Hagsmunir Reykvíkinga að Hanna Birna haldi áfram sem borgarstjóri

Í umræðuþáttum á Stöð 2 og Kastljósi kom það í ljós að Hanna Birna Kristjánsdóttir borgarstjóri ber af sem stjórnmálamaður og forustumaður í borgarmálunum.

Í kosningum eiga kjósendur að kjósa í samræmi við hagsmuni sína.  Það skiptir máli að traustur og öflugur málsvari og foringi leiði mál farsællega til lykta á næsta kjörtímabili.  Hanna Birna er eini valkosturinn vilji fólk kjósa hæfasta einstaklinginn sem borgarstjóra sinn. Málefnaleg frammistaða hennar sýnir það ótvírætt. Í störfum sínum sem borgarstjóri hefur hún  þegar  sýnt að hún er í fremstu röð þeirra sem gegnt hafa störfum sem borgarstjóra í Reykjavík.

Það er ljóst að hagsmunum Reykvíkinga verður vel borgið undir forustu Hönnu Birnu.

Mér finnst nauðsynlegt að hvetja kjósendur til að mæta á kjörstað og kjósa áframhaldandi forustu Hönnu Birnu með því að merkja X við D. 

Við þá mörgu sem hafa sagt mér frá óánægju sinni með einstaka frambjóðendur langar mig til að benda á að strika þá út en láta ekki slíka óánægju bitna á hagsmunum sínum með því að kjósa ekki eða kjósa þann versta til að refsa þeim besta. Það má aldrei verða valkostur kjósandans.

Stjórnmál snúast um hagsmuni og framtíðarmöguleika. Þess vegna skiptir máli að velja þann hæfasta til forustu. Allt annað er óafsakanlegt.  X-D

Athugasemdir

[Guðmundur Júlíusson, 28.5.2010 kl. 21:43]

Mikið rétt Jón, það er gríðarlega mikilvægt að hún fái að halda sínu starfi áfram, enda alls engin ástæða til að breyta þar sem mál eru í góðum farvegi!

[Jón Pétur Líndal, 28.5.2010 kl. 23:09]

Sæll Jón. Ég er nú algjörlega ósammála þér í þessu. Raunar finnst mér athyglisvert að þú telur kosningarnar snúast um hagsmuni. Venjulega hefur verið talað um að pólitík og kosningar snúist um sannfæringu. Þetta getur stundum farið saman, vissulega, en hvort sem viðmiðið er þá er mjög varasamt að kjósa Sjálfstæðisflokkinn í Reykjavík núna. Það þarf nefnilega að slíta á öll hagsmunatengsl og einblína á hag íbúa borgarinnar. Nú þarf borgin að gera það sem hún getur fyrir borgarana, ekki borgararnir að borga fyrir hagsmunapotið eins og venjulega.

Og að auki þá er nauðsynlegt að brjóta aðeins upp þetta hefðbundna flokkakerfi. Ég veit að mörgum gamalgrónum fjórflokksmönnum finnst það eins og verið sé að brjótast inn á þeirra prívateign ef nýr flokkur nær miklu fylgi. En eins og pólitíkin er á Íslandi í dag er svona innbrot eða uppbrot nauðsynlegt. Besti flokkurinn í Reykjavík er fyrsta framboðið sem á möguleika á að gera þetta þar sem það getur skipt einhverju máli og það má ekki fórna þessu tækifæri til þess eins að Hanna Birna geti haft það næs næstu fjögur árin. Hún er vissulega að einhverju leiti fórnarlamb þessara óvenjulegu aðstæðna, en ekki síður er hún fórnarlamb siðferðisbrests eigin flokks og meðflokksmanna sinna. Og úr því hún velur að hengja sig á þann flokk sem hún gerir er ekkert við því að gera þó hún fái illa útreið í þessum kosningum. Það er heldur ekki sanngjarnt gagnvart henni eða kjósendum að ætla að bjarga Sjálfstæðisflokknum í Reykjavík með henni einni, þegar enginn annar flokksmaður hefur svo mikið sem skammast sín fyrir sín afglöp. En ég viðurkenni að Hanna Birna er ein og sér ágæt.

Það verður nú líka að segjast eins og er að það eru nokkur veigamikil atriði á stefnuskrá Besta flokksins sem eru mjög áhugaverð, eins og t.d. að skilja á milli stjórnsýslu og stjórnmála, þeir vilja líka aðhaldssama fjármálastjórn sem þeir kalla ömmuhagfræði og þeir vilja vinna fyrir opnum tjöldum ef svo má segja, eða hafa spillinguna uppi á borðum eins og þeir kalla það.

Þetta eru nú allt saman mjög eðlileg og skynsamleg stefnumál, sérstaklega með tilliti til að þetta er óreynt fólk úr stjórnmálalífinu. Það er furðulegt að reyndir stjórnmálamenn í borginni skuli ekki vera löngu búnir að taka þetta allt saman upp. Og allt þjónar þetta hagsmunum og framtíð borgarbúa.

