Af hverju ekki biðraðir?

Fjölskylduhjálpin, Þjóðkirkjan, Mæðrastyrksnefnd og ýmsir aðrir frjálsir velgjörðarhópar dreifa matvælum og öðrum nauðsynjum til fátækra. Eðlilega myndast biðraðir vegna þess að það geta ekki allir fengið afgreiðslu í einu. Ekki frekar en í bönkum.  Önnur samtök velviljaðs fólks gefur vinnu og matvæli til að þurfandi fólk fái heitan mat.

Umræðan um þetta mikla, góða og fórnfúsa velgjörðarstarf sem þessir aðilar sinna hefur verið á villigötum. Einblínt er á biðraðir og því haldið fram að svona lagi finnist ekki í nágrannalöndum okkar. Það er rangt þó að biðraðir geti þar verið með öðrum hætti. Þá er því haldið fram að þetta sé til skammar. Það er líka rangt. Það er ekki til skammar að til skuli vera fórnfúsar hendur sem vilja deila gæðum með okkar minnstu bræðrum og systrum. Þvert á móti.

Nú sjá margir ekki aðra lausn en búa til stofnun hins opinbera, ríkis eða sveitarfélaga nema hvort tveggja sé til að úthluta opinberum greiðum og velgjörðum. Er það endilega betra en það fyrirkomulag sem hefur þróast hér?

Sjálfboðaliðastarf í velferðarmálum leysir mikinn vanda og sparar mikil útgjöld. Það er reynsla allra þjóða sem þekkja til víðtækrar samhjálpar á þeim grundvelli. Víða er því talað um að hið opinbera veiti aðstoð og styrki til samtaka sem vinna að velferðarmálum og vinni með því með markvissari hætti og ódýrari að því að útdeila gæðum en með því að stofna opinbert apparat.

Er einhver þörf á því að eyðileggja gott og óeigingjarnt hjálparstarf  á grundvelli ríkishyggjunnar í stað þess að styðja við hjálparstarfið þannig að þeir sem að því standa geti unnið enn betur. Hvort er líklegra til að gagnast betur þeim sem á þurfa að halda?

Athugasemdir

[hilmar jónsson, 31.10.2010 kl. 21:48]

Hvers konar endemis rugl er þetta í þér maður ? Hver er að eyðileggja hvað ?

Það hefur reyndar verið uppi krafa um það að ríki eða sveitafélög komi meira að þessarri aðstoð, og væri það alls ekki óeðlilegt, ekki síst í ljósi þess hvernig flokkur þinn hefur mergsogið þjóðfélagið .

[Jóhanna Magnúsdóttir, 1.11.2010 kl. 12:07]

"Það er ekki til skammar að til skuli vera fórnfúsar hendur sem vilja deila gæðum með okkar minnstu bræðrum og systrum. Þvert á móti."

Það hljóta allir að samsinna þessu. 

En er nokkuð verið að deila á hjálparsamtökin eða fórnfúsar hendur, Jón?  Aðeins það að í landi sem er í raun ein stór matarkista - með fersku vatni, kjöti og fiski, skuli fólk þurfa að standa (og í sumum tilfellum berjast) í röðum til að fá matarbita?  Ég held að ádeilan sé m.a. vegna hins breiða bils sem hefur myndast milli ríkra og fátækra, sem hefur því miður breikkað ansi mikið undanfarin ár. 

Ég verð að viðurkenna að ég myndi ekki vilja standa í biðröð eftir mat, e.t.v. í nokkra klukkutíma - í kulda og trekki.  Ísland er "The land of plenty"  það þarf bara að komast á jafnari dreifing.  

Ef ég vil ekki sjálf þurfa að standa í matarbiðröðinni - þá væntanlega, miðað við kristilegt siðgæði, óska ég náunga mínum þess ekki heldur. 

