Áskorun til Sjálfstæðismanna.

Jóhannes Jónsson sem kenndur er við Bónus birtir heilsíðuauglýsingar í blöðum í dag, áskorun til Sjálfstæðismanna í Reykjavíkurkjördæmi suður.  Þar skorar hann á Sjálfstæðismenn að strika yfir nafn Björns Bjarnasonar og nefnir ástæðu þess. Í auglýsingunni segir. "Sjállfur hef ég ávallt litið á mig sem sjálfstæðismann þó ég hafi átt bágt með að styðja flokkinn síðustu árin í stjórnartíð Davíðs Oddssonar."

Hvað sem segja má um auglýsinguna þá má ekki líta fram hjá aðalatriðinu. Skilaboð auglýsingarinnar eru röng.  Íslensk stjórnsýsla er ekki þannig að Björn Bjarnason einn hafi farið fram með þeim hætti sem farið var við rannsókn á Baugsmálinu en til þess er vísað í auglýsingunni. Þá er það heldur ekki dómsmálaráðherra einn sem tekur ákvörðun um það hver verður ríkissaksóknari það er rætt í ríkisstjórninni og síðan tilkynnir dómsmálaráðherra niðurstöðuna.

Rétta niðurstaðan fyrir sjálfstæðisfólk í Reykjavíkurkjördæmi suður er því  að kjósa ekki Sjálfstæðisflokkinn. Hafna honum sem valkosti en kjósa F listann þar sem ég skipa efsta sætið og get sagt með sama hætti og Jóhannes í Bónus að ég hef litið á mig sem Sjálfstæðismann en hef ekki getað stutt flokkinn í stjórnartíð Davíðs Oddssonar og nú arftaka hans af ýmsum ástæðum.

Sjálfstæðismenn eiga valkost sem þeir eiga að nýta sér og sýna að þeir sætta sig ekki við velferðarhallann, sætta sig ekki við aukin ríkisútgjöld og aukna skattbyrði, sætta sig ekki við óeðlileg afskipti stjórnmálamanna.  Þeir Sjálfstæðismenn sem vilja fá öflugan málsvara mannúðlegrar markaðhyggju, skattgreiðenda og neytenda eiga því að kjosa Frjálslynda flokkinn í Reykjavík suður.  Það er sú eina yfirstrikun sem gildir. Það eru einu skilaboðin sem tekið verður eftir. X-F á morgun.

Athugasemdir

[Magnús Þór Hafsteinsson, 11.5.2007 kl. 11:20]

Það er margt undarlegt að gerast nú í aðdraganda kosninga á morgun og ég hef þá trú að það sem komi upp úr kössunum eigi eftir að koma á óvart. Minni á vefsjónvarp Frjálslynda flokksins og heimasíðuna okkar. Nú er að taka á þessu. Allir að kjósa Frjálslynd á morgun!

[Ragnar (IP-tala skráð) 11.5.2007 kl. 15:04]

Sælir Jón og Magnús, það verður mér heiður að kjósa xF á morgun. Verst að ég get einungis kosið í Rvk-Norður svo Magnús þú færð atkvæðið mitt! Magnús, þú varst hreint magnaður á RÚV í gær þegar þú valtaðir yfir keppinautana hvern af öðrum og varst sannarlega sigurvegari þáttarins!! Áfram Frjálslyndir, kjósið xF!!

[Inga Lára Helgadóttir, 12.5.2007 kl. 00:12]

Svampur, nú ertu að segja að manneskja sé siðlaus og það er ekki gott .... maður verður að sjá hvaða afleiðingar svona skrif hafa, nema að þetta sé rétt ?

[Guðrún María Óskarsdóttir., 12.5.2007 kl. 00:44]

Sammála þér Jón eins og svo oft áður.

Vilji menn aðra valdhafa þá eru það flokkarnir sem menn skyldu sniðganga, í stað einstakra manna á listum þeirra.

baráttukveðjur úr Suðvestrinu.

kv.gmaria.

[Hlynur Jón Michelsen, 12.5.2007 kl. 01:02]

Skora á alla kjósendur Frjálslinda í S-Reykjavík að strika nú yfir nafn Björns Bjarnarsonar Dómsmálaráðherra.

[Jón Magnússon, 12.5.2007 kl. 11:20]

Björn Bjarnason er vandamál Sjálfstæðisflokksins en ekki Frjálslyndra. Kjósendum Frjálslynda flokksins kemur listi Sjálfstæðisflokksins ekki við og mega ekki gera atkvæði sitt ógilt með því að kjósa hreyfa við öðrum lista. Þeir sem eru óánægðir með Björn eða einhverja aðra í Sjálfstæðisflokknum eða það sem hann hefur gert þá er valkosturinn X-F að sjálfsögðu.