Landsiðaráð

Katrín Jakobsdóttir formaður Vinstri Grænna er iðin við að koma með tillögur til að leysa atvinnuvanda ákveðinna háskólastétta á kostnað skattgreiðenda. Nú skal stofna Landsiðaráð. Ekki er formaðurinn með það alveg á hreinu hvað slíkt ráð á að gera þar sem að hún leggur til að forsætisráðherra verði falið að skipa starfshóp sem á að reyna að finna út úr því hvað skuli vera hlutverk og iðja þessa landsiðaráðs.

Í framhaldi af nefndarskipaninni sem á að finna út verkefni fyrir Landsiðaráð Katrínar verða væntanlega síðar valin héraðssiðaráð og þá getur borgarstjórn Reykjavíkur ekki verið eftirbátur og er líkleg til að koma á laggirnar hverfissiðaráðum. Með þessari djörfu nýbreytni má ætla að fundist hafi verðug verkefni fyrir alla siðfræðinga sem útskrifast úr háskóla á næstunni.

Það væri síðan við hæfi að siðaráðin hefðu ráðstefnumiðstöð þar sem þau gætu komið til funda a.m.k. einu sinni á ári til að átta sig á hlutverki sínu og verkefnum. Ef að líkum lætur mun síðan VG og aðrir sem haldnir eru svipaðri ríkislægri þráhyggju, leggja til að ekki verði ráðist í neina framkvæmd eða aðgerð nema það hafi verið borið undir hverfissiðaráð síðan landshlutasiðaráð og loks landsiðaráð. Að því loknu er hægt að láta málið fara í umhverfismat og grenndarkynningu og hefja framkvæmdir um áratug eftir að tillaga kom fram.

Vissulega væri þetta flott innlegg í græna hagkerfið sem aldrei hefur skilað neinu nema auknum  útgjöldum fyrir skattgreiðendur eins og allar aðrar tillögur sem Katrín Jakobsdóttir hefur beitt sér fyrir á stjórnmálaferli sínum.

Vilja að stofnað verði Landsiðaráð

Athugasemdir

[Valdimar H Jóhannesson, 23.1.2015 kl. 14:29]

 Skyldi vinstri grænir ekki vera ákaflega stoltir af formanni sínum? Hún er jafnvel ennþá flottari en fyrirrennari hennar og glampaði þó heldur betur af honum.Það má lengi bæta við delluverkið.

[Bjarni Jónsson, 23.1.2015 kl. 18:55]

Hvað hefði Landsiðaráð gert 2009, þegar Steingrímur og Katrín voru að véla um bankana og hlunnfara landslýð um 300-400 mia kr, sem hrægammar hirtu ?  Auðvitað ekkert, því að enginn gagnrýnandi vissi nokkurn skapaðan hlut um, hvað þau skötuhjúin voru að aðhafast á bak við luktar dyr.  Þau munu ekki komast upp með svik og pretti endalaust.  Ef ekki er ástæða til að kalla saman Landsdóm núna, þá aldrei.

[Jón Magnússon, 24.1.2015 kl. 12:25]

Já þetta er heldur betur til bóta fyrir hinar vinnandi stétir.