Ingibjörg vill ekki hreina vinstri stjórn.

Yfirlýsing Geirs og Ingibjargar um stjórnarmyndunarviðræður Samfylkingar og Sjálfstæðisflokks fela í sér að Ingibjörg vill frekar reyna stjórnarmyndun með Sjálfstæðisflokknum en Vinstri grænum og þess vegna Framsóknarflokknum.  Sjálfsagt er það vegna þess að Ingibjörg metur það svo að Vinstri grænir séu ekki samstarfshæfir og þykir því vænlegra að sitja í skjóli Geirs. Fróðlegt verður að sjá hvort flokkarnir ná saman um myndun ríkisstjórnar og um hvernig málefnasamningurinn verður:

Skyldi Samfylkingin krefjast breytinga á kvótakerfinu?

Skyldi Samfylkingin gera kröfu um aðildaviðræður við Evrópusambandið?

Skyldi Samfylkingin standa á kosningaloforðinu um að eyða biðlistum og byggja viðunandi aðstöðu fyrir aldraða.

Skyldi Samfylkingin standa föst á því að skattkerfið verði leiðrétt þeim tekjulágu til hagsbóta.

Svör við þessu og mörgu fleiru verða fróðleg. Nái flokkarnir saman þá kemur í ljós hverskonar hryggjarstykki er í Samfylkingunni og formanni hennar.

Formlegar stjórnarmyndunarviðræður hefjast væntanlega á morgun

Athugasemdir

[Árni Gunnarsson, 17.5.2007 kl. 21:02]

Ég kann ekki að reikna það í fémunum sem íslenska samfélagið er látið reiða af höndum til kosningabaráttu þeirra flokka sem nú mæna á veisluna stóru við kjötkatlana. En ég bið einhvern glöggan mann að benda mér á ef mér hefur yfirsést eitthvað sem þeir sögðu um pólitísk ágreiningsefni og líkindi eru til að hafi átt upptök í líffærinu sem liggur vinstra megin í brjóstholinu.  

[Inga Lára Helgadóttir, 17.5.2007 kl. 22:23]

Ég vona að samstarf þeirra muni ganga vel, það er okkur öllum í hag.... en auðvitað er marga góða menn að finna í öðrum flokkum  

[Guðrún María Óskarsdóttir., 18.5.2007 kl. 00:49]

Já það mun nú aldeilis koma í ljós hvort verður hægt að festa hönd á einhverju  afgerandi til umbóta í íslensku samfélagi.

kv.gmaria.