Hverjir eru ofsóttir?

Það er athyglivert að skoða hvaða trúarbragðahópur verður fyrir mestu og skipulögðustu ofsóknunum í heiminum.

Þegar að er gáð þá kemur í ljós að það er kristið fólk sem verður fyrir ofsóknum vegna trúar sinnar víðs vegar um heiminn.

Í dag berast fréttir frá Egyptalandi þar sem Koptar sá merki og gamalgróni trúarhópur kristins fólks verður stöðugt og hefur orðið fyrir gríðarlegum ofsóknum um árabil. Kristið fólk verður fyrir ofsóknum í nánast öllum löndum fyrir botni Miðjarðarhafs m.a. verða kristnir Palestínumenn fyrir ofsóknum bæði af hálfu Palestínumanna sem játa Íslam og einnig af hálfu Gyðinga.

Í Sýrlandi í landi hins "vonda Assads" virðast stjórnvöld þó gæta hagsmuna kristins fólks og það gerði hinn "illi Saddam" líka í Írak en eftir innrás Bandaríkjanna og fylgiríkja þeirra í Írak hefur kristið fólk verið drepið umvörpum í Írak, kirkjur brenndar og um helmingur kristinna er flúinn úr landi

Á Indlandi, Kína og víða í Afríku verður kristið fólk fyrir ofsóknum vegna trúar sinnar og í Evrópu sækja rétttrúnaðarsinnar fjölmenningarsamfélagsins að kristnu fólki undir yfirvarpi mannréttinda.  Óneitanlega nokkuð vasklega fram gengið þegar mannréttindi kristins fólks víðast hvar í veröldinni eru misvirt vegna trúarskoðana þess.

Það er óneitanlega merkilegt að þrátt fyrir að kristið fólk sé talið vera í meiri hluta í landi eins og t.d. Englandi þá geta menn orðið fyrir aðsókn og starfsmissi vegna þess að það ber kristin trúartákn eða hefur þau í bílum sínum. 

Ef til vill er kominn tími til að fólk fari í nýja krossferð og þá krossferð friðarins, mannréttindanna, persónufrelsisins  og umburðarlyndisins.

Athugasemdir

[Óskar Sigurðsson, 10.10.2011 kl. 22:09]

Mjög gott hjá þér Jón.

[Jón Magnússon, 10.10.2011 kl. 22:41]

Þakka þér fyrir það Óskar.

[Einar K. (IP-tala skráð) 11.10.2011 kl. 02:37]

Hvað ef mannkynið henti öllum trúarbrögðum fyrir róða? Væri okkur ekki betur borgið? Þá væri a.m.k. einni ástæðunni færra fyrir fólk að slátra, mismuna og ofsækja hvort annað.

Sagan hefur kennt okkur svo ekki verður um villst að hindurvitnin hafa hamlað okkur og sett niður á margan máta; svo árhundruðum skiptir. Blóðug saga kristninnar er þar ekki undanskilin. Ekkert af þeim stóru og ríkjandi trúarbragða í veröldinni er verjandi í huga manns með vott af siðgæði, söguþekkingu og náungakærleika á 21. öldinni.

Doðrantarnir útbreiddustu, Biflían og Kóraninn; eru ofbeldisrit sem smita út frá sér enn í dag til réttlætingar á voðaverkum og mannréttindabrotum ýmiskonar. Við trúleysingjarnir sem vogum okkur að benda á tímaskekkjuna, sem fylgni við þessi gömlu ævintýrarit sannarlega er; teljumst hins vegar öfgafólk meðal þeirra sem skáldsögurnar aðhyllast sem heilagan sannleika.

Hverja ofsækja trúleysingjar; drepa eða mismuna í veröldinni? Penninn er beittari en sverðið er okkar mottó. Baráttan fer fram í rituðu máli gegn árþúsunda gömlum kreddum.

Á meðan berast okkur daglega fréttir af trúartengdum níðingsverkum hvaðanæva úr heiminum.

Svo ég svari spurningu minni hér að ofan sjálfur; mannkynið væri sannarlega betur sett án trúarbragða. Sagan hefur sýnt okkur fram á það. Og gerir enn til þessa dags.

[Jón Magnússon, 11.10.2011 kl. 08:19]

Því miður er það þannig að trúartengd níðingsverk eru unnin. Í dag er það þannig að slík níðingsverk eru aðallaega unnin af ofstækisfullum stuðningsmönnum einna trúarbragða í heiminum.

En þegar sagan er skoðuð þá kemur í ljós að trúarbrögðin hafa haft mjög jákvæð áhrif til að kalla fram það besta í fólki en sú saga er síður sögð en saga mistaka og ofstækis.  Það er síðan rangt að halda því fram að verstu ódæðin hafi verið framin í skjóli trúarbragða.  Verstu ódæðin sem mannkynsagan þekkir voru einmitt unnin af hreyfingum sem köstuðu öllum trúarbrögðum í burt og kröfðust undirgefni við hugmyndafræði sinnar stjórnmálastefnu.

Skoðaðu síðan síðustu setninguna í færslunni minni og segðu mér hvort þú ert henni ekki sammála.

[sleggjan (IP-tala skráð) 11.10.2011 kl. 09:22]

Held að almennt séð séu minnihlutahópa ofsóttir. Sama hvaða nafni það heitir.

Eins og í löndunum sem þú taldir upp eru kristnir í minnihluta.

[Valur Arnarson, 11.10.2011 kl. 13:33]

Sæll Jón,

Ég þakka þér fyrir góðan pistil. Þetta er hárrrétt hjá þér, það þarf að vera á varðbergi gagnvart þessu. Við sem búum í þessum svokölluðu siðmenntuðu ríkjum erum ekkert laus undan ofsóknum, birtingamynd þeirra er bara önnur eins og hægt er að sjá á nýlegri samþykkt meirihlutans í borgarstjórn.

Ég skrifaði bloggfærslu um málið:

http://valur-arnarson.blog.is/blog/valur-arnarson/entry/1197058/

Ég sendi þetta til þeirra borgarfulltrúanna 10 sem kusu með tillögunni og fékk rökstuðning til baka, hann var á þessa leið:

"Ég er ekki sammála"

Svona eru ákvarðanirnar teknar í Reykjavíkurborg.

[Jón Magnússon, 11.10.2011 kl. 19:17]

Þakka þér fyrir Valur við erum sammála um þetta.