama gildi um alla sem brjóta jafn gróflega af sér og Víðir. Nú reynir á hvort hún stendur með því sem hún sagði í Silfrinu eða ekki. Þar reynir á mannkosti þína ágæti dómsmálaráðherra.

Ef Þorbjörg gerir ekkert og hefur enga skoðun, þá er búið að snúa rómverska málshættinum á haus og reglan er þá: Það sem Júpíter má ekki leyfist nautinu eða:

Það sem dómsmálaráðherra má ekki má Víðir.

Er það svo Þorbjörg? 

Það sem höfðingjarnir hafast að hinir mega ekki gera það.

Samið var um 3.5% um launahækkun fyrir almenning í landinu til að hafa hemil á verðbólgunni Æðstu ráðamenn þjóðarinnar m.a. ráðherrar og alþingismenn hækka síðan ofurlaun sín um 5.6% eða rúmlega tvöfalt meira en verðbógumarkmið Seðlabanka Íslands.

Þetta fólk ætti að skammast sín og nú eru það Kristrún, Þorgerður og Inga sem mestu ábyrgðina bera og hafa tök á að breyta þessum ósóma. Er einhvers að vænta frá þeim?

Ekki skal hrófla við erlendum glæpamönnum

Utanríkisráðherra þeysir um þjóðlönd og álfur til að samsama sig með öfgafyllstu vinstri leiðtogum álfurnar til að ala á fjandskap við Ísrael, og á sama að beita sér fyrir virkri hernaðarlegri aðstoð við Úkraínu. Kristrún Frostadóttir krefst að ríkisútgjöld verði aukin til muna til að standa straum að aukinni vígvæðingu Íslands. 

Því miður hafa þær Kristrún Frostadóttir og Þorgerður Katrín Gunnarsdóttir breytt utanríkisstefnu þjóðarinnar án þess að nokkur umræða hafi farið fram á þingi eða annarsstaðar í þjóðfélaginu. Þær telja hentast að stjórna með með tilskipunum að hætti Donalds Trump. 

Í opnu bréfi sem hófsamari leiðtogar álfunar t.d. Mette Fredriksen forsætisráðherra Danmerkur og leiðtogi sósíaldemókrata, systurflokks Kristrúnar, skrifuðu er krafist að Mannréttindadómstóll Evrópu (MDE) taki í auknum mæli afstöðu með öryggi borgara í Evrópu  en ekki erlendum glæpamönnum og þeim verði vísað lóðbeint úr landi. 

En þær stöllur Kristrún og Þorgerður taka ekki þátt í því.Þær meta það ekki sem sitt hlutverk að standa vörð um öryggi íslendinga fyrir erlendum glæpamönnum sem sækja um alþjóðlega vernd eða hafa fengið hana. Kristrún segir að það séu önnur mál mikilvægari og gerir lítið úr tilraun 9 Evrópuleiðtoga til að auka öryggi eigin borgara. 

Fólkið í landinu veit að erlendir glæpahópar hafa hreiðrað um sig og brýna nauðsyn ber til að þeim verði vísað úr landi tafarlaust, til að tryggja öryggi borgaranna í landinu. Kristrún og Þorgerðar Katrín telja það megi bíða á sama tíma og Þogerður Katrín er upptekin við að hjúfra sig upp að öfgafulla sósíalistanum Pedro Sanches Spánarleiðtoga, forseta Írlands og öðrum öfgafullum vinstri mönnum í Evrópu. 

Hafi einhvern tíma verið gjá á milli stjórnmálastéttarinnar og almennings í landinu, þá kom það skýrst fram í niðurstöðu skoðanakönnunar sem Morgunblaðið birti í gær, þar sem aukinn meirihluti landsmanna krefst þess að dekrinu við hælisleitendaiðnaðinn verði hætt og þjóðin fái að búa í friði og hlú að sínu og gæta séreinkenna sinna sem þjóðar. Tungu og menningu. En á sama tíma hafnar ríkisstjórnin að taka þátt í sjálfsögðum óskum hófsamra ríkisstjórna í álfunni til að tryggja öryggi eigin borgara. 

Þá vita menn það og merkilegt nokk Inga Sæland og flokkur hennar styður þetta þrátt fyrir að flokksmenn skv.skoðanakönnun séu nánast allir á öndverðum meiði í samræmi við það sem formaður flokksins hefur haldið fram á undanförnum árum. Sé gjá á milli þjóðar og stjórnmálamanna, þá er hún alger í tilviki Flokks fólksins og kjósenda flokksins, sem töldu að flokkurinn stæði fyrir að gæta hagsmuna fólksins í landinu gegn hælisleitendaiðnaðinum.