Samt sem áður, að þessu sögðu, þá er vandamálið til staðar - fólk á ekki fyrir mat og þarf að þiggja - en spurning hvort að það eru til aðrar lausnir en þessi biðraðalausn,  meðan verið er að vinna að réttlátara þjóðfélagskerfi. 

[Guðmundur (IP-tala skráð) 1.11.2010 kl. 12:10]

'i þessu litla samfélagi okkar á ekki að vera þörf á matarúthlutunum það er lögbundin framfærsluskylda og hún er líka stjórnarskrárvarinn  Ríkið hefur eytt mikilli orku í að bjarga fjármálafyrirtækjum nú seinast VÍKJANDI Lán til Byrs en vísar síðan okkar minnstu bræðrum og systrum í biðröð hjá Hjálparsamtökum þar sem fólk greiðir fyrir matinn með öri á sálinni

[Jón Magnússon, 1.11.2010 kl. 12:11]

Hilmar spurningin er hvernig það verður gert. Það er mergurinn málsins. Flokkar mergsjúga ekki heldur einstaklingar. Ég veit ekki betur en þeir sem tóku stærstan skerfinn hafi verið helstu styrktaraðilar Samfylkingarinnar. En það þarf ekkiað þýða að Samfylkingunni verði kennt um nema um óeðlilega fyrirgreiðslu þeirra hafi verið um að ræða.

[Jón Magnússon, 1.11.2010 kl. 12:14]

Þakka þér fyrir Jóhanna. Það vill engin standa í biðröð og það stendur engin í biðröð nema hann þurfi á því að halda.  Það sem ég er að benda á er að ríkisvaldið komi að með aðstoð við hjálparsamtök t.d. bæti aðstöðu og ýmislegt annað þannig að yfirbragðið geti verið betra fyrir þá sem þurfa að standa í biðröðinni og líka fyrir þá sem standa að þessu hjálparstarfi. Það þarf svo lítið til að gera þetta miklu betra.

Við verðum að hugsa þetta vel vegna þess að vandamálin eru ekki að fara frá okkur því miður. Miðað við sama áframhald þá á þetta eftir að verða ennþá verra.

[Valdimar H Jóhannesson, 1.11.2010 kl. 13:35]

En það er ekki þar með sagt Jón að engin aðstoð megi koma frá hinu opinbera. Félagsleg samhjálp verður alltaf að vera til staðar.

[Jón Magnússon, 1.11.2010 kl. 13:38]

Guðmundur við gerum okkur báðir grein fyrir lögbundnum skyldum ríkisins. Ég hef talið að hjálparsamtökin væru að gera meira.

[Jón Magnússon, 1.11.2010 kl. 13:39]

Að sjálfsögðu verður að vera opinber samhjálp Valdimar. Það sem ég er að vekja athygli á er að það skiptir máli að skapa svigrúm fyrir fórnfúsar hjálpandi hendur og aðstoða fólk við að gefa af góðum hug og hjarta.

[Skeggi Skaftason, 1.11.2010 kl. 16:35]

Ef við förum eftir stefnu Sjálfstæðisflokks, sem vill alls ekki hækka skatta á þá sem eiga meira en nóg fyrir sig og sína (og vill nú skv. nýjustu fréttum draga tilbaka allar skattahækkanir sitjandi stjórnar) þá förum heldur ekki að hækka framfærslubætur til þeirra sem ekki ná sjálfir að vinna sér inn fyrir helstu nauðþurftum.

Við ættum kannski að draga úr framfærslubótum, og sjá hvort þeir ríku og góðu séu ekki til í að veita frekari ölmusur til þeirra sem fátækari eru?

[Kristján P. Gudmundsson, 1.11.2010 kl. 19:40]

Þetta var gott blogg hjá þér, Jón Magnússon. Það veitir ekki af að hvetja fólk til dáða, þegar við búum við liðónýta ríkisstjórn, sem engu kemur í verk nema afskrifa skuldir óreiðumanna.

Kv.,KPG.

