Heilögu landamærin og Rússar.

Evrópusambandið og Bandaríkin hafa farið mikinn vegna þess að Rússar tóku yfir Krímiskaga eftir að viðsjár höfðu aukist með Úkraínu og Rússlandi í kjölfar stjórnarbyltingar í Úkraínu þar sem hin nýju stjórnvöld lýstu yfir eindregnum vilja til að snúa sér til Evrópusambandsins og Bandaríkjanna en efna til óvinafagnaðar við Rússland.

Vesturveldin þ.e. Bandaríkin og Evrópusambandið sögðu að landamæri væru heilög og settu viðskiptabann á Rússland vegna yfirtöku Krímskaga. Íslenska ríkisstjórnin kaus að vera með og þáverandi utanríkisráðherra Gunnar Bragi flutti til Kíev í Úkraínu tímabundið til að lýsa yfir samstöðu við Úkraínu.

Þrátt fyrir að meirihluti þeirra sem búa á Krím séu Rússar og Krímskagi hafi lengstum tilheyrt Rússlandi þá kusu Vesturveldin að nýta sér þetta til að efna til fjandskapar við Rússa.

Heilög landamæri skv. túlkun Evrópusambandsins og Bandaríkjanna í kjölfar þessa voru þau að landamæri væru óumbreytanleg og aldrei kæmi til greina að þeim væri breytt með hervaldi. Flest landamæri í Evrópu og víðar eru þó eins og þau eru vegna þess að beitt var hervaldi. Sjálfsákvörðunarréttur íbúanna varð allt í einu aukaatriði í huga vestrænna stjórnmálamanna sem kusu að halda fram óbreytanleika landamæra.

Í gær lék Ísland landsleik í knattspyrnu við Kósóvó. Hvað er Kósóvó? Hvaða land er það og hvernig varð það til. Kósóvó var hluti af Serbíu og síðar Júgóslavíu þegar sigurvegarar fyrra heimsstríðs breyttu landamærum með hervaldi. 

Þegar Júgóslavía var að leysast upp um síðustu aldamót og til urðu ríkin Slóvenía, Króatía, Bosnía-Hersegóvína, Svartfjallaland, Makedónía og Serbía,  urðu róstur í Kósóvó. Serbar töldu Kósóvó tilheyra Serbíu eins og það hafði gert um langa hríð. Átök blossuðu upp milli Serba og Albana sem bjuggu í Kósóvó og þegar Serbar létu kné fylgja kviði til að koma uppreisnarmönnum af albönsku þjóðerni í burtu,réðust Vesturveldin á Serbíu.

Nato sem hafði fram að aldamótunum eingöngu verið varnarbandalag breyttist úr varnarbandalagi í árásarbandalag undir forustu Bandaríkjanna og fullum vilja Evrópuríkja. Ísland gerði enga fyrirvara vegna þessa. Árás var gerð á Serbíu m.a. höfuðborgina og Serbar neyddir til að hörfa frá eigin landi og fyrir tilstyrk og forustu  Bill Clinton þáverandi Bandaríkjaforseta varð Kósóvó verndarsvæði Sameinuðu þjóðanna og lýsti síðan yfir einhliða sjálfstæði árið 2008 við fagnaðaróp stjórnenda Vesturveldanna. Landamæri Serbíu voru nú ekki heilagri en það.

Vesturveldin töldu sjálfsagt að breyta landamærum Serbíu með hervaldi og taka Kósóvó frá Serbum. Sex árum síðar mótuðu þau þá stefnu að aldrei mætti breyta landamærum með hervaldi. Alla vegar ekki þegar um Krímskaga væri að ræða.

Öll þessi framganga skammsýnna vestrænna stjórnmálamanna er dapurleg. Í fyrsta lagi var það hið versta óráð að breyta Nato í árásarbandalag. Í öðru lagi var það hið versta óráð og óafsakanlegt að ráðast á Serbíu með þeim hætti sem gert var. Í þriðja lagi var óráð að efna til ófriðar í austurvegi við Rúss.

Alvarleg og raunveruleg ógn steðjar nú að Vesturlöndum, Rússum og fleirum. Rússar geta í þeirri baráttu verið og eiga að vera okkar traustustu bandamenn. Þess vegna verða leiðtogar Vesturveldana að sýna í verki nýja nálgun gagnvart Rússum og gera okkur og þeim kleyft að auka tengsl og efla samstarf.

 

Athugasemdir

[GB (IP-tala skráð) 25.3.2017 kl. 11:12]

Og er þá eftir að tíunda ofsóknirnar gegn 20 milljón Rússum í Austur Úkraínu..

[Ómar Ragnarsson, 25.3.2017 kl. 17:22]

Loftárásin á sjónvarpsstöðina í Belgrad var skammarleg og í raun stríðsglæpur, því miður. 

