Sjálfstæðisflokkurinn er stefnulaus í skatta- og ríkisfjármálum.

Í umræðuþætti í kvöld í Ríkissjónvarpinu kom í ljós af málflutningi fjármálaráðherra að Sjálfstæðisflokkurinn er bæði úrræða og stefnulaus í skatta- og ríkisfjármálum. Á 15 ára valdatímabili Sjálfstæðisflokksins hafa opinber gjöld vaxið sem hlutfall af þjóðartekjum úr 32% í 42%. Samkvæmt spá Seðlabankans segir að með óbreyttri stefnu verði opinber útgjöld sem hlutfall af þjóðartekjum orðið 49% árið 2009.  Hafa verður í huga að þjóðartekjur hafa á þessu tímabili vaxið hraðar en nokkru sinni fyrr þannig að opinberu gjöldin hafa fengið að vaxa aðhaldslítið eða aðhaldslaust.

Það alvarlega við þetta er að þó að opinber útgjöld hafi vaxið úr 32% í 42% af þjóðartekjum þá hafa aðeins 4% af þessari 10% aukningu runnið til velferðarmála. Það skýrir að hluta þann velferðarhalla sem hefur myndast í tíð ríkisstjórnarinnar. Hinn hluti skýringarinnar er að skattleysismörk hafa ekki hækkað í samræmi við breytingar á launum. Þessvegna er greiðslubyrði láglaunafólksins allt of þung og kaupmáttaraukningin hefur ekki komið til þess hóps.

Í Þættinum kom fram að Frjálslyndi flokkurinn einn flokka er með heilsteypta skynsamlega stefnu í skattamálum.

Við viljum afnema stimpilgjaldið strax. Öðrum flokkum vefst tunga um tönn hvað það varðar.

Við viljum ekki hækka fjármagnstekjuskatt. Við erum ekki skattahækkunarflokkur.

Við viljum hins vegar hækka skattleysismörk í 150.000 til að bæta hag láglaunafólks og bótaþega.

Enginn annar flokkur býður jafn ákveðna og jákvæða  skattastefnu fyrir neytendur og launafólk og Frjálslyndi flokkurinn.

 Við viljum taka á ríkisbákninu og henda burt óhófinu og bruðlinu.

Það var nokkuð dapurlegt að í lok þáttarins skyldi fjármálaráðherra missa algjörlega tengsl við raunveruleikann en það er e.t.v. eina vörnin sem Sjálfstæðisflokkurinn á til þar sem hann hefur svo gjörsamlega brugðist stefnu sinni og stuðningsmönnum sínum í þessum málaflokki.

Sjálfstæðisflokkurinn sagðist bjóða upp á Kóka kóla en bauð í raun upp á Stalín Kóla. Því miður er þessi flokkur orðinn að úrræðalausum ríkishyggjuflokki. Styrkur hans hefur falist í lélegri stefnumörkun Samfylkingarinnar og Vinstri grænna í þessum málaflokki. Leiðin er því að kjósa Frjálslynda. Sá sem vill koma böndum á ríkisútgjöldin á samleið með okkur en ekki Sjálfstæðisflokknum.

Frjálslyndi flokkurinn X-F. Fyrir skynsamlega hagstjórn, minni ríkisútgjöld og minni skatta.

Hvað eru brýnustu baráttumálin 1. maí.

Atvinnuöryggi og næg atvinna fólksins í landinu er brýnasta hagsmunamálið. Forsenda þess er að skynsamlega verði haldið á skipulagi atvinnumála þjóðarinnar og ríkisvaldið fari ekki í tryllta samkeppni á vinnumarkaðnum eins og verið hefur.  Ríkisvaldinu ber að draga saman í góðæri og vera tilbúið til að koma af afli inn á markaðinn þegar ver gengur. Þessa hefur ríkisstjórnin ekki gætt.

Ábyrgir stjórnmálaflokkar og stjórnmálamenn geta ekki og mega ekki búa sér til fyrirfram hindranir eða tálmanir sem geta leitt til fjöldaatvinnuleysis. Stefnumörkun Vinstri grænna um stóriðjustopp í ákveðinn árafjölda er glamuryrði. Því miður hefur Samfylkingin farið í humátt á eftir þessari stefnumörkun.

Enginn ábyrgur stjórnmálamaður ákveður fyrirfram að hann ætli frekar að velja fjöldaatvinnuleysi en vinnu fyrir fólkið í landinu. Allt tal um að við séum að misbjóða íslenskri náttúru með vatnsaflsvirkjunum er innantómt og rangt. 

Frjálslyndi flokkurinn vill varast óeðlilega þenslu og hefur þess vegna markað þá stefnu að gangast ekki fyrir frekari stórvikjunum á SV horninu meðan þensla er þar. Aðra ákvörðun verður að taka breytist ástandið. Þetta er eina ábyrga stefnan í atvinnumálum.  Við veljum vinnu fyrir fólkið í landinu. Vinna og velmegun. Stöndum vörðu um atvinnu fólksins í landinu og áunninn réttindi.

Verndum launakjör fólksins. Íslenskir launþegar til hamingju með daginin.

Hvað gerir Bjarni Ármannsson?

Bjarni Ármannsson á að baki farsælan feril sem bankastjóri Íslandsbanka nú Glitnis.  Bjarni tók við atvinnuvegasjóðunum gömlu m.a. Fiskveiðasjóði og Iðnlánasjóði þegar Fjárfestingarbanki atvinnulífsins var stofnaður. Bjarna tókst í samstarfi við Val Valsson áður bankastjóra Iðnaðabankans og Íslandsbanka að sameina þessar fjármálastofnunar. Það hefur verið gaman að fylgjast með Bjarna hann hratt að mörgu leyti af stað ýmsum góðum nýungum í fjármálalífi þjóðarinnar og með honum og síðan með einkavæðingu bankanna kom ferskur blær sem færði okkur úr steinrunnu kommisara kerfi ríkisvaldsins inn í nútímann.

Nú er spurningin hvaða verkefni tekur Bjarni Ármannsson sér fyrir hendur. Harðduglegur ungur maður eins og Bjarni er ekki að setjast í helgan stein. Það verður fróðlegt að sjá hvar hann drepur niður fæti næst.

Þróun fjármálastarfsemi hér á landi hefur verið góð og framsækin að öðru leyti en því að íslenskar fjármálastofnanir hafa ekki látið neytendur njóta þess ávinnings og hagræðingar sem orðið hefur. Bankaþjónusta er of dýr og þar þurfa menn að taka til hendinni. Það er brýnt hagsmunamál fólksins í landinu.