Ofsóknir

Í fyrstu miðstöðvum kristinnar trúar í Mið-Austurlöndum er talin hætta á að kristnir söfnuðir þurkist út. Kristið fólk býr við meira hatur og ofsóknir en nokkur annar trúarhópur. Meira en helmingur kristins fólk í Mið-Austurlöndum hefur flúið eða verið drepið á síðustu áratugum.

Stjórnmálamenn í kristnum löndum hafa leitt hjá sér ofsóknir sem kristið fólk sætir í Afríku, Asíu og Mið-Austurlöndum. Í nýlegri skýrslu Civitas segir að stjórnmálamennirnir séu hræddir við að taka á þessum ofsóknum af ótta við að vera kallaðir "rasistar".

Þeir sem snúast frá Íslam til kristinnar trúar eiga það á hættu að vera drepnir í Saudi Arabíu, Máritaníu og Íran og geta búist við hörðum refsingum í öðrum löndum í Mið-Austurlanda. Í skýrslu Civitas segir að um 200 milljónir kristins fólks eða einn af hverjum 10 búi við ógn, refsingar, kúgun eða þjóðfélagslegt ójafnrétti vegna trúar sinnar. 

Það er brýnt að afhjúpa glæpi og brot á mannréttindum gagnvart kristnu fólki. Það ætti að vera pólitískt forgangsverkefni. Sú staðreyn að svo er ekki segir okkur sérstaka sögu um skrýtinn fórnarlambakúltúr sem hefur hreiðrað um sig á Vesturlöndum og í Bandaríkjunum.

Því má ekki gleyma að trúfrelsi-skoðanafrelsi er grundvöllur og undirstaða almennra mannréttinda.

Við sem höldum upp á mestu trúarhátíð kristins fólks þessa daga ættum að minnast trúarsystkina okkar sem sæta grimmilegum ofsóknum víða um heim. Við eigum að gefa þeim til hjálpar. Það er þörf á slíkum jólagjöfum. Kristið fólk þarf að mynda samtök til varnar mannréttindum kristins fólks og sóknar fyrir kristni og kristileg viðhorf.

Þau viðhorf eru hornsteinar þeirra mannréttinda sem við berjumst fyrir og teljum sjálfsögð-en eru það ekki án baráttu.

Athugasemdir

[Tómas Ibsen Halldórsson, 26.12.2012 kl. 13:15]

Þakka þér fyrir þennan þarfa pistil Jón.

Já, kristnir verða víða fyrir ofsóknum, en þó sérstaklega í ríkjum Íslam.  Stjórnvöld í hinum vestræna heimi virðast lítið kippa sér upp við þær ofsóknir sem kristnir verða fyrir í austurlöndum-nær, en eru fljót til að fordæma ef þeim finnst hallað á fylgjendur Múhameðs.

Hér á landi eru múslímar boðnir velkomnir og þeim fagnað með opnum örmum, á sama tíma þurfa kristnir í ríkjum Allah að fara huldu höfði vilji þeir forðast ofsóknir.

Í kóraninum eru beinlínis fyrirmæli til fylgjenda Íslam að útrýma þeim sem ekki eru fylgismenn þeirra.

Í Biblíunni er aftur á móti boðskapur náðar og miskunnar, kærleika og fyrirgefningar að finna. 

Ég er í þann mund að ljúka við að lesa rafbók sem ég náði í á Amazon sem heitir "10 Amazing Muslims Touched by God".  Hér er um að ræða vitnisburði tíu fyrrum múslíma sem upplifðu kærleika Guðs og hvernig Jesús Kristur kom inn í líf þeirra og umbreytti þeim og gaf þeim von og nýjan tilgang í lífinu, nokkuð sem þeir fundu ekki hjá Allah eða í Kóraninum.  Ég hvet alla sem hafa tök á að útvega sér þessa bók og lesa hana.  Aðstæður þessa fólks eru misjafnar en útkoman hjá þeim öllum sú sama, Jesús Kristur sonur Guðs [guðlast í augum múslíma] birtist þeim á einn eða annan hátt og þau sneru sér til Hans.

[Jón Magnússon, 26.12.2012 kl. 21:43]

Ég vil byrja á að þakka Kristjáni Guðmundssyni fyrir hlý og góð orð í minn garð í athugasemd við síðustu færslu, en þar sem meira en 4 dagar voru liðnir gat ég ekki bætt við athugasemd þar.

[Jón Magnússon, 26.12.2012 kl. 21:45]

En það eru svo miklu fleiri en Íslamistar sem ofsækja kristið fólk Tómas þó að þeir standi vissulega fyrir flestum árásunum. Sérkennilegt að stór hluti ríkja Sameinuðu þjóðanna sem hefur játast undir það að fylgja almennum mannréttindum gerir það ekki heldur þverbrýtur þau. Tjáningar- og trúfrelsi er t.d. mikilvægt í mannréttindasáttmálanum en brotið er gegn þeim rétti allt of víða.

[Matthías (IP-tala skráð) 26.12.2012 kl. 23:55]

Og líka þaðan sem síst skyldi á okkar tímum: http://ifamericansknew.org/history/rel-christians.html

[Gísli Gunnarsson (IP-tala skráð) 27.12.2012 kl. 23:30]

Allt er þetta rétt sem Jón skrifar. En það eru fleiri en kristnir menn sem verða fyrir ofsóknum. Hindúar ofsækja LÍKA múslíma og búddista, múslímar ofsækja kristna og hindúa í Pakistan, búddistar ofsækja múslíma í Búrma og Taílandi. Mestu trúarofsókinir 20. aldar voru í Evrópu í helförinni þegar sex milljónir gyðingar voru drepnir og nú ofsækja gyðingar í Ísrael múslímska og kristna Palestínumenn.   

[Jón Magnússon, 28.12.2012 kl. 13:38]

Já það er víða pottur brotinn Matthías.

[Jón Magnússon, 28.12.2012 kl. 13:42]

Þetta er mikið rétt Gísli sem þú segir. Ég er ekki að gera lítið úr ofsóknum gagnvart öðrum trúar- og skoðanahópum. Það sem er alvarlegast er að þetta skuli viðgangast án þess að stjórnmálamennirnir á öllum toppfundunum sínum skuli aldrei taka á þessum vandamálum sem varðar ofsóknir gagnvart hundruðum milljóna fólks í heiminum. Svo er það spurningin um það hvort við skilgreinum dráp nasista á Gyðingum á miðri síðustu öld sem trúarofsóknir eða rasískar ofsóknir. Mér finnst eðlilegra að skilgreina þær sem rasískar. Það er þó að verulegu leiti aukaatriði nema fræðilega. Sá sem verður fyrir ofsóknunum þarf að líða fyrir þær óháð því hvers eðlis eða tegundar þær eru.