Enn einn hring

Fjórum sinnum hefur ríkisstjórnin boðað til blaðamannafunda og sagt að nú væri kynnt hin endanlega lausn í málum skuldsettra einstaklinga. Jafn oft hafa landsmenn orðið fyrir vonbrigðum með boðskapinn.

Tveimur árum eftir hrun hafa höfuðstólar verðryggðra lána hækkað gífurlega vegna ímyndaðra hækkana, sem reiknaðar eru út á Hagstofunni, þrátt fyrir að engin virðisauk mælist í þjóðfélaginu heldur þver öfugt.  Það þýðir að verið sé að taka frá skuldurum og gefa fjármagnseigendum.

Verðtryggingarbullið og aðrar sérokurleiðir í lánamálum eru að éta upp eignir venulegs fólks. Jóhanna og Steingrímur hafa horft á með velþóknun ásamt ömurlegustu verkalýðshreyfingu veraldar.

Óneitanlega er það sérkennilegt að þau Jóhanna og Steingrímur skuli standa varðstöðuna með fjármagnseigendum. Raunar er mér sagt að Jóhanna hafi þegar byrjað þá varðstöðu í ríkisstjórn Geirs H. Haarde fyrir tveim árum síðan.

Þegar ríkisstjórn hefur misst traust þá er erfitt að ávinna það aftur.  Stefnulaus og úrræðalaus forsætisráðherra ætlar samt að freista þess enn einu sinni að kaupa sér vinsældir með því að spila einhverju út hvað svo sem það verður. 

En það dugar ekkert minna en að afnema sérleiðirnar í lánamálunum. Það verður að afnema verðtrygginguna. Það verður að reikna höfuðstólana aftur til október 2008. Eitt verður yfir alla að ganga í því efni.   

 

Athugasemdir

[Halldór Jónsson, 6.10.2010 kl. 22:30]

Hvað með að flytja höfuðstólana frá 2008 til dagsins í dag. ´Það þarf ekki að eyðileggja alla lífeyrissjóðina eða kála öllum sparnaði í landinu með því að afnema verðtrygginguna. Vertu ekki svona einsýnn að horfa alltaf bara á skuldara. Einhverjir verða að leggja fyrir svo aðrir geti fengið lánað.

[Jón Magnússon, 7.10.2010 kl. 09:36]

Verðtryggingin hefur ekki megnað að varðveita sparnað í landinu. Nú flæðir sparifé landsmanna út úr bönkum. Auk heldur fann fólk almennt annað ráð til að spra en að geyma peninga í bönkum þannig að verðtryggingin hafði ekkert með það að gera. Lífeyrissjóðirnir hafa lagt drjúgan skerf að því að eyðileggja sjálfa sig og færa má rök að því að þeir væru betur settir hefði verðtrygging aldrei komið til.  Ég horfi ekki bara á skuldara. Það verður að vera jafnvægi í þjóðfélagi og það er það ekki meðan við erum með svívirðu verðtryggingarinnar. Hún er að eyðileggja eina að grundvallarbaráttumálum Sjálfstæðisflokksins, séreignastefnuna á íbúðarhúsnæði.

[Einar Karl, 7.10.2010 kl. 09:51]

Verðtryggingin er böl. En það var líka böl þegar allur sparnaður fólks var étinn upp af verðbólgu hér á árunum 1960-1983. Þá var óbeint stunduð eignaupptaka á peningum og fólk fékk niðurgreitt húsnæði.

Hvenær keyptir þú þína fyrstu íbúð, Jón?

Íslenska krónan er gallagripur. Ekki bara í mikilli verðbólgu, líka þegar hún var of sterk og fólk skuldsetti sig mikið, þjóðin taldi sig vera ríkari en hún í raun og veru var.

Ein lausn sem gæti leyst þetta er aðild að Evrópusambandinu og Evru. Þá gætu börn okkar og barnabörn vonandi fengið meiri stöðugleika og lán á miklu betri og fyrirsjáanlegum kjörum.

[Jón Magnússon, 7.10.2010 kl. 13:22]

1967

Ég er ekki að tala um sjálfan mig Einar Karl. Ég skulda ekki neitt.

 Mér finnst þetta bara svo himinhrópandi óréttlæti að ég get ekki annað en mótmælt þessari aðför að unga fólkinu í landinu. Að sjálfsögðu verður að vera gjaldmiðill í þessu landi sem er í lagi.

[Kristinn Daníelsson, 7.10.2010 kl. 14:08]

Ekki skal ég mótmæla því að verðtrygging sé eitthvað sem má missa sín. En Einar Karl, aðild að Evrópusambandinu og Evra munu ekki lækka vexti á Íslandi.

Nú hugsa sumir sem þetta lesa að ég verði að færa rök fyrir þessari fullyrðingu. Þeir sem fullyrða að vextir muni lækka hafa ekki fært önnur rök fyrir fullyrðingum sínum en þau að vextir séu lægri innan Evrópusambandsins. Í mínum augum er ekkert sem bendir til þess að tilkostnaður við bankastarfsemi á Íslandi breytist við það að að taka upp evru. Hvort sem það verða Íslenskir bankar eða erlendir skiptir ekki máli.

[Jón Magnússon, 8.10.2010 kl. 10:59]

Evra er að vísu í augnablikinu fjarlæg, en með henni mundu vextir vera mun lægri en þeir hafa verið á Íslandi allt frá því að hún var tekin upp fyrir 10 árum síðan. Það má skoða með því að bera saman vexti hér á landi og á Evru svæðinu á þessu tímabili.

Tilkostnaður við bankastarfsemi er allt of mikill hér á landi og sérstaklega núna þegar fjármálakerfið hefur skroppið saman.  Það ræður hins vegar ekki endilega vaxtastiginu. Verð á peningum fer eftir lögmálinu um framboð og eftirspurn og þannig voru íslensku fjármálafyrirtækin sem voru á markaði á Norðurlöndunum og í Bretlandi að bjóða lán t.d. í Danmörku á mun lægri prósentu eða Evru vaxtastigi og enga verðtryggingu á meðan þau voru að bjóða á Íslandi hærri vexti og verðtryggingu ofan á það vegna þess að stjórnvöld og borgarar þessa lands hafa heimilað sérgróðaöflunum að misbjóða sér með ótrúlegum hætti.