Múrinn í Bagdad

Múrinn sem Bandaríkjamenn eru að reisa í Bagdad sýnir að þrátt fyrir 4 ára hersetu í Írak hafa Bandaríkjamenn og stjórnin í Írak ekki einu sinni náð stjórn á höfuðborginni.

Múrar hafa iðulega verið reistir í flestum tilvikum til að loka fólk úti eins og Kínamúrinn og Hadríansmúrinn í Bretlandi. Sama má segja um múrinn sem Ísraelsmenn eru nánast búnir að fullgera utan um byggðir Palestínumanna. Múrinn í Berlín sem Kommúnistastjórnin reisti var til að loka fólk inni loka það frá frelsinu. Þessi múr í Bagdad á að þjóna því hlutverki bæði að loka fólk inni og loka það úti.

Það er dapurlegt að vanhugsuð og ólögmæt innrás í Írak skuli nú 4 árum síðar hafa það í för með sér að íbúar landsins búi við algjört öryggisleysi. Flótti frá landinu er sem aldrei fyrr. Kristnir menn í landinu bjuggu í friði við aðra íbúa landsins þangað til fyrir 4 árum en fara nú flestir huldu höfði sem enn búa í landinu.

Sennilega gera Bandaríkjamönnum íbúum landsins mest gagn með því að fara úr landinu sem fyrst og fá aðra til að annast um að koma friði á í landinu og tryggja öryggi borgaranna.

Fyrir tæpum 4 árum síðan skrifaði ég um nauðsyn þess að Bandaríska herliðið færi og t.d. Egyptar, Jórdanir og Sýrlendingar tækju að sér friðar- og öryggisgæslu. Bandaríkjamenn ráða ekki við það og á þá er litið sem hernámslið sem þeir eru. Slíkt friðargæslulið má ekki vera í landinu nema í skamman tíma og þá verða íbúar að taka við. Annars verður líka litið á friðargæsluliðið sem hernámslið.

Sama verður upp á tengingnum varðandi Afghanistan verði herir Vesturlanda áfram í landinu. Hjálp til að koma á friði og öryggi í erlendu ríki byggist fyrst og fremst á íbúunum sjálfum en ekki aðsendu herliði. Það getur aldrei komið til eða gert gagn nema í skamman tíma.

 

Reisa fjögurra metra háan múr í Bagdad

Athugasemdir

[Halldór Jónsson, 22.4.2007 kl. 22:20]

Já það voru mikil mistök að hengja Saddam. Hann var sá eini sem réði við ástandið í landinu og hann hæfði þessu liði prýðilega. Enda var hann hinn merkasti maður sem gerði mörg kraftaverk fyrir þjóðina. En hann misreiknaði sig í utanríkispólitíkinni eins og Hitler.

[Ragnar (IP-tala skráð) 23.4.2007 kl. 12:25]

Er það ekki merkilegt í sögulegu tilliti að það voru Bandaríkjamenn sem hrópuðu hæst af fögnuði þegar Berlínarmúrinn var brotinn niður og Kommúnisminn leið undir lok. Hvað eru þeir sömu að gera í dag? Jú Ísraelsmenn (með stuðningi US) hafa verið að byggja múra til að skipta landssvæðum milli sín og Palestínumanna, í óþökk þeirra síðastnefndu. Og nú eru Bandaríkjamenn sjálfir að byggja aðskilnaðarmúra í Bagdad. Allt er hverfult í heimi hér. Í ljósi þess hvernig Bandaríkjamenn haga sér á alþjóðavettvangi, er von að maður spyrji: skildi Kommúnisminn hafa verið svo slæmur eftir allt saman?