Skuldaleiðrétting. Hvenær? Hvernig?

Fólk spyr iðulega að því hvort það eigi rétt á skuldaleiðeréttingu vegna verðtryggða lánsins síns. Fólk veltir því eðlilega fyrir sér miðað við yfirlýsingar forsætisráðherra og annarra ráðamanna hvað komi í hlut hvers og eins. Svarið við þessu er því miður ég veit það ekki.

Enn sem komið er hafa engar tillögur verið settar fram af hálfu ríkisstjórnarinnar um hvað skuli gera nákvæmlega varðandi skuldaleiðréttingu.  Engar tillögur hafa verið kynntar á Alþingi nema tillögur ráðgjafanefndar og svo heyrist ekki meir nema digurbarkalegar yfirlýsingar forsætisráðherra.

Alþingi kemur saman þ. 14. janúar.  Verða þá lagðar fram tillögur af hálfu ríkisstjórnarinnar um skuldaleiðréttinguna sem lofað var í apríl 2013?

Ekkert heyrist heldur frá ríkisstjórninni varðandi verðtrygginguna. Verðtryggðu lánin sem á að lækka með skuldaleiðréttingu hækka því og hækka. 

Höfuðstóll tuttugumilljón króna láns hækkar frá stjórnarmyndun í apríl á síðasta ári fram til  þ. 1.febrúar 2014 um 440.000. Samt sem áður hefur verðbólgan haft hægt um sig. Nú eru teikn á lofti um að verðbólgan taki heldur betur við sér því miður. Hvað hækka verðtryggðu lánin þín mikið þá? 

Athugasemdir

[Guðmundur Ingólfsson, 9.1.2014 kl. 18:05]

Hvað ætli Jón Magnússon hafi fengið mikið í skuldaniðurfellingu af almanna féi ?

[Sigurður Haraldsson, 9.1.2014 kl. 21:32]

Ef verð tryggingin verður ekki afnumin og þak sett á vexti þá er þetta útspil ríkistjórnarinnar verra en heima setið!

[Anna Sigríður Guðmundsdóttir, 10.1.2014 kl. 00:00]

Jón. Þú sem er kristinn lögmaður, veist að raunverulegu leiðréttingarnar koma örugglega handan við móðuna miklu.

Einungis almáttugur alvaldur Drottinn, er fær um að dæma lifandi og dána.

Það er spurning, hvernig Vegurinn, Sannleikurinn og Lífið, mun koma út hjá Drottins-dómara-uppgjörinu, þegar jarðvegs-lífsgangan tekur enda?

Sá sem ekki sinnir sínum veikustu og minnstu samfélags-bræðrum/systrum, getur aldrei sinnt sjálfum sér né almættinu, með öruggri og góðri samvisku.

M.b.kv.

[Tryggvi Helgason, 10.1.2014 kl. 01:30]

Það að einhver lánastofnun geti hækkað á pappírnum lán sem einhver skuldar, og að sama lánastofnun geti svo krafið lántakandann um greiðslu fyrir peninga sem lántakandinn hefur aldrei fengið í hendur, er ekkert annað en svik og þjófnaður, - að mínu mati.

Svona vísitölubindingar þekkjast hvergi á byggðu bóli, - nema á Íslandi. Það er reynt að réttlæta þetta með því að það sé verðbólga sem verði að "leiðrétta". Í Bandaríkjunum hefur verið 2 til 4% verðbólga á hverju ári í 100 ár og ekki er svona vísitölu svikamylla notuð þar. Hvers vegna þá hér ? Alþingi þarf að afnema þessar reglur. Þar með er dæmið leyst.

Hversu langt aftur í tímann öll lán verði svo endurreiknuð, - upp á nýtt, - er svo Alþingis að ákveða. Sjálfur myndi ég leggja til, að öll lán sem tengd eru vísitölu, verði bakreiknuð upp á nýtt frá 1, janúar 2001, og að lántakendum verði greitt til baka ofgreiddan mismun.

Mér finnst það, satt að segja mjög furðulegt, að enginn þingmaður hefur heyrst nefna þetta; - það er, að afnema vísitölubindingarnar. Ef einhver hefur gert það, þá þætti mér vænt um að fá að heyra um það.

Ef þessar tillögur mínar ná fram að ganga og jafnframt, að lífeyrissjóðirnir og aðrir lánasjóðir verði þar með gerðir gjaldþrota þá er það einmitt það sem þarf og verður að gera. Það er, að allir þessir sjóðir verði gerðir upptækir með lögum og þurrkaðir út ásamt með allri spillingunni sem þeim fylgir. Síðan verði byrjað upp á nýtt frá grunni.

[Jón Magnússon, 10.1.2014 kl. 17:03]

Ekki eina einustu krónu Guðmundur og mun ekki fá því að ég skulda ekki neitt. Barátta mín gegn verðtryggingu og fyrir réttlæti í þjóðfélaginu snýst ekki um mig. Mínir persónulegu hagsmunir eru frekar að hafa verðtryggingu þannig að ég geti tryggt ofurávöxtun á peningunum mínum.

[Jón Magnússon, 10.1.2014 kl. 17:03]

Sammála því Sigurður.

[Jón Magnússon, 10.1.2014 kl. 17:05]

Það er einstaklingur sem trúir eða trúir ekki en það er ekki komið undir starfsstétt eða kemur henni við. Er ekki inntak kristinnar trúar réttlæti og sanngirni. Það sem ég er að tala um er það. En fátæka höfum vér ætíð hjá okkur en það girðir ekki fyrir það að við mótum sem allra réttlátast þjóðfélag.

[Jón Magnússon, 10.1.2014 kl. 17:07]

Ég lagði í tvígang fram tillögur á þingi um afnám verðtryggingarinnar. Ég setti fram tillögu við Hrunið að vísitala verðtryggðu lánanna yrði tekin úr sambandi með nýjum neyðarlögum í kjölfar samþykkis neyðarlaganna svokölluðu um bankana. Sammála þér efnislega Tryggvi.