Gáfumannafélagið fellur á enn einu prófi

Gáfumannafélagið undir forustu Egils Helgasonar pistlahöfundar á Eyjunni finnur nú Brynjari Níelssyni alþingismanni allt til foráttu. Brynjar er kallaður nettröll, heimskur og jafnvel geðveikur.

Ástæða þessara skrifa Egils og aðdáenda er sú að Brynjar skrifaði málefnalega grein fyrir nokkrum dögum um starfsemi embættis Sérstaks saksóknara. Í grein Brynjars kom fram m.a. hvað ákært hefði verið í fáum málum sem vörðuðu gjaldþrot stóru viðskiptabankanna 2008 og ekkert málanna varðaði í raun það að banki eða bankar fóru í þrot.  Þá benti Brynjar á hvað gríðarlegur fjöldi mála hefði verið felldur niður af Sérstökum saksóknara, sem er að hluta til vegna þess að Gunnar Andersen þáverandi forstjóri Fjármálaeftirlitsins skóflaði til hans lítt eða óunnum og ónýtum málum undir húrra- og fagnaðarhrópum Egils Helgasonar og Þorvaldar Gylfasonar prófessors.

Allt eru þetta staðreyndir sem Brynjar fjallar um og ekkert af þessum atriðum varðar andlega hæfi hans. Umfjöllun Brynjars er innlegg í málefnalega umræðu um staðreyndir.

Þessir forustumenn hins eina sannleika bankahrunsins, þeir Egill Helgason og Þorvaldur Gylfason sporgöngumenn Evu Joly virðist í mun að girða fyrir málefnalega og vitsmunalega umræðu um staðreyndir málsins. Sjálfsagt vegna þess að við skoðun kemur í ljós að það stendur ekki steinn yfir steini af fullyrðingum þeirra eða Evu Joly varðandi gjaldþrot bankanna í kjölfar gjaldþrots þeirra.

Umræða eins og sú sem Egill Helgason stendur fyrir sem miðar fyrst og fremst að því að vega að einstaklingi og hæfileikum hans í stað þess að fjalla málefnalega um efnisatriði er í samræmi við þá greindarlegu hugsun hans og Þorvaldar Gylfasonar að bankarhrunið sé stjórnarskránni að kenna.

Athugasemdir

[Gunnar Th. Gunnarsson, 31.7.2013 kl. 15:36]

Það er skelfilegt að sjá þennan gargandi kór sem vegur að Brynjari. Talar um hann eins og þú nefnir og segir hann "óvandaðan mann".

Þessu fólki er vorkunn, að geta ekki tekið rökræður um málefnin við Brynjar, heldur sendir skeyti sín á milli á bloggvefum um hversu ómöguleg persónan sjálf er. Ekkert um málefnin, bara um manninn.

[Egill Helgason (IP-tala skráð) 31.7.2013 kl. 20:49]

Ég verð að gera þá athugasemd hér að ég hef hvergi kallað Brynjar geðveikan né heimskan, þótt látið sé að því liggja hér.

Hvað málefnalegheit varðar, þá kallar Brynjar Evu Joly "gamlan kommúnista". Það eru hrein ósannindi.

Og svo er það Sérstakur saksóknari. Það er við ramman reip að draga að fá fram sakfellingar vegna hvítflibbabrota á Vesturlöndum. Varla dettur þó neinum í hug að þau séu ekki framin. Hins vegar er auðvelt að dæma fólk í fangelsi fyrir að stela sómasamloku og kókómjólk eins og kom fyrir konu sem ég þekki nýverið.

bestu kveðjur

Egill

[Bjarne Örn Hansen (IP-tala skráð) 31.7.2013 kl. 21:33]

Nornaveiðar heitir þetta réttu nafni

[Jón Magnússon, 31.7.2013 kl. 23:37]

Það er rétt Gunnar og það skiptir máli að koma á málefnalegri umræðu í þessu máli. Það er komið nóg af upphrópunum án innihalds eða skynsamlegrar skírskotunar.

[Jón Magnússon, 31.7.2013 kl. 23:45]

Það er rétt Egill að þú hefur ekki kallað Brynjar geðveikan eða heimskan en þú sagðir minnir mig að hann væri nettröll. Hvað er að vera nettröll? Strax í kjölfar færslu þinnar komu aðdáendur þínir í röðum og töluðu um Brynjar sem heimskan eða geðveikan. Óneitanlega kom mér nokkuð á óvart að þú skyldir ekki gera athugasemdir við það. Þá kom mér líka á óvart að sjá suma þá sem beittu slíku orðfæri.

Hvort Eva Joly er gamall kommúnisti eða ekki það þekki ég ekki. En hún er í flokki með Daniel Chon Bendit sem er gamall kommúnisti og var kallaður Rauði Danni þegar sól hans skein í óeirðum í París um 1970 ef ég man rétt. Ef það er rangt að Eva Joly sé gamall kommúnisti þá ber Brynjari að leiðrétta það. Hins vegar skiptir þessi kona litlu máli og gerði lítið annað en ná til sín og aðstoðarmanns síns peningum frá skattgreiðendum.

Ég er sammála þér að það er með ólíkindum hvað tekið er vægt á því sem kallað er hvítflibbabrot. Þar er oft um hundraða milljóna eða milljarða þjófnað frá almenningi að ræða. Dæmi um þetta eru m.a. sektir sem stórfyrirtæki fá sem brjóta samkeppnislög hér og erlendis. Sektin er venjulega brot af þeim hagnaði sem fyrirtækin hafa notið af lögbrotinu. Með sama hætti mætti sæma Sómasamlokuþjófinn til að skila fjórðungi af Sómasamloku til baka og væri hann þá laus allra mála.

[Jón Magnússon, 31.7.2013 kl. 23:46]

Er það ekki frekar að reyna að gera lítið úr pólitískum andstæðingi Bjarne?

[Ómar Ragnarsson, 1.8.2013 kl. 00:02]

Er það ekki svolítið langsótt að eigna Agli Helgasyni ummæli annarra, af því að þau komu í kjölfar skrifa Egils?

[Ómar Ragnarsson, 1.8.2013 kl. 00:03]

Er það ekki svolítið langsótt að kenna Agli Helgasyni um ummæli annarra, af því að þau komu í kjölfar skrifa Egils?

[Jón Magnússon, 1.8.2013 kl. 11:57]

Þetta eru ummæli á hans síðu Ómar. Þú hefur iðulega gert athugasemdir við orðfæri og ummæli á þinni síðu þegar þér finnst þau fara yfir velsæmismörk. Það eiga menn að gera. Eina afsökunin að það sé ekki gert er að viðkomandi hafi ekki séð ummælin.  En það var ekki afsökun Egils í þessu tilviki hann kemur með athugasemdir og ummæli í framhaldi af þessum gölnu árásum á Brynjar án þess að gera athugasemdir.  Var ekki einhvern tíma sagt þögn er sama og samþykki Ómar. 

Svo er það annað. Menn eins og þú, Egill ég og fleiri eigum að amast við og mótmæla svona ummælum og ómálefnalegum athugasemdum svo oft sem færi gefst strax. Nógu illyrt er umræðan oft á netmiðlunum þannig að það er full ástæða til að sporna við.