Talsmenn ranglætis

Aðstoðarbankastjóri Seðlabankans og forstjóri Fjármálaeftirlitsins boðuðu til blaðamannafundar í síðustu viku til að birta tilkynningu um það með hvaða löglausa hætti fjármálastofnanir ættu að innheimta ólögmæt gengislán. Úr hugarfylgsnum sínum tíndu þessir boðberar viðskiptaráðherra og ríkisstjórnarinnar hugmyndir um greiðslur neytenda af ólögmætum gengislánum.

Ekki væri gagnrýnisvert ef þessir sendiboðar ríkisstjórnarinnar færu að lögum og reglum í landinu en það gera þeir ekki. Þeir búa til viðmiðanir sem styðjast ekki við neitt annað en þeirra eigin hugarfóstur og fer raunar gegn leikreglum á lánamarkaði eins og sakir standa.

Talsmaður neytenda reynir þá að bæta aðeins úr og tínir annað hugarfóstur upp úr kolli sínum sem að vísu er hagstæðara lántakendum en er sama marki brennd og tilkynning tvíeykisins í Seðlabankanum og Fjármálaeftirlitinu að hún hefur enga lagalega skírskotun eða viðmiðun.

Staðreynd málsins er einföld. Lán í íslenskum krónum bundin gengisviðmiðun erlendra gjaldmiðla eru óheimil. Höfuðstóll lánanna er krónutalan sem tilgreind er á lánasamningnum að frádregnum innborgunum. Lánasamningurinn stendur að öðru leyti þar á meðal ákvæði um vexti. Þess vegna eiga fjármálastofnanir að gefa út greiðsluseðla í samræmi við dóm Hæstaréttar á grundvelli lánasamningsins þ.e. þeirra vaxta sem þar eru tilgreindir.

Lánasamningum gengisbundinna lána í íslenskum krónum hefur ekki verið vikið til hliðar nema hvað varðar ólögmætar breytingar á höfuðstól. Þess vegna er óskiljanlegt að aðstoðarbankastjóri Seðlabankans, forstjóri Fjármálaeftirlitsins og viðskiptaráðherra skuli mæla fyrir ólögmætum aðgerðum fjármálastofnana gagnvart skuldurum.

Hvað skyldu talsmenn norrænu velferðarstjórnarinnar þau Steingrímur og Jóhanna segja um þetta?

Stýrir Jóhanna núna velferðarstjórn fjármálafyrirtækjanna og erlendra kröfuhafa á kostnað fólksins í landinu? 

Það er athyglivert að þau Steingrímur og Jóhanna eru horfin úr umræðunni. En þau geta leyft sér það meðan kjölturakkar þeirra undir stjórn Gylfa Magnússonar viðskiptaráðherra boða löglausar aðgerðir fjármálafyrirtækja.

Athugasemdir

[Sigurjón Þórðarson, 5.7.2010 kl. 10:40]

Jóhanna hefur reynst illa en steininn tekur úr þegar hún er farin að beita ólöglegum tilmælum til þess að verja erlenda kröfuhafa.

[Predikarinn - Cacoethes scribendi , 5.7.2010 kl. 11:39]

Sæll Jón.

Þarfur og góður pistill  hjá þér.

Mér sýnist málið ekkert flóknara en þú einmitt lýsir í pistlinum. Mér virðist samt að höfuðstóllinn upphaflegi deilt í samningsmánuðina auk samningsvaxta sé viðmiðið um hver mánaðarleg afborgun skyldi vera frá upphafi láns miðað við nýfallna dóma Hæstaréttar.

Þannig hafa allir ofgreitt um svokallaða gengistryggingu. Þá ofgreiðslu hljóta menn að eiga inni hjá viðkomandi lánastofnun með fullum dráttarvöxtum fram á þennan dag - ekki satt ? Síðan geta menn, þegar lánastofnanir greiða þá ofgreiddu summu út, ákveðið hvort þeir leggi upphæðina ásamt dráttarvöxtunum inn á núverandi höfuðstól.

Vextir á óverðtryggð útlán sem kerfisrakkarnir leggja til eru vextir sem vaxa eða minnka í fylgd með verðbólgu hvers tíma. Þannig eru þeir að endurspegla nokkurs konar verðtryggingu. Samkvæmt því, þá eru slíkir vextir í beinni andstöðu við dómana umræddu ekki satt þar sem það var sérstaklega nefnt að ekki mætti leggja nokkurs konar verðtryggingu á höfuðstólinn i stað gengistryggingarinnar.

[Edda Karlsdóttir, 5.7.2010 kl. 12:00]

Rétt hjá þér. Það er með ólíkindum hvað fólk er búið að þvæla með það fram og aftur fyrir hvaða vexti eigi að nota á lánin þar sem það eina sem var ólöglegt var gengistryggingin. Ég hef verið að velta því fyrir mér hvað hefði gerst ef gengið hefði haldist óbreytt allan lánstímann (kannski óraunhæf hugsun) en hvað hefðu bankarnir og lánastofnanir gert þá? Fyrir mér er það kristaltært að þeir tóku stöðu gegn krónunni einmitt í þeim tilgangi að ná sem mestum hagnaði út af þessum lánum því ef gengið hefði verið óbreytt á lánstíma hefðu þeir varalítið vælt og volað eins og þeir gera núna!

[Inga Sæland Ástvaldsdóttir, 7.7.2010 kl. 09:25]

Hjartanlega sammála þér Jón, mjög góð og sönn lesning.

Nú þurfum við bara að safna saman eins mörgum og á Menningarnótt til að mótmæla þessum gjörningum öllum um leið og við losum okkur við allt þetta vanhæfa lið sem greinilega er haldið einbeittum brotavilja.