Hefur bensín lækkað um 30%

Heimsmarkaðsverð á olíu hefur verið að lækka undanfarna mánuði. Olíuverð er nú rúmlega 30% lægra en það var í byrjun ársins. Sú verðlækkun ætti að skila sér í a.m.k  30% verðlækkun á bensíni og olíuvörum til neytenda.

Hafa neytendur orðið varir við að bensín og olíur væru að lækka verulega í verði?

Sé ekki svo þá getur samkeppni ekki verið virk á þessum markaði og bensínverð allt of hátt.

En svo getur náttúrulega birgðastaðan verið óheppileg þannig að olíufélögin geta ekki lækkað fyrr en þegar nýjar birgðir eru keyptar. Slíkt var jafnan viðkvæðið þegar gengið gekk í bylgjum. En nú er því ekki að heilsa.

Eru olíufélögin á beit í buddunni þinni?

Athugasemdir

[Björn Ragnar Björnsson, 1.12.2014 kl. 10:49]

Bensíngjald með virðisaukaskatti er um 80kr per líter.  Þannig að innkaupsverð á bensíni hefur engöngu áhrif á 60 - 65% af endanlegu verði.  Dollar hefur hækkað um ca. 10% frá því í sumar sem þýðir að í krónum hefur innkaupsverðið lækkað ca 23%.  Það þýðir að ef álagningarprósenta var eðlileg í sumar þá er svigrúm til lækkunar (með sömu álagningu) um 15% en ekki 30%.

[Halldór Þormar Halldórsson, 1.12.2014 kl. 11:30]

Afleiðingar af hinu frjálsa hagkerfi. Það er nákvæmlega enginn hvati hjá félögunum til að lækka verðið vegna þess að samkeppnin er engin. Það er heldur enginn sem getur sagt þeim að halda verðinu niðri, enginn sem verndar neytendur fyrir geþótta olíufélaganna. Samkeppni hefur varla verið til í litla hagkerfi Íslands og verðmyndunin því aldrei eðlilega eða "heilbrigð". Það er víst ekki rétt að gera mönnum það að þeir hafi með sér samráð um samkeppnisleysi í þessum geira, en það er í öllu falli augljóslega þegjandi samkomulag um það.

Ein af ástæðum þess að verðbólga hefur verið lítil undanfarin misseri er án nokkurs vafa sú að verslunin á Íslandi hefur loksins fengið einhverja samkeppni. Það er í formi ódýrari varnings sem tæknin hefur gert neytendum kleift að flytja inn frá útlöndum án milliliða. Einnikg koma þarna til verslunarferðir Íslendinga til lágverðslanda eins og Bandaríkjanna.

[ls (IP-tala skráð) 1.12.2014 kl. 12:11]

 Dollarinn hefur líka hækkað um 7 % frá áramótum (þú ert væntanlega að tala um olíuverð í dollurum).  Þess vegna er ekki hægt að búast við 30% lækkun á eldsneytisverði hér.  Drjúgur hluti skattlagningar á eldsneyti hér er föst krónutala og því er ekki hægt að búast við því að eldsneyti lækki eins mikið hlutfallslega og olíuverð á markaði.

Svo erum við ekki að setja óunna olíu á bílana okkar; heimsmarkaðsverð á bensíni og gasolíu fylgir ekki alltaf hráolíuverðinu.

Þetta er því langt í frá eins einfalt og þú gefur í skyn.

Að því sögðu hefur fíb bent á að olíufélögin hafi engan vegin lækkað verð í samræmi við lækkanir á innkaupsverði sbr.: http://fib.is/?FID=3979

[Ufsi (IP-tala skráð) 1.12.2014 kl. 12:12]

"Sú verðlækkun ætti að skila sér í a.m.k 30% verðlækkun á bensíni og olíuvörum til neytenda." Af hverju? Lækkar brauð um 35% ef hveiti lækkar um 30%?

Bensín er unnið úr olíu og eitthvað hlýtur sú vinnsla að kosta. Hefur vinnslukostnaður lækkað? Hefur bensín á heimsmarkaði lækkað í samræmi við lækkun á olíu? Hefur 10% gengisfall krónu gagnvart dollar ekkert að segja? Hefur lýðskrumsheili stjórnmálamannsins endanlega drepið rökhugsunarheila lögmannsins?

[Jón Magnússon, 1.12.2014 kl. 18:09]

Þakka þér fyrir þetta innlegg Björn. Ætíð skal hafa það sem sannast reynist.

[Jón Magnússon, 1.12.2014 kl. 18:10]

Það er mikið til í þessu sem þú skrifar Halldór Þormar en það er þó ekki rétt að það sé engin samkeppni í landinu. Það er t.d. samkeppni á olíumarkaðnum þó hún sé takmörkuð af því að lækki einn lækkar annar, en það eru þó félög sem eru með lægra verð en önnur.

[Jón Magnússon, 1.12.2014 kl. 18:12]

Takk fyrir innleggið Is eða LS það er alveg rétt að dollar hefur hækkað í verði sem ruglar þetta svolítið af því að það er jafnan miðað við verð í Bandaríkjadölum. Svo er þessi fasta krónutala sem er skattlagnin sem er gjörsamlega óþolandi.

[Jón Magnússon, 1.12.2014 kl. 18:13]

Jú Ufsi það hefur að segja að sjálfsögðu eins og ég bendi á í færslunni hér fyrir ofan.