Kattasmölun

Ríkisstjórnin sat á 5 tíma löngum fundi í gær við að ræða um niðurskurð ríkisútgjalda og breytingar á stjórnarráðinu. Ekkert var samþykkt. Haft var þó eftir fjármálaráðherra að hlutir þokuðust í rétta átt.

Ég man ekki betur en jafnvægi ætti að nást milli tekna og gjalda á fjárhagsárinu 2011 en þá þarf að skera niður um rúma hundrað milljarða sem er fjárlagahallinn í ár. Fjármálaráðherra talaði hins vegar um að rætt hefði verið um á fundi ríkisstjórnarinnar að skera niður einhverja tugi milljarða. Það þýðir áframhaldandi skuldasöfnun ríkisins þvert á samkomulagið við Alþjóðagjaldeyrissjóðinn.

Varðandi breytingar á stjórnarráðinu þá hefur VG félag Skagafjarðar bent á að það sé hið mesta óráð og leggst eindregið gegn slíkri fásinnu enda takmarkaður sparnaður af því eftir því sem formaður félagsins segir. Formaðurinn nefnir þó ekki það mikilvægasta að ráðherra þeirra Skagfirðinga Jón Bjarnason hverfur úr ríkisstjórn komi til breytinganna.

Forsætisráðherra sagði að góður gangur væri í viðræðunum. Þar talaði forsætisráðherra um viðræður ráðherra á ríkisstjórnarfundi. Mér fannst þetta  kunnuglegt orðalag og þá rifjaðist upp fyrir mér að þetta er það sem ríkissáttasemjari segir iðulega þegar ekki hefur náðst samkomulag á fundum hans með hagsmunasamtökum.

Það bendir því allt til þess að forsætisráðherra þurfi að fara í víðtækari kattasmölun en áður ef ríkisstjórnin á að vera á vetur setjandi.

Athugasemdir

[Elle_, 10.5.2010 kl. 11:12]

Já, kattasmölun Jóhönnu Sig. hefur víst ekki gengið nógu vel.  Kettirnir eru víst of óstýrilátir og sjálfstæðir.  Og eru þó óskiljanlega að styðja Icesave-stjórnina.  

[Jón Magnússon, 10.5.2010 kl. 15:52]

Kattasmölun gengur aldrei vel. Ég hef aldrei heyrt að í Íslandssögunni hafi nokkrum dottið það í hug nema Jóhönnu Sigurðardóttur. Nógu erfiðlega hefur þjóðinni gengið að smala besta vini sínum sauðkindinni hvað þá köttum og það ekki einu sinni heimilisköttum.

[Elle_, 10.5.2010 kl. 21:49]

Já, satt Jón.  Jóhanna Sigurðardóttir er víst illskiljanleg og hvort sem viðkemur Evrunni, kattasmölun eða öðru.  Enda vel vitað að lygar eru ruglingslegar og þó maður pússli þeim vandlega saman.  En eins og kunnugt er, vinna samspilltir við lygapúsl daga og nætur.