Af hverju Álfheiður og Steingrímur?

Geir Jón Þórisson fyrrum yfirlögregluþjónn hefði getað valið heppilegri tíma til að segja frá grunsemdum um að ákveðnir þingmenn hefðu verið í sambandi við mótmælendur þegar árásin á Alþingi var hörðust í lok janúar 2009.  Nú eru liðin 3 ár frá því að þessir atburðir áttu sér stað og alvöru lögregluyfirvöld afgreiða svona alvarleg mál á nokkrum vikum eða mánuðum.

Mörgum finnst það rýra trúverðugleika frásagnar Geir Jóns að hann skuli fyrst lýsa yfir framboði til annars varaformanns Sjálfstæðisflokksins og koma nokkrum dögum síðar með þessar alvarlegu ásakanir.  Ég efast þó ekkert um að Geir Jón geri þetta allt af heilindum og sannleikanum samkvæmt eins og annað.

Af þeim 63 þingmönnum sem sátu á Alþingi í lok janúar 2009 hafa  2 brugðist við og sagt ekki ég. Það eru þau Álfheiður Ingadóttir sem telur sig verða fyrir pólitísku einelti yfirlögregluþjónsins fyrrverandi og foringi hennar og leiðtogi Steingrímur J. Sigfússon. Bæði viðurkenna þó að hafa verið í sambandi við mótmælendur og fyrir liggur að unglingarnir þeirra tóku þátt í atlögunni að Alþingi af fullri hörku raunar ásamt fleiri afkvæmum forustumanna Vinstri Grænna.

Álfheiður segist vera með bréf upp á það að hún sé alsaklaus og Steingrímur J. segist að vísu hafa verið í sambandi við mótmælandann sinn, en aðeins til að vita hvort öryggi hans væri viðunandi.

Hvað svo sem þessum frásögnum og staðhæfingum þeirra Álfheiðar og Steingríms líður þá er óneitanlega sérkennilegt að sjá hvað þau telja mikilvægt að koma af sér sök í þessu máli. 

Ekki vissi ég til að Geir Jón hefði nafngreint þau Steingrím eða Álfheiði. Hvað veldur því þá að þeim finnst svona mikilvægt að taka til varna áður en nokkur kæra hefur verið gefin út. Já og í hverju felst pólitíska eineltið sem Álfheiður er beitt? Felst það í að tala um að þingmenn hafi verið í sambandi við mótmælendur þegar árásin var hvað hörðust á Alþingi.

Óneitanlega athyglivert að þessir flokksbroddar Vinstri grænna skuli taka til varna með þeim hætti sem þau gera. Framganga þeirra að virtum öllum aðstæðum er ekki sérlega trúverðug.

Athugasemdir

[Ómar Ragnarsson, 28.2.2012 kl. 00:49]

Eftir stendur þessi spurnin: Hvernig höfðu 16-17 ára unglingar burði til að stjórna þúsundunum sem voru fyrir utan húsið? Ekki stjórnuðu þeir mér að minnsta kosti eða þeim sem sem voru næstir mér þegar við vorum þarna á ferð.

[Ómar Ragnarsson, 28.2.2012 kl. 00:51]

Eftir stendur þessi spurning: Hvernig höfðu tveir 16-17 ára unglingar burði til að stjórna þeim þúsundum manna sem voru við Alþingishúsið?

Ekki stjórnuðu þeir mér og heldur ekki þeim sem voru næstir mér víð húsið.

[Hrólfur Þ Hraundal, 28.2.2012 kl. 07:23]

Nei Jón, þau eru ekki trúverðug. 

Það var sérkennilegt að heyra að það fyrsta sem Steingrím datt í hug var að öskra hótannir um að rannsaka eitthvað annað, og svo stökk  Álfheiður til og hvítþvoði sig sjálf, svo hanna þarf ekkert að rannsaka. 

Svona láta þau, eins og ofdekraðir krakkar á róluvelli, án þess að nokkur nöfn hafi verið nefnd.

Það eru fyrst og fremst þau sjálf og eindrægustu fylgismenn þeirra sem beina að þeim athyglinni, þeim þessum hvítvængjuðu dúfum sannleikans.

   

[Anna Sigríður Guðmundsdóttir, 28.2.2012 kl. 08:24]

Jón. Þetta er hið undarlegasta mál í alla staði. Álfheiður hefur fengið afskriftir án ákæru og rannsóknar, ef einhverjar sakir eru yfir höfuð til staðar, og Steingrímur leggur ríka áherslu á að allt verði rannsakað. Ef ég gæti skyggnst inn í hugarfylgsni Steingríms, þá reikna ég með að þar megi finna einhvers konar upplýsingar um þátt Sjálfstæðis-utangarðsmanna í mótmælunum.

Álfheiði veittist svo óeðlilega auðvelt að fá afskrift á sekt sinni áður en þessari rannsókn er lokið, frá yfirvaldi Sjálfstæðisklíkunnar á lögreglustöðinni.

Í mínum augum eru allir saklausir uns sekt er sönnuð. Og hvernig er sekt sönnuð á löglegan réttlátan hátt á Íslandi?

Ég sit eftir með þá spurningu ósvaraða, eftir þetta pólitíska Sjálfstæðis-lögguleikrit? Það má lesa ýmislegt út úr verkum og viðbrögðum fólks, en sannleikann verur að skera úr um í vandaðri rannsókn, yfirheyrslum og réttarhöldum.

M.b.kv.

[Ragnar Gunnlaugsson, 28.2.2012 kl. 09:17]

Já mjög skrítið hvað þau brugðust strax hart við.

[Jón Magnússon, 28.2.2012 kl. 10:26]

Það kemur ágæt lýsing fram á því á fésbókarsíðu minni Ómar þar sem Jakob Þór Haraldsson sem var mótmælandi eins og þú lýsir aðkomu skipulagðra stjórnmálaafla þar á meðal þeirra sem þú ert í. Lestu það. Hverju varst þú að mótmæla á þessum tíma Samfylkingarmaðurinn? Setu flokksins í ríkisstjórn eða dugleysi Jóhönnu og Ingibjargar eða varstu þrna á vegum einhverra sérstakra afla úr þessum furðulega flokki Samfylkingunni?

[Jón Magnússon, 28.2.2012 kl. 10:26]

Já þetta er einkar athyglivert Hrólfur

[Jón Magnússon, 28.2.2012 kl. 10:29]

Ég er sammála því að það þarf að sanna sök. Viðbrögð fólks geta þó gefið ýmislegt til kynna.  Ég veit ekki til að lögreglunni sé stjórnað af Sjálfstæðisflokknum. Þá hefur eitthvað farið framhjá mér. Hins vegar bendi ég á að það var óheppilegt að Geir Jón skyldi koma þessu í umræðuna núna.