Betur má ef duga skal.

Einn af hverjum þrem kjósendum í Reykjavík sáu ekki ástæðu til að nýta lýðræðislegan rétt sinn og kjósa. Samfylkingin er því  með um 20% fylgi allra kjósenda í Reykjavík og Sjálfstæðisflokkurinn 18%. Þeir sem heima sátu eru því fjölmennasti hópur kjósenda í Reykjavík

Þrátt fyrir að Sjálfstæðisflokkurinn reyndist vera með meira fylgi í Reykjavík en skoðanakannanir höfðu gefið til kynna, þá er niðurstaðan samt fjarri því að vera viðunandi fyrir flokk sem hefur fengið um og yfir helming atkvæða í kjósenda þegar best hefur gengið.  Betur má því ef duga skal.

Sem innfæddur Akurnesingur get ég ekki annað en fagnað því að Sjálfstæðismenn með Ólaf Adolfsson í broddi fylkingar skyldu vera hástökkvarar kvöldsins og vinna hreinan meirihluta.

Fréttastofa RÚV vann mikinn sigur með öfugum formerkjum. Framsóknarflokkurinn í Reykjavík getur öðrum fremur þakkað framgöngu fréttamanna RÚV fyrir góðan árangur í kosningunum. Í hálfan mánuð fyrir kosningar var varla til sá fréttatími þar sem hrokafullir fréttamenn á RÚV létu hjá líða að finna nýja og nýja fordæmingu á ummælum oddvita Framsóknar í Reykjavík um lóð fyrir mosku.

Framsóknarmaddömurnar Sveinbjörg og Guðfinna ættu því að láta það verða sitt fyrsta verk nýkjörnar í borgarstjórn, að færa fréttastofu RÚV veglegan blómvönd í þakklætisskyni fyrir kosningabaráttuna.

Meiri hluti Gnarrista féll og borgarstjórastóll Dags B. Eggertssonar er því valtari en spáð var.  En VG er alltaf til staðar sem hækja Samfylkingarinnar. Ef til vill ætti Dagur að lesa bókina ár drekans eftir flokksbróður sinn Össur Skarphéðinsson áður en hann lætur fleka sig inn í slíkt samstarf. 

Athugasemdir

[Sigurður M Grétarsson, 1.6.2014 kl. 17:47]

Það er afar erfitt að líta framhjá því þegar framboslisti til borgarstjórnar setur það á sefnuskrá sína að níðast á minnihlutahópi sem hefur ekkert gert að sér. Og þegar frambjóðandi er með slíku að segja að mannréttindi eigi bara við valda hópa en ekki alla þá eru slík viðhorf eitthvað sem ekki er hægt að komast hjá að fordæma.

Orðræðan um múslima í dag er orðin ansi lík orðræðunni um gypðinga á fyrri hluta seinustu aldar í Evrópu. Við vitum hvernig það fór. Því þurfum við í þessu efni að muna eftir eftirfarandi setningu. "Slæmir hlutir gerast þegar gott fólk aðhefst ekert til að stöðva þá".

Það var því fyllilega eðlilegt að fordæma harkalega þessa stefnu Framsóknarflokksins og engin þeirra ummæla sem í því fólust voru óverðskulduð.

Og hver er svo staðan. Sóley Tómasdóttir hefur þegar lýst yfir að ekki komi til greina að starfa með Framsóknarflokknum. Í löndunum í kringum okkur sammálast oft stjórnmálaflokkar sem vandir eru að virðingu sinni um að starfa ekki með rasistaflokkum eins og borgarstjónraflokkur Framsóknarflokkurinn er orðin með þessari stefnu sinni. Vonandi gera aðrir borgarstjórnarflokkar það sama.

[Skúli Víkingsson, 1.6.2014 kl. 20:53]

Góður pistill, Jón. Klifun fréttastofu RÚV um mosku-málið og Framsókn kom inn í algjöra þögn um borgarmálefni sem áttu að fleyta Samfylkingarflokkunum inn í fyrirhafnarlausa meirihlutaaðstöðu í borginni. Sú aðferð mistókst, meirihlutinn féll. Það er spurning hve mikinn þátt þessi þögn átti í því hve kjörsókn varð lítil.