[Ólafur Als, 25.3.2017 kl. 17:58]

Sæll,

það er vel að ná góðum samskiptum við Rússa og finna hag í því að eiga við þá viðskipti. Hins vegar getur það ekki verið til eftirbreytni að verðlauna þá fyrir innrás á Krímskagann og innlimun hans í rússneska stórríkið. Fæ ekki skilið hvernig hægt er að rétlæta slíkt, jafnvel þó svo að meirihluti íbúa séu þar af rússnesku bergi ... deilan um Kosóvo verður ekki leyst með því að bera hana saman við innrás Rússa og yfirtöku Krímskagans. Rússar hafa undirgengist alþjóða samninga um að virða landamæri Úkraínu. Að auki er samanburðurinn við Kosóvo meingallaður að öðru leyti einnig; ef vísa á í rússnesk áhrif á Krímskaga á þá ekki að benda á albönsk áhrif í Kosóvo? Nú er það svo að Rússar munu varla skila þessu landi. Ekki frekar en því sem þeir stálu af Finnum, Japönum og um samdist að þeir fengju af Póllandi - og það þrátt fyrir að ráðast inn í það land skömmu eftir innrás Þjóðverja sem markaði upphaf seinni styrjaldar. Í mínum huga er þetta mál einfalt; Rússum ber að skila Krímskaga.

[Elle_, 25.3.2017 kl. 18:39]

Eg skil ekki af hverju svo margir á Íslandi sjá stríð Serba GEGN Bosníu, Kosovo og Króatíu svona frá allt öðrum bæjardyrum en ég horfði á árum saman í fréttum nokkurra stöðva í Massachusetts 1990 +  Grimmir glæpir Serba gegn þessu fólki, mest gegn karlmönnum. Og alveg sama hvort það voru ungir strákar eða gamlir menn.

Grimmileg fjöldamorð voru framin af Serbum á 8 þúsund ungum drengjum og mönnum í Bosníu, þeim var beinlínis slátrað, kallað the SREBRENICA MASSACRE.

Það sjá líka of margir grimmd Ísraelsstjórnar gegn Palestínu frá röngum sjónarhóli.

[Helga Kristjánsdóttir, 26.3.2017 kl. 03:21]

Mikið assgoti er óþreyjan hjá þessum gömlu ESB,löndum orðin yfirþyrmandi í átök og yfirgang.Þeim er orðið það illþolanlegt að landamæri standi í vegi þeirra heilagleika að víkka  yfirráðasvæði sitt út.Það segir fátt af stækkunarstjóra þeirra núna,þegar fleiri aðildarlönd en England óska að feta í fótspor þeirra og ganga út.Verður ekki ráðinn útgöngustjóri,? 

[Jónatan Karlsson, 26.3.2017 kl. 08:30]

Þetta stutta söguágrip ætti hreinlega að gera að skyldulesningu fyrir unga utanríkisráðherra, líkt og fyrir bjálfann sem þú vitnaðir til.

Varla trúi ég því nú, að þú tilheyrir enn flokki handbenda þeirra frænda Bjarna og Benedikts?

[Jón Magnússon, 26.3.2017 kl. 10:16]

Það er alveg rétt GB.

[Jón Magnússon, 26.3.2017 kl. 10:17]

Sammála Ómar það var líka árásin á Kínverska sendiráðið í Belgrad. Fyrst gerð var loftárás á kínverska sendiráðið í Belgrad þá getur fólk ímyndað sér hvað loftárásirnar voru miklar og bitnuðu á almennum borgurum.

[Jón Magnússon, 26.3.2017 kl. 10:24]

Ólafur það er alveg rétt að gengið var á fjölþjóðlega samninga. En veraldarsagan kennir okkur það að slíkt gerist jafnan þegar aðstæður breytast og þess vegna hafa ábyrgir aðilar alltaf vitað að gamla vígorð Rómverja "Arma tuendum pace" (Vopnin verja friðin) á oft við. Víða í Evrópu hafa landamæri verið dregin af sigurvegurum og gengið á rétt þjóðernishópa eins og t.d. færsla landamæra Póllands til vesturs. Færsla landamæra Úkraínu til vesturs. Landamæri Ungverjalands og Rúmeníu eru dregin af sigurvegurum í fyrra stríði og eru óréttlát gagnvart Ungverjum og þannig mætti lengi telja. Hvað svo sem því líður þá datt engum í hug að Rússar létu Krímskagann frá sér. Þeir gerðu það aldrei í raun þó að Krúsjév þáverandi Sovétleiðtogi færði Úkraínumönnum hann að gjöf í einu fylleríinu sínu. Krímskaginn er og hefur verið hluti af Rússlandi þó svo að þessi formlega færsla á sjötta áratug síðustu aldar hafi átt sér stað, þá var Krímskaginn í raun aldrei skilin frá Rússlandi.

