Ber ríkinu ekki að virða dóma Hæstaréttar

Bryndís Haraldsóttir þingmaður spurði fjármálaráðherra að því hvort stofnun, sem hann ræður yfir ÁTVR hefði brugðist við dómi Hæstaréttar og tekið aftur í sölu vörur sem þeir höfðu úthýst á eigin forsendum, sem Hæstiréttur dæmdi rangar og sagði að ÁTVR bæri að taka aftur í sölu. 

Daði Már Kristófersson ráðherra svaraði og upplýsti að ÁTVR hefði ekki tekið umræddar vörur í sölu og því miður bullaði síða um takmarkað húsrými ÁTVR, sem stenst raunar enga skoðun. 

Mundi fjármálaráðherra taka gilda afsökunarástæðu skattgreiðenda virðisaukaskatts, að skatturinn hefði ekki verið greiddur vegna fjárskorts, sem afsakaði greiðslufall.

Alvarlegri voru þó eftirfarandi ummæli ráðherranns:

"Samkvæmt íslenskum rétti er ekki sjálfgefið að þegar stjórnvaldsákvörðun er felld úr gildi leiði það til þess að fyrra ástandi skuli komið á, heldur er þýðing niðurstöðunnar undirorpin mati hverju sinni."

Í þessu máli var deilt um einfaldan hlut,hvort ákveðnar vörur skyldu vera til sölu í ÁTVR. Niðurstaða Hæstaréttar var að þær skyldu vera í sölu. Er eitthvað matskennt í niðurstöðu Hæstaréttar eða sem  heimilar svona orðhengilshátt ráðherra?  

Óneitanlega verður maður dapur þegar einn valdamesti maður samfélagsins fjármála- og efnahagsmálaráðhera heldur því fram, að ekki skuli farið að lögum og reynir auk þess að koma sér undan ábyrgð. 

Öll sú lögleysa sem nú viðgengst í þessu máli er á ábyrgð fjármála- og efnahagsráðherra sbr. 4.gr. laga nr.86/2011;

"Starfrækja skal sérstaka stofnun Áfengis- og tóbaksverslun ríkisins, ÁTVR, sem sinnir smásölu áfengis og heildsölu tóbaks undir stjórn ráðherra." 

Ekki þarf nokkur að velkjast í vafa, að stjórn ÁTVR er ráðherrann einn. Hann getur gert þær ráðstafanir sem hann vill og honum ber að gera til að fyrirtækið fari að lögum.

Spurningin er því: 

Ætlar ráðherra sem stjórnandi fyrirtækisins, að halda áfram að virða ekki dóm Hæstaréttar og baka ríkinu sífelld meiri bótaábyrgð auk þess vísvitandi að brjóta gegn lögum landsins og sýna af sér algjörlega siðlaust athæfi? 

Þegar þjóðskáldið Jónas Hallgrímsson spurði á sinni tíð höfum við gengið til góðs götuna fram eftir veg, þá hugsar maður til Þorgeirs Ljósvetningagoða eins merkasta lögmanns á Íslandi fyrr og síðar sem sagði:

"Það mun verða satt er vér slítum sundur lögin að vér munum slíta friðinn." 

Ætlar fjármálaráðherra að stuðla að því?