Flottur stofnfundur kjördæmafélags.

Stofnfundur kjördæmafélags Frjálslynda flokksins  í Reykjavíkurkjördæmi norður var haldinn í kvöld. Tryggvi Agnarsson var kosinn formaður og með honum í stjórn einvalalið. Mikil eindrægni ríkti á fundinum. Umræður voru einlægar og hispurslausar um flokksmál og stjórnmál.  Um eða yfir 50 manns sóttu stofnfundinn.

Vegna fréttar Blaðsins í dag um að við Guðjón Arnar værum á leið inn í Sjálfstæðisflokkinn þá er það dæmalaus ekki frétt. Blaðamaðurinn sem skrifar sig fyrir fréttinni hefur áður stundað óábyrga fréttamennsku og verið með dylgjur í garð Frjálslynda flokksins. Dagblað sem vill láta taka mark á sér getur ekki verið með svona bullfréttamennsku eða óábyggilega blaðamenn. Staðreyndin er sú að það er engin fótur fyrir þessari frétt og það vissi blaðamaðurinn mæta vel þegar hún skrifaði fréttina.

Á morgun verður stofnfundur kjördæmafélags Frjálslynda flokksins í Reykjavík suður. Vonandi tekst hann jafn vel og þessi sem var í kvöld. Ég á raunar ekki von á öðru. Við sem störfum í Frjálslynda flokknum lærðum að starfa vel saman í kosningabaráttunni þó að stuttur tími væri til stefnu til að berja í brestina eftir makalausar illdeilur Margrétar Sverrisdóttur við atvinnuveitendur sína til 7 ára, og það jafnvel þó að hún væri á mun hærri launum frá þingflokki Frjálslynda flokksins en óbreyttir þingmenn voru á.

Verðbólgufjárlög?

 Í stjórnarsáttmála ríkisstjórnarinnar segir: Ríkisstjórnin leggur áherslu á ýtrasta aðhalds sé gætt í rekstri hins opinbera þannig að fjármunir skattgreiðenda séu nýttir sem best."

Ríkisstjórn og Seðlabanki hafa sett sér verðbólgumarkmið sem eru að verðbólga verði um eða innan við 2.5% á ári. Samt sem áður leggur ríkisstjórnin nú fram frumvarp til fjárlaga þar sem segir að útgjöld aukist um rúm 8% að raungildi. Það er rétt séu bornar saman áætluð niðurstaða ríkisútgjalda ársins 2007 og útjgöld skv. fjárlagafrumvarpinu.

Heildarútgjöld ríkisins skv fjárlagafrumvarpinu 2007 voru 357 milljarðar. Heildarútgjöld skv fjárlagafrumvarpinu 2008 eru 430 milljarðar. Aukning ríkisútgjalda eru því 73 milljarðar.  Aukning ríkisútgjalda skv. því er yfir 20%. Þó tekið sé tillit til verðbólgu á árinu þá aukast ríkisútgjöldin samt um 17%.  Svona mikil aukning ríkisútgjalda væru aðeins réttlætanleg ef horfur væru á verulegum samdrætti og atvinnuleysi. Svo er ekki. Þenslan er enn í hámarki og nú ætlar ríkisstjórnin að hella olílu á eldinn.

Það hlítur að vera umhugsunarefni fyrir markaðssinna í Sjálfstæðisflokknum hvort Sjálfstæðisflokkurinn sé á réttri leið með því að auka ríkisútgjöld svo mjög sem raun ber vitni.