[Jón Magnússon, 26.3.2017 kl. 10:31]

Elle við fengum ansi einhliða fréttir af stríðinu í gömlu Júgóslavíu. Stríðið í Júgóslavíu var ógeðslegt og maður átti bágt með að trúa að svona mikil grimmd gæti búið með fólki í Evrópu. Við skoðun sögunnar sést að þetta er að verulegum hluta arfleifðin frá yfirráðum Tyrkja. Slóvenía komst út úr ríkjasambandinu án teljandi erfiðleika. Króatar frömdu óafsakanleg grimmdarverk gagnvart Serbum og múslimum í Bosníu Hersegóvínu. Króatar innlimuðu auk þess landssvæði sem var nánast eingöngu setið af Serbum og hröktu þá á brott sem þeir drápu ekki. Mestu átökin stóðu í Bosníu Hersegóvínu sem er e.t.v. skiljanleg vegna samsetningar íbúa landsins og þess að þetta var lengst af átakasvæðið milli Vestursins og Tyrkjaveldis.  Serbar guldu fyrir það að vera undir stjórn kommúnista og vera sterki aðilinn og fengu e.t.v. þess vegna mun neikvæðari umfjöllun en aðrir stríðsglæpahópar á þessum tíma.

Ekki má síðan gleyma því að í kjölfar herhlaups NATO gegn Serbum þá framdi fólk af Albönskum uppruna í Kósóvó óafsakanleg hryðjuverk gagnvart Serbum á svæðinu og hröktu meginhluta þeirra á flótta frá landssvæðinu.

[Jón Magnússon, 26.3.2017 kl. 10:32]

Evrópusambandið ber mikla ábyrgð á þróun mála í Úkraínu Helga það er alveg rétt.

[Jón Magnússon, 26.3.2017 kl. 10:32]

Takk fyrir Jónatan.

[Anna Sigríður Guðmundsdóttir, 26.3.2017 kl. 13:30]

Landamæralausar, bankafalsaðar og kauphallaspilavítis snúningshjólaðar tölvutölur spilafíkla heimsins. Bæta daglega í stærri blekkingarloftbólu, eins og enginn sé morgundagurinn? Sumir kalla þetta hagnað og aðrir virðisauka?

Almenningur heimsins þrælar launarændur á hamsturshjólum  bankafangabúra þessa glæpaspilafíkla.

Það er enginn munur á almenningi í Rússlandi og öðrum löndum, og almenningi á Íslandi.

Landamærin eru við bankarimla glæpafjármálabankakerfi heimsins.

Tómt mál að tala um snefil af trausti almennings á landamæralausu og bankasamtengdu glæpafjármálakerfi heimsins.

M.b.kv.

[valdimar jóhannsson (IP-tala skráð) 26.3.2017 kl. 13:37]

Elle
Fjöldamorð voru líka framin af Kosovo-Albönum, en lokið lagt á hjá fréttamiðlum.
Það var bara fyrst til að byrja með, sem við fengum fréttir frá báðum aðilum, en þegar víst varð að vesturlönd og þá sértaklega Bandaríkin voru á því að fylgja múslimum í þessu stríði og byrjuðu að bomba Serbíu, kommúnistana,  þá byrjuðu "fals fréttirnar" að berast á færibandi og allt fundið Serbum til foráttu.
Kosovo verður hérað í Albaníu ef það er ekki þegar orðið það - þökk veri NATO og USA.

[Ólafur Als, 26.3.2017 kl. 19:59]

Er ekki kominn tími á að leiðrétta þessa vitleysu með að Nikita hafi í ölæði gefið Krímskagann? Aðsta stjórnarráð Sovétanna stóð að baki þeim gjörnini vegna 300 ára afmælis innlimunar Úkraínu í keisaradæmið, rússneska. Fleira kann og að hafa legið að baki en þessi ákvörðun var tekin af 13 einstaklingum ráðsins - samhljóða - og var þrátt fyrir allt brot á sovésku stjórnarskránni. Einnig er vert að taka fram að Nikita var Rússi en bar góðan hug til Úkraínumanna. 

Fyrir réttum 20 árum var uppáskrifaður alþjóðlegur samningur um að Rússar viðurkenndu landamæri Úkraínu og að Krímskaginn væri hluti landsins. Rússar hafa og ráðist inn í Georgíu, hrifsað þar land og viðhalda dólgshætti sínum þar enn. Eins og gefur að skilja munu veikburða þvinganir ekki hreyfa við einræðisstjórninni í Kreml. Rússneski björninn hefur aldrei skilið annað en steyttan hnefann og getur því farið fram eins og hann vill. Ekki ósvipað og hjá Kinverjum gegnvart Tíbet og nú undir það síðast í Suður Kínahafi. Dólgar virðast komast upp með ofbeldi - en algerlega ótækt að við aumir íbúar eyjunnar bláu göngum í lið með dólgunum og réttlætum þeirra aðferðir.