Þorvaldur og þjóðarviljinn.

Þorvaldur Gylfason hefur um nokkurt skeið talið sig hafa sérstakt umboð frá þjóðinni til að tala í nafni hennar. Sérstaklega varð þetta áberandi eftir að Þorvaldur var valinn í Stjórnlagaráð og freistaði þess að eyðileggja stjórnarskrá lýðveldisins.

Þar sem Þorvaldur taldi að enginn stjórnmálaflokkur gæti flutt boðskap þjóðarinnar jafn hreinan og tæran og hann sjálfur stofnaði hann sérstakan flokk ásamt skoðanasystkinum sínum úr Stjórnlagaráðinu til að slá hinn eina sanna tón í íslenskum þjóðmálum. Þorvaldur hélt því ítrekað fram að stjórnmálastéttin í heild sinni hundsaði þjóðarviljann sem hann einn er umkominn að túlka hver er.

Í nótt fékk Þorvaldur og þjóðin raunsanna mælingu á þeim þjóðarvilja sem Þorvaldur talar fyrir og styður aðför stjórnlagaráðsins að stjórnarskránni. Þegar upp var staðið var stuðningur við flokk Þorvaldar og félaga 2.5%. Snöggtum minni en Dögunar sem Þorvaldur klauf sig frá vegna þess að þar á bæ misskildi fólk þjóðarviljann og Flokks heimilanna sem Þovaldur og félagar töldu ekki nógu fínt fólk til að fara í framboð fyrir fína framboð túlkenda þjóðarviljans.

Niðurstaða kosningana er samt ljós. Þjóðin hafnar Þorvaldi, stjórnarskrárdrögum hans og túlkunum hans á þjóðarviljanum.

Nú getur Þorvaldur sagt eins og séra Sigvaldi forðum: "Nú er víst best að biðja Guð að hjálpa sér. Eva Joly kann þó að standa Þorvaldi nær hvað ákall varðar eins og dæmi sannar.

Athugasemdir

[Ómar Ragnarsson, 28.4.2013 kl. 22:13]

Það er einmitt það. "Þjóðin hafnaði stjórnarskrárdrögunum." Hún fékk reyndar sérstakt tækifæri til þess að greiða atkvæði um nýju stjórnarskrána 20. október og stjórnarskráin hlaut 64% atkvæða en 36% voru andvígir. Nú er þeir allt einu orðnir nógu margir til þess að hægt sé að segja að þjóðin hafi hafnað stjórnarsrkánni.

[Jenný Stefanía Jensdóttir, 28.4.2013 kl. 22:40]

Blessaður Jón,

minn gamli bókhalds - og umsjónarkennari, þú verður ekkert meiri við að kasta grjóti í hagfræðikennarann minn, sem verður sízt minni við grjótkastið.

Með kveðju

[Þorkell Guðnason, 29.4.2013 kl. 01:24]

Greiningin raunsönn skv minni upplifun.

Við þetta hef ég engu að bæta.

AMEN

[Heimir Lárusson Fjeldsted, 29.4.2013 kl. 08:52]

Þau komast hægt og rólega niður til okkar hinna.

[Jón Magnússon, 29.4.2013 kl. 13:09]

Þeir flokkar sem voru á móti þessum stjórnarskrárdrögum fengu aukinn meiri hluta við þesar kosningar Ómar það segir sína sögu. Nú þarf að taka til hendinni og breyta þeim ákvæðum stjórnarskrárinnar sem þarf að breyta en láta hin í friði.

[Jón Magnússon, 29.4.2013 kl. 13:11]

Ég er ekki að kasta grjóti í Þorvald Jenný heldur fjalla um það með hvaða hætti hann hefur tjáð sig og hver niðurstaðan er. Þú verður að fyrirgefa en þessi hagfræðiprófessor hefur síðustu 4 ár gengið gjörsamlega fram af mér með röngum staðhæfingum, ógrundaðri illmælgi í garð ákveðinna embættismanna og stjórnmálamanna og yfirlýsingum um ætlan flokka og einstaklinga. Hann verður eins og aðrir stjórnmálamenn að sætta sig við að honum sé svarað þó það sé mun hófstilltara en hann hefur farið fram gagnvart öðrum.

[Jón Magnússon, 29.4.2013 kl. 13:12]

Takk Þorkell ég vildi hafa það þannig.

[Jón Magnússon, 29.4.2013 kl. 13:12]

Ég vona það Heimir.

[Páll Heiðar (IP-tala skráð) 29.4.2013 kl. 22:51]

Þorvaldur var kosinn með yfirburðum til að stýra því verki sem farsælega var lokið af þeim 25 sem kosnir voru.Vinnubrögðin voru til fyrirmyndar og gera t.d. alþingi skömm til.Þjóðin á heimtingu á að vilji hennar sé virtur og hvorki þín skrif eða annara að hún samþykkti þetta ferli með auknum meirihluta.Í einhverjum hrossakaupum tókst síðasta þingi að klúðra þessu máli en þjóðin á heimtingu á að ferlinu sé farsællega lokið á þessu þingi og hver sá þingmaður sem vinnur gegn málinu víkji

[Gunnar Th. Gunnarsson, 29.4.2013 kl. 22:52]

Þetta er rétt greining hjá þér Jón Magnússon. En þessi "vörn" Jennýar Stefaníu fyrir fyrrum hagfræðikennara sinn er dálítið brosleg.