200 innheimtulögfræðingar

Meiri hluti ríkisstjórnarinnar á Alþingi, Þráinn Bertelsson fór mikinn í ljósvakamiðlum í kvöld vegna Kvikmyndaskóla Íslands og gerði kröfu til að hann fengi rekstrarfé úr ríkissjóði og sagði það merkilegra en mennta 200 innheimtulögfræðinga.

Kvikmyndaskóli Íslands er allra góðra gjalda verður  og vel getur verið rétt að skólinn fái aukið fé úr ríkissjóði. Það er óviðkomandi námi annars fólks.  Ég veit ekki til þess að nokkur skóli á Íslandi mennti innheimtulögfræðinga eða það sé sérstök námsbraut.  Þráni Bertelssyni finnst hins vegar rétt að gera lítið úr lögfræðinámi og það er  í samræmi við aðra sleggjudóma þessa manns.

Ekki er hægt að áfellast Þráinn Bertelsson fyrir vanþekkingu í skóla-og menntamálum en hitt ætti hann að vita, að hann er í sama stjórnmálaflokki og menntamálaráðherra og gæti því borið erindi Kvikmyndaskóla Íslands beint undir hana. Hann gæti komið fordómum sínum varðandi lögfræðinám á framfæri milliliðalaust og gert kröfur varðandi Kvikmyndaskólann. Þráinn er altént líftaug gjörspilltrar ríkisstjórnar, sem mundi vafalaust ekki muna um einn kepp í sláturtíðinni þegar svo mikilvægur maður á í hlut.

Þráinn getur því sparað sér þann pópúlísma og sýndarmennsku sem hann viðhafði í sjónvarpi í kvöld en unnið vinnuna sína á þingflokksfundum Vinstri grænna en undir þá heyra þessi mál.

Skrýtið að þessi heiðurslaunþegi skuli aldrei geta opnað munninn án þess að veitast að öðru fólki og reyna að gera lítið úr því.

Athugasemdir

[Sigurður Haraldsson (IP-tala skráð) 3.8.2011 kl. 00:17]

Svona, svona Jón ekki taka þetta svona til þín.

[Jón Magnússon, 3.8.2011 kl. 10:14]

Ég tek það ekki til mín Sigurður. Mér fannst þessi ummæli þingmannsins hins vegar í samræmi við þann hroka sem hann almennt viðhefur gagnvart þeim sem hann telur óæðri sér. 

[Marinó G. Njálsson, 3.8.2011 kl. 12:16]

Jón, þú veist að samkvæmt Þráni sjálfum er 5% þjóðarinnar fávitar en við vitum ekki hvorum hópnum hann tilheyrir að eigin mati. Ég tel að það skemmtilega við þjóðina sé hvers misþroska við erum, þ.e. við höfum hvert um sig náð að þroska einstaka hæfileika sem öðrum gengur ekki eins vel með og erum svo algjörir klaufar með eitthvað sem jafnvel barn framkvæmir áreynslulaust.

Annars er ómerkilegt að fara í einhvern hanaslag um það hvaða menntun er merkilegri en önnur.  Það hlýtur að velta á því til hvers hver og einn notar sína menntun.  Mér virðist t.d. sem grunnskólamenntun sé merkilegri en flest annað, þar sem allir nýta sér hana!  Ég veit um lögfræðing sem gerðist tónlistarstjóri, kennara sem er sölumaður, lækni sem er forstjóri, leikara sem gerðist borgarstjóri, kvikmyndagerðarmann sem er dagskrárgerðarmaður í útvarpi og svona mætti lengi telja.  Þýðir það að menntun þeirra hafi ekki verið nógu merkileg til að starfa við fag sitt eða var menntunin einmitt nógu merkileg til þess að geta unnið við margt annað en sem fagmenntunin segir til um?

[Erlingur Alfreð Jónsson, 3.8.2011 kl. 14:07]

Þráinn hefur sennilega smitast af hrokanum af ritstjóranum í Hádegismóum. Eða kannski er þetta bara húsasótt í Alþingishúsinu?

[Dexter Morgan, 3.8.2011 kl. 15:31]

Hverjum er ekki sama um þessa ónytjunga sem fara í þennan skóla, ef þeir hafa ekki efni á því að reka skólann á þeim forsemdum, þá á bara að leggja hann niður. Eina sem nemendur læra þarna er að; svo ég taki nú orð eins fremsta leikstjóra þjóðarinnar, Friðriks Þórs, er að BETLA.

Þegar námi líkur, byrja þeir að belta peninga til að búa til myndir og á því lifa þeir og hrærast alla tíð.

[Jón Magnússon, 4.8.2011 kl. 09:55]

Þetta er hárrétt hjá þér Marinó.  Í þjóðfélagi nútímans skiptir máli að einstaklingurinn hafi menntun sem gerir hann hæfan til að takast á við fjölbreytt þjóðfélag og breytingar í lífinu. Talað er um að venjulegur maður megi búast við því að þurfa að skipta um starfssvið 3-4 sinnum á ævinni. Ég vil ekki dæma um hvaða menntun er merkileg og hver ekki. Spurning er hins vegar hvað eiga skattgreiðendur að borga og hvað mikið. Hvort sem okkur líkar betur eða verr þá borga þeir of mikið í dag og þess vegna verður að spara í menntakerfinu hvort sem okkur líkar betur eða verr og hvort sem það á að gera í Kvikmyndaskólanum eða háskólum sem bjóða upp á lögfræðimenntun. Um það get ég ekki dæmt af því að ég þakki það ekkií nógu vel.

[Jón Magnússon, 4.8.2011 kl. 09:57]

Nei Erlingur, Þráinn bar öll þessi merki strax í menntaskóla, en skánaði á tímabili, en virðist hafa færst í aukanna eftir að hann fór að fá tvöföld laun á kostnað skattgreiðenda. Annars vegar sem þingmaður og hins vegar sem heiðurslaunalistamaður í boði Framsóknarflokksins

[Jón Magnússon, 4.8.2011 kl. 10:00]

Ekki þekki ég þetta Dexter en það hafa þá verið vanhæfir menntamálaráðherrar sem hafa setið að völdum undanfarin ár fyrst þeir hafa ekki tekið á þessu og séð til þess að námið væri faglegt. Ég hef ekki heyrt neitt neikvætt fyrr um námið í Kvikmyndaskólanum.

[Halldór Jónsson, 4.8.2011 kl. 12:47]

Eru BS lögfræðingar frá Háskólanum í Reykjavík það sem Þráinn á við?

[Jón Magnússon, 5.8.2011 kl. 10:16]

Ég bara veit ekki hvað hann á við Halldór auk þess sem ég held að Þráinn Bertelsson viti ekki mikið um lögfræðinám