[Jón Magnússon, 28.5.2010 kl. 23:33]

Ég er sammála þér Guðmundur. Hvað sem líður flokkapólitík þá liggur það fyrir að það væri algjört óráð að hafna forustu Sjálfstæðisflokksins miðað við þá valkosti sem í boði eru.

[Jón G. (IP-tala skráð) 29.5.2010 kl. 00:08]

Skoðaðu á lodamal.is hvernig Hanna Birna breytti reglum afturvirkt. Það hefur verið ömurlegt að fylgjast með forystu hennar í þessum málum og hvernig hún mismunar borgarbúum. Hanna réttlætir síðan ítrekuð brot á jafnræðisreglunni með því að segja að góð stjórnsýsla kosti of mikið og bítur þar með höfuðið af skömminni í siðblindni sinni.

Hvenær ætlar Sjálfstæðiflokkurinn að losa sig við klíku vinnubrögðin og hvað varð um "Gjör rétt, þol ei órétt"?

Þeir sem kjósa xD í Reykjavík eru að kalla yfir sig vinnubrögð bláu handarinnar.

[Kristján (IP-tala skráð) 29.5.2010 kl. 09:40]

Já einmitt. Kjósa fólk eins og Hönnu Birnu sem tók þátt í þessu makalaus plotti sem kom Ólafi H. í borgarstjórastólinn. 7 mánuðum seinna kom í ljós til hvers leikurinn var gerður þegar Ólafi var skipt út fyrir Óskar Bergsson.Ansi dýrkeypt fyrir Reykvíknga hvernig Hanna Birna varð borgarstjóri.

[SeeingRed, 29.5.2010 kl. 12:42]

Gnarr fór á kostum að venju í sjónvarpinu í gær og hans nálgun dró skýrt fram hversu fastir dindlar fjórflokkanna eru fastir í gömlum hártogunum og puttabendingum, óbærilegt að hlusta á morfíslegt þrefið úr gamalkunnum skotgröfum. Hanna Birna virkar á barmi taugaáfalls í hvert skipti sem hún opnar munninn og fulltrúar Framsóknar og Frjálslyndra ullu óbærilegri syfju þegar þeir reyndu að tjá sig, Sóley Tómasar jafn þreytandi og venjulega eins og við var að búast. Nokkuð ljóst að Besti Flokkurinn er að fara að rúlla þessum kosningum verðskuldað upp og Jón Gnarr vonandi næsti borgarstjóri...allt betra en taugahrúgan Hanna Birna.

[Jón Magnússon, 30.5.2010 kl. 10:38]

Þú sem kallar þig Seeing Red, við þig vil ég segja að þú hefur sérkennilega sýn á umræður.  Hafi einhver fulltrúi skorið sig úr sem algjör froðusnakkur í þeim umræðum þá var það Jón Gnarr. En ef til vill ætlaði hann að hafa það þannig og sé það þannig stjórnmálaumræður sem fólk vill þá fékk það heldur betur nóg af þeim fyrir þessar kosningar.

[Jón Pétur Líndal, 30.5.2010 kl. 10:57]

Sæll Jón og takk fyrir að setja inn athugasemdina mína frá í fyrradag. En nú er staðan þannig hjá Reykjavíkurborg að það er Dagur B. Eggertsson sem ætlar að tryggja Besta flokknum völdin í Reykjavík næstu fjögur árin. Þannig að ef Jón Gnarr er algjör froðusnakkur, hvað má þá kalla hans besta bandamann Dag B. Eggertsson? Annars er ég búinn að blogga aðeins meira til að skýra út þessa stöðu sem nú er í borginni eftir kosningarnar og valmöguleikana við stjórn borgarinnar næstu árin, sjá hér.

http://jonlindal.blog.is/blog/jonlindal/entry/1061371/

[SeeingRed, 30.5.2010 kl. 14:48]

Út í hött svör Gnarr og fálæti var taktík notuð til að draga fram hversu innihaldslítið þrefið gamalkunna er og sú taktík gekk afar vel upp þegar upp er staðið og fulltrúar hefðbundnu flokkanna lítu æ kjánalegar út eftir því sem leiða kosningabaráttuna og hjal þeirra innihaldslausar en nokkru sinni áður. Stundum getur satíra dregið fram athyglisverða hluti...en það er náttúrulega ekki öllum gefið að skilja satíru eða átta sig á því sem henni er ætlað að skerpa á.

[Jón Magnússon, 30.5.2010 kl. 18:29]

Ég hef aldrei sagt að Jón Gnarr væri algjör froðusnakkur og ég ætla ekki að kalla Dag B. Eggertsson neitt.  Ég mun lesa bloggið þitt Jón til að sjá hvað þú hefur um þetta að segja.

[Jón Magnússon, 30.5.2010 kl. 18:32]

Ég er sammála þér séra minn að pólitískar umræður á Íslandi eru orðnar afar innihaldsrýrar og lélegar. Það kom fram í þáttum frambjóðendanna fyrir kosningar þar sem Hanna Birna var iðulega sú eina sem var með málefnalegar umræður. Hver ætlar að gera grín að fjölmiðlunum?