Pilsin þrjú og Árni Páll

Þær Jóhanna Sigurðardóttir, Valgerður Bjarnadóttir og Álfheiður Ingadóttir hafa leitt aðförina að stjórnarskránni og sótt fast að óheppilegar og skaðlegar breytingartillögur stjórnlagaráðs nái fram að ganga.  Svo virtist þó fyrir helgi sem  nokkur flótti væri runnin á liðið.

Ætla mátti að nú væri nýr formaður Samfylkingarinnar farinn að setja að einhverju leyti vitrænt yfirbragð á stefnu Samfylkingarinnar í málinu og reyndi að hafa það vit fyrir fólki að leiða því fyrir sjónir að framkomnar tillögur til breytinga á stjórnarskránni væru ótækar.

En það þurfti ekki lengi að reyna Árna Pál. Í dag brást hann sem formaður Samfylkingarinnar og lýsti stuðningi við að atlagan gegn stjórnarskránni héldi áfram eins og ekkert hefði í skorist. Þetta kom á óvart og var ekki í samræmi við það sem hann sagði í lok landsfundar Samfylkingarinnar.

Árni Páll er löglærður og gerir sér fulla grein fyrir því að það væri mikið ógæfuspor að samþykkja þau drög að stjórnarskrá sem liggja fyrir Alþingi og stafa að mestu leyti frá stjórnlagaráði. Hann veit líka að málið hefur ekki fengið eðlilega þinglega meðferð. Þá hvatti Árni Páll til átaka á grundvelli atlögu að stjórnarskránni sama dag og álit Feneyjarnefndarinnar um stjórnarskrána var að koma í Alþingishúsið og engin hafði lesið það. Maðurinn hefur greinilega lært slæmu lestina af Jóhönnu.

Árni Páll veit það jafnvel og pilsin þrjú að úr því sem komið er verða engar stjórnarskrártillögur samþykktar nema í samráði við stjórnarandstöðuna. Tíminn er einfaldlega of stuttur þannig að þó að ítrustu bolabrögðum verði áfram beitt í málinu þá er tíminn runninn út. Leikritið sem pilsin þrjú með Árna Pál lafandi í öllum pilsföldunum leika nú er því ekki annað en sjónarspil fyrir þær einföldu sálir sem enn halda að Samfylkingunni sé  alvara að knýja fram ónýtar og skaðlegar breytingar á stjórnarskránni.

Athugasemdir

[Jóhann Kristinsson, 12.2.2013 kl. 04:23]

Ekki að hrósa sigri strax Jón, það er hægt að framlengja þing fram að kosningum ef pilsin 3 fá nógu mörg atkvæði að kveða Stjórnmáladrauginn upp aftur.

Þá virkilega sjáum við hvort að Árni Páll er sterkur formaður eða bara pilsfaldari.

Kveðja frá Las Vegas

[Jón Magnússon, 12.2.2013 kl. 09:05]

Ég er ekki að hrósa sigri Jóhann. Mér finnst það dapurlegt að þetta furðuferli varðandi breytingar á stjórnarskránni skyldi fara af stað og halda áfram í þeim öngstrætum sem það hefur verið.  Annars merkilegt að stjórnmálaflokkur sem telur sig ábyrgan og vill sækja víðtækt fylgi eins og Samfylkingin skuli standa að aðför að stjórnarskránni eins og sæmir í besta falli litlum öfgaflokki yst á vinstra kanti stjórnmálanna.