[Rannveig H, 1.11.2010 kl. 20:19]

Ég skil þig ekki alveg Jón,er þetta spurning um fórnfúsar hendur eða fólkið sem þarf að þiggja hjálpina. Ég held að allir geti verið sammála um að við eigum ekki að búa þannig að fólki að það þurfi að fá gefins mat hjá fórnfúsum höndum,enn og síður að það skuli vera fréttaefni fórnfúsu handana hvað mikið sé gefið í hverjum einasta fréttatíma. Nú er svo komið að fórnfúsu hendurnar eru farnar að auglýsa þjónustuna eins og um eitthvað samkeppnisfyrirtæki um fátæktina.

[Rannveig H, 1.11.2010 kl. 21:33]

Þarna átti að standa að fólk ætti Ekki að þurfa að fá gefins mat.

[Jón Magnússon, 1.11.2010 kl. 21:35]

Skeggi ég tel að með því að hækka skatta yfir öll velsæmismörk hafi verið dreginn þróttur úr þjóðinni. Ég vil lækka skatta verulega bæði á fólk og fyrirtæki. Virðisaukaskatturinn þarf líka að lækka. Með því leysum við öfl úr læðingi sem eru mikilvægari til að stytta biðraðir eftir matargjöfum en sú aðferð að ríkisvæða alla velferð.

[Jón Magnússon, 1.11.2010 kl. 21:37]

Þakka þér fyrir Kristján því miður veldur þessi liðónýta ríkisstjórn því líka að hjól atvinnulífsins eru að stöðvast.  Biðraðir eftir mat hjá hjálparstofnunum yrðu mun styttri ef ríkisstjórnin þvældist ekki fyrir. Bara ef hún léti þá sem vilja byggja upp heiðarlegan atvinnurekstur í friði og léti gjaldþrota fyrirtækin fara á hausinn þannig að hægt sé að byrja heiðarlega á nýjan leik og koma á eðlilegri samkeppni.

[Jón Magnússon, 1.11.2010 kl. 21:41]

Það verður alltaf þannig því miður Rannveig að einhver hluti borgaranna þarf að þiggja aðstoð. Það er svo annað mál hvernig þessir gölnu fréttamiðlar haga sér og stuðla að lágkúru í umræðunni. Ég vissi ekki að það væri til svo mikið að það þyrfti að auglýsa fórnfýsina til að fá aðsókn. Það er nýtt fyrir mér. Hvað ert þú að tala um þar Rannveig.

[Guðrún (IP-tala skráð) 1.11.2010 kl. 22:17]

Mér finnst það smekklaust að fjölmiðlamenn taki myndir af fólkinu er að bíða í þessum biðröðum. Fólkið reynir að draga úlpuhettur ofan í augu og snúa baki í ljósmyndarana en samt er eins og enginn átti sig á að fólk vill ekki láta mynda sig við þessar óviðurkvæmilegu aðstæður sem öllum er vorkunn að þurfa að standa í.

[Jón Magnússon, 2.11.2010 kl. 09:05]

Rannveig hvort sem okkur líkar það betur eða verr þá er það alltaf þannig að það eru einhverjirsem þurfa að fá gefins mat. Meira að segja í mesta velmegunarríki heims. Síðan koma upp aðstæður eins og t.d. vegna hamfara. Við erum mitt í slíkum hamförum því miður og lítið gert af skynsemi til að stýra út úr þeim.

[Jón Magnússon, 2.11.2010 kl. 09:07]

Þarna er ég sammála þér Guðrún. Það er ótrúlegt hvernig ákveðnir fjölmiðlar gera út á eymdina og gera um leið lítið úr fólki. Þetta á við víðar en hvað varðar biðraðirnar.

[Rannveig H, 2.11.2010 kl. 15:55]

Það eru ekki bara fjölmiðlar sem gera út á eymdina, það er heldur ekki tilviljun að fjölmiðlar virðast hafa aðsetur hjá einum hjálparsamtökum frekar en öðrum.