Hjálparhella ríkisstjórnarinnar

Í Silfri Egils áðan benti ég á að Margrét Sverrisdóttir hefði nú í tvígang bjargað lífi ríkisstjórnarinnar. Fyrir 4 árum með því að hafna að Nýtt Afl byði fram sem FF listi og nú með því að hafna því að Íslandshreyfingin byði fram FF lista. Fróðlegt verður að sjá hvað pólitíska öndunarvél Margrétar Sverrisdóttur, Styrmir Gunnarsson segir núna en í Staksteinum fyrir kosningar kenndi hann Ómari Ragnarssyni mjög ómaklega um slakt gengi Íslandshreyfingarinnar. Í vetur fór Íhaldspressan hamförum gegn Frjálslynda flokknum og mér persónulega en hafði ekki erindi því að Frjálslyndi flokkurin hélt sínu þó æskilegt hefði verið og maklegt að við kæmum fleiri mönnum á þing og það er mikill söknuður af vöskum mönnum eins og Magnúsi Þór Hafsteinssyni og Sigurjóni Þórðarsyni en þeir ná kjöri næst.

Margrét Sverrisdóttir hélt því fram að Frjálslyndi flokkurinn hefði eytt 50 milljónum í kosningabaráttuna. Sú staðhæfing er gjörsamlega úr lausu lofti gripin. Staðreyndin er hinsvegar sú að Frjálslyndi flokkurinn eyddi tæpum 20 milljónum í kosningabaráttu fyrir borgarstjórnarkosningar í fyrra en samt náði Margrét ekki kjöri.

Því miður tókst ekki fyrir þessar kosningar að byggja um stóran Frjálslyndan flokk en það verður gert fyrir næstu kosningar.

Athugasemdir

[Þóra Guðmundsdóttir, 13.5.2007 kl. 17:50]

Næst verður Frjálslyndi flokkurinn bæði stóri og sterkur

[Grétar Pétur Geirsson, 13.5.2007 kl. 18:01]

Til Hamingju Jón með glæsilega kosningu. Næsta barátta byrjar á morgun þessi flokkur er kominn til að vera.Ég er stoltur að mínu fólki við erum með góða málefnastöðu nú þurfum við að treysta stoðir hans á næstu fjórum árum.Brotthvarf Margrétar var þess valdandi að núverandi stjórn hlýtur að senda henni blómvönd.

[Georg Eiður Arnarson, 13.5.2007 kl. 21:56]

Til hamingju Jón, kv frá eyjum.

[Þorsteinn Siglaugsson, 13.5.2007 kl. 22:00]

Jón. Ég óska þér til hamingju með að vera kominn á þing. Þar hefur langþráður draumur væntanlega rætst. Mér leiðist hins vegar þessi pólitík ykkar hjá Frjálslyndum/Nýju afli. Í mínum huga er flokkur sem kennir sig við frjálslyndi frjálslyndur, ekki einhvers konar sambland af sósíalisma, óskynsamlegri sjávarútvegsstefnu og fasisma í garð útlendinga.

[Gísli Baldvinsson (IP-tala skráð) 13.5.2007 kl. 22:34]

Hamingjuóskir Nonni minn. Gaman að þið komið saman til Austurvallar þú og Eddi. Breytið nú kjördæmaskipuninni eins og okkur dreymdi um.

gb

[Grétar Pétur Geirsson, 13.5.2007 kl. 23:07]

Þessi orð þín Þorsteinn segir meira um þig og þína hugsun en það sem við í Frjálslynda flokknum höfum verið að boða. Lestu stefnuskrána og dæmdu svo.Það væri líka gott að þú reyndir að rökstiðja þinn málflutning þannig að við skildum hvað þú værir að tala um

[Magnús Paul Korntop, 13.5.2007 kl. 23:12]

Til hamingju með þingsætið.

[Árni Gunnarsson, 13.5.2007 kl. 23:40]

Nú viðurkenni ég slæman misskilning. Það var ekki fyrr en ég las hugleiðingu Þorsteins Siglaugssonar að ég kom auga á hversu skynsamleg sjávarútvegsstefna okkar er.

Betra seint en aldrei. 

[Ómar Ragnarsson, 13.5.2007 kl. 23:58]

Til hamingju með þingsætið, Jón. Það er rétt hjá þér að þjónslund Styrmis við flokkinn sinn sýnir ævinlega hvenær hann sér ógn steðja að honum. Margfaldir Staksteinar sem hann hefur eytt á mig sýnir að honum er ekki rótt þegar einhverjir hagga við Sjálfstæðisfylginu.

 kosningavikunni mátti sjá greiningu í skoðanakönnun á því hvaðan fylgið til Íslandshreyfingarinnar kæmi og kom í ljós að stærsti hlutinn kæmi frá Sjálfstæðisflokknum og næst stærsti hlutinn frá VG.

Samkvæmt því tókum við meira frá stjórnarflokkkunum en stjórnarandstöðunni.

Síðustu vikur kosningarbaráttunnar lögðum við mikla áherslu á þau atriði stefnu okkar sem við tókum upp sem það besta hægra megin frá, - það sem við köllum skapandi skattastefnu og við fundum vel fyrir stuðningi fyrrum Sjálfstæðismanna við okkur, - Sjálfstæðismanna sem eru andvígir stóriðjustefnunni.

Við komum með þessu í veg fyrir enn stærri sigur Sjálfstæðisflokksins.

Það er því rangt að kenna Íslandshreyfingunni um það að stjórnin lafði. Því olli ákvæði kosningalaga sem Frjálslyndinar hafa fundið fyrir í síðustu kosningum þótt þeir hafi sloppið og það stundum naumlega á síðustu stundu.  

Íslandshreyfingin var með þessu ákvæði, sem hentar stóru flokkunum, rænd tveimur þingmönnum og þjóðin var rænd því að meirihlutinn réði og stjórnin félli.

Við stóðum alla kosningabaráttuna þétt við hlið stjórnarandstöðunnar, veittum henni alla þá liðveislu sem hugsanlegt var og teljum að það hafi munað um það og það átt þátt í að veikla Framsóknarflokkinn.

[Guðrún María Óskarsdóttir., 14.5.2007 kl. 00:50]

Aftur til hamingju Jón, já sannarlega höldum við áfram að byggja upp flokkinn, því hann er kominn til að vera.

kv.gmaria.

[Magnús Þór Hafsteinsson, 14.5.2007 kl. 12:16]

Ég fór að hugsa margt þegar ég horfði á Silfur Egils hve einkennileg þau eru örlögin. Þarna sat Margrét sem stærsti tapari kosninganna andspænis nýbökuðum þingmanni sem sestur var í það þingsæti sem alltaf var frátekið fyrir hana í hugum okkar í Frjálslynda flokknum það er þingmaður floksins í Reykjavík Suður.

Skömm Ómars Ragnarssonar í þessu öllu er líka mikil. Mikið mikið hefur sá maður fallið í áliti hjá mér og þar var virkilega úr háum söðli að detta því hann var alltaf hetja í mínum augum alveg frá því ég man fyrst eftir mér.

[Axel Jón Fjeldsted (IP-tala skráð) 14.5.2007 kl. 15:37]

Ég hvet alla Frjálslynda að hætta að kenna öðrum um þessa sneipu. Ef sátt hefði verið innan ykkar raða þá væri staðan önnur. Jón M. komst á þing á kostnað Magnúsar Þ. og Sigurjóns.